Isaiah 51

Dagbani Bible (Naawuni Kundi Kasi)

← Chapter 50 Jump to: Chapter 52 →

1Yinim’ bɛn bɔri Yawɛ, ka bɔri wuntia ŋɔ, wummiya! Nyamiya bɛ ni daa ŋma kuɣ’ shɛli yihi ya na mini bɛ ni daa gbi tampin shɛŋa yihi ya na.

2Lihimiya yi yab’ Ibrahimma mini Zaratu bɛn dɔɣi ya la. N daa piig’ o ka o nyɛla o ko, amaa ka n daa niŋ alibarika niŋ o ni ka o tuŋ teei.

3Dama man’ Yawɛ ni kpaŋsi Jɛrusalɛm, ka sɔŋ o luɣ’ shɛli polo din lu n-dahim. N ni chɛ ka o tiŋgban’ nɛli be kaman Idɛn puu din nyɛ man’ Yawɛ puu la; ka chɛ ka suhupiɛlli mini wumpaɣibo yila be o ni.

4N niriba, wummiya, wummiya n ni yɛn yɛl’ shɛm: N ni zaŋ n wuhibu wuhi niriba, n zaligunim’ ni ti zuliya kam zaa neesim.

5N zaŋ n faako tibu mirina yomyom. N tiliginsim be soli, n ni bo yɛlimaŋli soli ti niriba. Bɛn be katiŋ’ ha kul guhiri ma mi, ka niŋ n yaa naani.

6Duhimiya yi zuɣuri lihi zuɣusaa ka lihi tiŋgban’ ni; dama zuɣusaa ni vuui kaman nyɔhi la, ka tiŋgbani mi kpaai kaman situr’ kurili la. Ka niriba bɛn be dunia ni mi kpi kaman nanviri la. Amaa n tiliginsim maa kul ni beni sahakam. Ka n nasara dibu mi kul ku mali tariga.

7Yinim’ bɛn mi din tuhi ŋɔ, wummiya! Yinim’ bɛn gbibi n wuhibu yi suhuri ni ŋɔ, di zɔriya niriba ni maani ya ansarisi shɛli. Ka bɛ yi turi ya, yin’ di chɛliya ka di muɣisi ya.

8Lɛla ni ŋub’ ba kaman bɛ ni ŋubiri situra shɛm la. Zunzuya ni di ba kaman piɛkɔbiri la. Amaa n faako tibu mini n tiliginsim din nyɛ zuliya kam zaa dini la kul ni beni sahakam.

9Yawɛ, yiɣisim’ sɔŋ ti! Zaŋm’ a yiko tiligi ti; zaŋm’ a yiko maa niŋ kaman a ni daa pun niŋ shɛm kurimbuni ha la. Nyini n-daa chɛ ŋ-ŋmahi teeku ni biŋkɔb’ so bɛ ni booni Rahab la.

10Nyini n-daa chɛ ka teeku kom nyuui, ka a mali soli kom puuni sɔŋ, ka a ni daa tiligi ninvuɣ’ shɛb’ la dol’ li du.

11Nyin’ Yawɛ ni tiligi ninvuɣ’ shɛb’ maa ni paai Jɛrusalɛm. Bɛ ni ti yiini yila ni suhupiɛlli. Bɛ ni ti mali suhupiɛlli sahakam, ka bɛ suhusaɣiŋgu ni suhugarigu naai.

12Mani n-nyɛ ŋun kpaŋsiri ya, ka bɔ n-niŋ ka yi zɔri daadam ŋun ni kpi ŋɔ dabiɛm? Daadam ŋmanila mɔri, o kul ku beni sahakam.

13Yi tam yi namda ŋun nyɛ Yawɛ ŋun daa nam zuɣusaa ka zali dunia ŋɔ tanzaa la yɛla. Bɔzuɣu ka yi kul zɔri ninvuɣ’ shɛb’ bɛn suhuri yiɣisi, ka bɛ nahindi ya ka bɔri ni bɛ kun ya la dabiɛm? Bɛ suhuyiɣisili maa ku tooi niŋ ya shɛli.

14Di ku yuui ka ninvuɣ’ shɛb’ bɛn be sarika ni maa nya yolisim. Bɛ ku kpi, bindirigu mi ku pooi ba.

15“Mani n-nyɛ Yawɛ ŋun nyɛ yi Naawuni ŋun chɛ ka teeku kɔgbana puɣiri luri yɔri vuri. N yuli n-nyɛ Yawɛ ŋun nyɛ Tɔbbihi Naa.

16N zaŋ n yɛligu niŋ a nol’ ni, ka zaŋ a niŋ n nuu mahim ni. Mani n-nyɛ ŋun daa nam zuɣusaa, ka nam tiŋgbani ŋɔ. N yɛli Ziɔnnima, “Yi nyɛla n niriba.”

17Jɛrusalɛmnima, neemiya, neemiya! Yiɣisimiya zani. Yi nyu Yawɛ ni zaŋ o suhuyiɣisili tibidarigibo binnyur’ shɛl’ la buɣi. Yi nyu li, ka di chɛ ka yi chani laana.

18Yi ni dɔɣi bi’ shɛb’ zaa puuni, so kani n-nyɛ ŋun ni tooi wuhi ya soli. So mi ka yi ni wumsi bi’ shɛb’ maa zaa puuni n-nyɛ ŋun ni tooi vɔn ya.

19Yɛl’ biɛr’ ayi n-yɛn paai ya; ka ŋuni n-lee yɛn fabili sɔŋ ya? Yi tiŋgbɔŋ ni wurim, ka kum lu yi zuɣu, ka ŋuni n-lee yɛn maai yi suhuri?

20Yi niriba ŋmanila zana ni gbahi kparibu’ shɛba. Bɛ kul gbarigimi do sochira kam zuɣu. Bɛ nyula Yawɛ suhuyiɣisili mini Naawuni tibidarigibo buɣi.

21Dinzuɣu yinim’ bɛn diri wahala Jɛrusalɛm, ka buɣi ka di pala wain ka yi nyu ŋɔ, wummiya!

22Yawɛ ŋun nyɛ yi Naawuni, ka nyɛ ŋun zabiri yi zuɣu la yɛliya, “Nyamiya, n ni vuui n ni zaŋ n suhuyiɣisili binnyuri shɛli tin ya la. Yi ku lan nyu li n suhuyiɣisili pipia maa ni n-chani laana.

23N ni zaŋ li tila ninvuɣ’ shɛb’ bɛn nahindi ya la. Bɛ nyɛla bɛn daa pun yɛli ya, “ Teemiya dɔni ka ti du n-tam yi zuɣu n-nɔri ya chani kaman tiŋgbani n-nyɛn ya la.”

← Chapter 50 Jump to: Chapter 52 →