Isaiah 36

Dagbani Bible (Naawuni Kundi Kasi)

← Chapter 35 Jump to: Chapter 37 →

1Hɛzɛkia ni daa di nam zaŋ chaŋ yuun’ pinaanahi puuni, ka Asiria Naa Sɛnachɛrib daa kana ti liri Juda tin’ shɛŋa bɛ ni me goma gili n-deei li.

2Asiria naa maa daa timla Rabishake, ka o yi Lakishi n-zaŋ tɔbbihi pam pa omaŋ’ zuɣu ka Naa Hɛzɛkia sanna Jɛrusalɛm. O daa zanila kɔso’ titali din be zuɣusaa polo biaŋ solɔɣu din labiri kpaluhi ʒiishee polo la.

3Ka Hilikia bia Ɛliakim ŋun daa su nayili fukumsi la mini Shɛbina ŋun daa nyɛ gbaŋŋmar’ la ni Asaf bia Jɔa ŋun daa sabiri bina yɛla zaani la daa ka sapashin’ kpɛm’ maa sanna.

4Ka Rabishake maa daa yɛli ba, “Yɛlimiya Hɛzɛkia, Asiria na’ tital’ la ni bɔhir’ a shɛm m-bɔŋɔ: Ŋuni ka a lee niŋ naani?

5A tɛhiya ni nol’ ni yɛtɔɣa nyɛla yɛm soya ni yiko din tuhiri tɔbu? Ŋuni ka a lee du m-ba ka mɔri ma maa?

6A du m-bala Ijiptinim’ bɛn nyɛ gbiŋgbaŋ’ jaaŋgbe’ kabili din ni tooi kuhi nir’ ŋun zaŋ omaŋ’ dalim li nuu ŋɔ. Lala n-nyɛ Firawuna zaŋ chaŋ ŋunkam zaŋ omaŋ’ dalim o polo.

7Amaa di yi nyɛla yi yɛli ma mi, ‘Ti du m-bala Yawɛ ŋun nyɛ ti Naawuni ŋɔ.’ Pa o bimbina ka Hɛzɛkia pun wurim ka yɛli Judanim’ mini Jɛrusalɛmnima, ‘Yi yɛn jɛmd’ o la bimbini ŋɔ gbin’ la?’

8Kamiyana ka yi mini n dan’ Asiria naa maa puli. Yi yi ni tooi nya wɔribariba, n ni tin ya yuri tusaayi.

9Yi yi du m-bala Ijiptinim’ bɛ yuri mini bɛ chɛchɛbunsi zuɣu, wula ka yi lee yɛn tooi niŋ kari n dan’ sapashinnim’ ni ŋun pɔri gba.

10Ka din pahi nyɛla, pa Yawɛ milinsi ni ka n kana ni n ti saɣim tiŋgbani ŋɔ? Yawɛ n-yɛli ma, ‘Cham’ ti saɣim tiŋgbani maa.’ ”

11Di saha ka Ɛliakim mini Shɛbina ni Jɔa daa yɛli Rabishake maa. “Ti suhir’ a, yɛlim tinim’ bɛn nyɛ a daba ŋɔ Aramaik yɛtɔɣa ni, dama ti wumdi li, ka di lan yɛri ti Judanim’ yɛtɔɣa ni ka niriba bɛn be gooni zuɣu ŋɔ wumdi li.”

12Amaa ka Rabishake maa daa bɔhi ba, “N dan’ tim ma mi na ni n ti zaŋ yɛtɔɣa ŋɔ yɛli yi mini yi dana kɔŋko ka pa ni niriba bɛn be gooni ŋɔ zuɣu, ka nyɛ bɛn zaa yɛn di bɛmaŋmaŋ’ bindi ka nyu bɛmaŋmaŋ’ dulim kaman yi gba ni yɛn di yimaŋmaŋ’ bindi ka nyu yimaŋmaŋ’ dulim shɛm ŋɔ?”

13Di saha ka Rabishake maa daa duh’ o yee kuhi yɛli Judanim’ yɛtɔɣa puuni, “Wummiya Asiria naa ŋun nyɛ na’ tital’ la ni yɛli shɛm.

14O yɛliya, ‘Di chɛliya ka Hɛzɛkia yɔhim ya, dama o ku tooi fan ya bahi.

15Kul di chɛliya ka Hɛzɛkia chɛ ka yi zaŋ yimaŋ’ dalim Yawɛ ka yɛra, Yawɛ shiri ni fa ti bahi, ka Asiria naa ku tooi ŋme n-fa tiŋ’ ŋɔ.’

16Di saɣiya Hɛzɛkia ni yɛli shɛm maa. Dama Asiria naa yɛliya, ‘Kamiyana ti niŋ sandaani niŋ ma din ni chɛ ka yi zaa yinoyino tooi di omaŋmaŋ’ tiwala min’ o fiig tia wala, ka nyu omaŋmaŋ’ kɔbiliga ni kom.

17Di nyaaŋa ka n ti zaŋ ya kuli tiŋgbɔn’ shɛli din be kaman yimaŋmaŋ’ tiŋgbɔŋ ni luɣ’ shɛli chi mini kawana ni wain ni bindira ni tihi puri ni be.

18Di chɛliya ka Hɛzɛkia yɔhim ya yɛli, ‘Yawɛ ni tiligi ti.’ Zuliya shɛb’ wuna na mi n-fa bɛ tiŋgbɔŋ Asiria naa nuu ni?

19Hamat mini Aripad ni Sɛfarivaim wuna la lee be ya? Bɛ daa tooi fa Samaria n nuu ni bahi?

20Tinsi ŋɔ zaa wuna maa puuni wun’ ŋuni n-na tooi fa bɛ tinsi maa shɛli n nuu ni bahi, ka Yawɛ ti yɛn fa Jɛrusalɛm n nuu ni bahi?’ ”

21Ka bɛ daa shini ka bi garigi yɛl’ o shɛli, dama naa daa pun yɛli ba, “Di garigiy’ o.”

22Di saha ka Hilikia bia Ɛliakim ŋun daa su nayili fukumsi la mini Shɛbina ŋun daa nyɛ gbaŋŋmar’ la ni Asaf bia Jɔa ŋun daa sabiri bina yɛla zaani la daa dari tɔhi bɛ binyɛra, ka lab’ Hɛzɛkia sanna nti yɛl’ o Rabishake maa ni yɛli shɛm.

← Chapter 35 Jump to: Chapter 37 →