Isaiah 38

Dagbani Bible (Naawuni Kundi Kasi)

← Chapter 37 Jump to: Chapter 39 →

1Di saha ka dɔro daa gbaai Hɛzɛkia hal ka di ti mii. Ka Amɔz bia anabi Aizaia daa ka o sanna ti yɛl’ o, “Yawɛ yɛliya, malimi shɛlikam shili zali, dama a ku lan yiɣisi, a ni kpi.”

2Ka Hɛzɛkia daa ŋmalig’ o nini bahi dukpini polo n-suhi Yawɛ yɛli:

3“Yawɛ, n suhir’ a, teemi n ni jɛm a ni ʒiɛyimtali ni n suhu zaa ka tum din tuhi a sani shɛm yɛla;” ka daa kum pam.

4Di saha ka Yawɛ daa yɛli Aizaia

5“Cham’ ti yɛli Hɛzɛkia, Yawɛ ŋun nyɛ a yab’ Dauda Naawuni la yɛliya: N wum a kumsi maa, ka deeg’ a suhigu maa. N ni pah’ a yuun’ pinaanu.

6N ni fa a mini tiŋ’ ŋɔ Asiria naa nuu ni bahi, ka guli tiŋ’ ŋɔ.”

7Dimbɔŋɔ n-nyɛ shihirili shɛli din yi Yawɛ sanna n-wuhiri ni o ni niŋ o ni lo alikauli ni o ni niŋ shɛm maa.

8Nyama, n ni chɛ ka mahim tirisi yaɣi dunɔdura shɛŋa Ahaz ni daa me la dura pia zuɣu lab’ nyaaŋa. Ka wuntaŋ’ daa shiri tirisi lab’ nyaaŋa dunɔdura pia maa.

9Juda Naa Hɛzɛkia ni daa biɛ’ ŋ-kpaŋ, di nyaaŋa ka o daa sabi sabbu ŋɔ yɛli:

10N daa tɛhiya ni m biɛhigu nyaɣisim saha maa, n yɛn yila dunia yili chaŋ kpiimba biɛhigu shee, ka ku paai n saha.

11N daa tɛhiya ni dunia ŋɔ ni, n ku lan nya Yawɛ bee ninsala yaha.

12Bɛ wurim m biɛhigu shee kaman bɛ ni sibigiri piɛgul’ tanti suɣili shɛm la. N daa kpabi la n nyɛvili kaman kpalua ni kpabiri tana shɛm la, ka bɛ ŋmaai ma yihi kpalu’ dari ni. Wuntaŋ’ ni zaŋ hal ni yuŋ, o kul wuhirila n nyɛvili tariga.

13N kul kuhirimi bɔri sɔŋsim hal ni asiba. O bemi kaman gbuɣinli la n-kul ŋmari n kɔba wuntaŋ’ ni zaŋ hal ni yuŋ, o kul ŋmaarila n nyɛvili.

14N kukoli daa niŋla kukol’ bila ka bi kpɛma, ka n daa bamdi kaman ŋmani la. N daa lihila zuɣusaa hal ka n nina ti fulim. N Duuma, yihim’ ma muɣisigu ŋɔ ni.

15Amaa wula ka n yɛn yɛli? Dama o pun yɛli ma ni omaŋmaŋa n-niŋ li. Ka n suhu saɣim pam, ka n kɔŋ gom.

16N Duuma, dimbɔŋɔnim’ zuɣu ka niriba be, din’ nim’ zaa zuɣu ka n nyɛvili be. Tim’ ma alaafee, ka n lan be!

17Yɛlimaŋli, n ni nya suhusaɣiŋgu shɛli maa paai ma la n sɔŋsim zuɣu. A tiligi n nyɛvili barina kam ni; ka chɛ n daalahichi zaa.

18Dama bɛn be kpiimba biɛhigu shee ku tooi puh’ a, bɛ mi ku tooi paɣ’ a. Ninvuɣ’ shɛb’ bɛn be gbala ni ku tooi mali tahima zaŋ chaŋ a ʒiɛyimtali polo.

19Ninvuɣ’ shɛb’ bɛn be bɛ nyɛviya ni n-nyɛ bɛn paɣir’ a kaman n ni paɣir’ a shɛm zuŋɔ dabisili ŋɔ. Bihi banim’ yɛri bɛ bihi a ʒiɛyimtali yɛla.

20Yawɛ ni tiligi ma, ka ti zaŋ goonjɛnim’ ŋme m-paɣ’ o. Ti kul ni paɣir’ o o jɛmbu duu hal ni ti nyɛviya tariga.

21Ka Aizaia daa yɛli naa, “Chɛ ka bɛ baɣisi fiig tia wala ta bintɔrigu maa ka a nya alaafee.”

22Ka Hɛzɛkia gba daa bɔhi, “Shihirili dini n-lee wuhiri ni n ni chaŋ Yawɛ jɛmbu duu?”

← Chapter 37 Jump to: Chapter 39 →