Isaiah 45

Dagbani Bible (Naawuni Kundi Kasi)

← Chapter 44 Jump to: Chapter 46 →

1Ka Yawɛ daa yɛli Sairus ŋun nyɛ o ni pii so la, N niŋ a yiko ni a tuhi nyaŋ zuliya kam, ka fa nanim’ yaa. N ni yooi dunoli kam ti a, ka bɛ ku kpari duno’ shɛli.

2N ni be a tooni, ka dahim zoya ti a. N ni kabi daanya dunoya ti a, ka kabi dunoya ni kuriti ti a.

3N ni zaŋ azichi shɛli din be zibisim ni mini ashili shee ti a. Ka di chɛ ka a baŋ ni man’ Yawɛ ŋun nyɛ Izraɛl Naawuni ŋɔ m-bol’ a yuli.

4Hal a ni kul bi mi ma ŋɔ zaa yoli, mani m-piig’ a ni a sɔŋ n daba Izraɛlnim’ bɛn nyɛ n ni pii shɛb’ la. Mani m-bol’ a yuli.

5Mani n-nyɛ Yawɛ, ka Naawuni so kani pahi n zuɣu. Hal a ni bi mi ma maa zaa yoli, n ni ti a yaa.

6N niŋla lala ni di chɛ ka niriba bɛn be wulimpuhili mini wulinluhili polo baŋ ni so kani pahi n zuɣu. Mani n-nyɛ Yawɛ, ka so bi lan pahi n zuɣu.

7Mani n-nam neesim mini zibisim, mani n-tahiri alibarika na, ka lan tahiri tɔbu na. Man’ Yawɛ n-niŋdi dimbɔŋɔnim’ zaa.

8Zuɣusaa, chɛ ka wuntia luna kaman saa la. Chɛ ka tiŋgbani bɔɣi, ka tiliginsim yina; ka chɛ ka wuntia gba yina; Man’ Yawɛ n-nam li.

9Mbusim be ninvuɣ’ so ŋun ŋmɛri ŋun nam’ o naŋgbankpeeni zuɣu. Yaɣiri ni tooi bɔhi yaɣimɛra, “Bɔ ka a lee mɛra”? bee m-bɔh’ o, “A niŋ nuhi niŋ ma?”

10Ninvuɣ’ so ŋun bɔh’ o ba, “Bɔ n-niŋ ka a daa dɔɣi ma lala?” bee m-bɔh’ o ma, “Bɔ ka a daa wolisi dɔɣi?” Mbusim be dilan’ zuɣu.

11Man’ Yawɛ ŋun nyɛ Izraɛlnim’ Naawuni ŋun be kasi ni ŋun nam ba la yɛliya, “Yi ni tooi bɔhi ma bɔhigu zaŋ chaŋ m bihi polo? Bee n-wuhi ma di ni simdi ni n niŋ shɛm?

12Mani n-daa nam dunia ŋɔ, ka nam ninsalinim’ niŋ di ni. N nuhi ka n daa zaŋ nam zuɣusaa, ka su binshɛɣukam din be nimaani fukumsi.

13Mani n-yiɣisi Sairus n wuntia puuni. N ni mal’ o soya ka di tuhi. O ni me n tiŋ’ la, ka ti n niriba yolisim. O bi yɛn niŋ li ka deei shɛli.” Man’ Yawɛ ŋun nyɛ Tɔbbihi Naa ŋɔ n-yɛli lala maa.

14Yawɛ lan yɛli, “Ijiptinim’ mini Itiɔpianim’ azichi ni leei yi dini. Ka Sabi dɔbba bɛn wɔɣawɔɣa la ni lee yi daba. Yi ni zaŋ zoligɔnim’ niŋ bɛ nuhi ni ka bɛ doli ya. Bɛ ni gbani yi tooni ka yɛli, ‘Naawuni be yi sani. Naawun’ so lan kani pahi o zuɣu. O kɔŋko n-nyɛ Naawuni.

15Yɛlimaŋli, Izraɛl Naawuni ŋun nyɛ tiligira ŋɔ, nyini n-nyɛ Naawuni ŋun sɔɣ’ amaŋa.

16Ninvuɣ’ shɛb’ bɛn mɛri wuna ni birim. Di ni gari bɛ zaa, ka bɛ di vi.

17Amaa Yawɛ tiligi Izraɛlnima, ka di nyɛ tiliginsim din ku naai; ka bɛ kul ku lan di vi yaha.’ ”

18Yawɛ ni yɛl’ shɛm m-bɔŋɔ: Ŋuna ŋun nam zuɣusaa ŋɔ n-nyɛ Naawuni. Ŋuna n-daa buɣisi dunia ŋɔ, ka nam li. O daa kul nam li la viɛnyɛliŋga zali. O mi daa bi nam li ni di kul doya zaɣ’ nɛli ka ka buchi, amaa o daa nam li mi ni niriba be di ni. Mani n-nyɛ Yawɛ, ka so kani pahi n zuɣu.

19N daa bi tɔɣisi yɛtɔɣa ashilɔni bee bumbɔn’ ni. N daa bi yɛli Izraɛlnim’ ni bɛ bom’ ma luɣ’ shɛli din ka nyam shee. Mani n-nyɛ Yawɛ, n tɔɣisirila yɛlimaŋli, ka wuhiri din tuhi.”

20Laɣimmiya tab’ na. Yinim’ ninvuɣ’ shɛb’ bɛn kpalim zaa, vumiya mirina. Ninvuɣ’ shɛb’ bɛn buɣiri bɛ wuna din nyɛ dari ginda, ka jɛmdi wuna din ku tooi tiligi ba la nyɛla bɛn be ʒilinsi ni.

21Zaŋmiya yi yɛtɔɣa maa tahi ʒiishee; ka chɛ ka bɛn yɛn tɔɣisi zab’ bɛmaŋ’ zuɣu niŋ tab’ saawara! Ŋuni n-daa lee pun yɛli din yɛn niŋ yɛla zali? Pa man’ Yawɛ ŋun nyɛ Naawuni ŋun nyɛ wuntialana ka tiligir’ o niriba ŋɔ n-daa yɛl’ li zali? Naawuni so mi kani pahi n zuɣu.

22“Dunia ŋɔ daadamnim’ zaa, kamiya n sanna ka n tiligi ya! N kɔŋko n-nyɛ Naawuni ka so kani pahi n zuɣu.

23N ŋmaligi pola mmaŋa, n yɛligu nyɛla yɛlimaŋli; di bi taɣira. Sokam ni ti kana ti gbani n tooni, ka po pɔri ni bɛ ni ʒe ma yim.

24“Bɛ ni ti yɛli, Kulla Yawɛ kɔŋko sani ka wuntia ni kpiɔŋ be. Amaa ŋunkam zaa je ma ni di vi.

25Izraɛl zuliya zaa ni ti di nasara man’ Yawɛ zuɣu ka paɣi ma.”

← Chapter 44 Jump to: Chapter 46 →