Isaiah 55

Dagbani Bible (Naawuni Kundi Kasi)

← Chapter 54 Jump to: Chapter 56 →

1Heei! Kɔnyuri ni mali sokam, ŋun’ kam’ kom ŋɔ gbin’ na! Ka yinim’ bɛn mi ka liɣiri, kamiyana ti da bindirigu di! Kamiyana ti da wain mini bihim nyu ka di yɔnya shɛli!

2Bɔ n-niŋ ka yi kuri yi liɣiri binshɛli din pa bindirigu zuɣu, ka tumdi tuma din ku tiɣi ya zuɣu? Wummiya n yɛligu viɛnyɛliŋga, ka dinya din viɛla ni bindir’ suma ni yɛlimaŋli.

3Luɣimiya yi tiba wum ka kanya n sanna. Wummiya n yɛligu, ka tiligi. N ni lɔn ya alikauli shɛli din ku yiɣisi, ka niŋ ya nirilim shɛli n ni daa lo alikauli ni n ni niŋ Dauda la.

4Nyama, n daa zaŋ o leela shɛhira niriba sani. Ka lan zaŋ o leei niriba toondana ni tɔbbihi zuɣulana.

5Nyama, yi ni ti boli ninvuɣ’ shɛb’ bɛn ʒin ya, ka ninvuɣ’ shɛb’ bɛn ʒin ya ti zo n-ka yi sanna. Yawɛ ŋun nyɛ yi Naawuni ŋun nyɛ Izraɛl Naawuni ŋun be kasi ŋɔ ni tibigi ya shɛm la zuɣu.

6Bomiya Yawɛ saha shɛli yin’ ni nya o. Suhimiy’ o saha shɛli o ni miri ya.

7Alahichinima chɛli bɛ daalahichi soli, ka ninvuɣ’ biɛri chɛ bɛ tɛhi’ biɛri, ka ka Yawɛ ŋun nyɛ ti Naawuni ŋɔ sanna ka o ti zo ba nambɔɣu, dama o ni chɛ bɛ taali zaa.

8Dama Yawɛ yɛliya, “N tɛha pala yi tɛha, ka yi soya mi pala n soya.

9Zuɣusaa mini tiŋgbani ni wɔɣ’ ni tab’ shɛm, lala ka n soya be di ko ka chɛ yi soya, ka n tɛha gba be di ko ka chɛ yi tɛha.

10Saa mini sakuɣa ni yiri zuɣusaa lurina, ka bi lan labiri zuɣusaa amaa ka mahigiri tiŋgbani n-chɛ ka bindira bimbira tɔri yirina n-zoori niŋdi bindira tiri bindiridiriba, ka niŋdi bimbira tiri bɛn biriti shɛm la,

11lala ka n yɛligu shɛli din yiri n nol’ ni na gba ku labi n sanna yoli. Di ni tum n ni lo ni di tum shɛli. Ka di nasara n ni tim li ni di ti tum shɛm puuni.

12Yi ni ti yi n-chaŋ ni suhupiɛlli, ka ti lab’ kuli ni suhudoo. Zoya mini kunkuna ni ti yili yila ni suhupiɛlli, ka mɔɣu ni tihi mi ti kpahi di nuhi.

13Siprɛs tihi ni ti bili zani gɔhi zaashee. Ka ti’ shɛli bɛ ni booni mitil la mi ti bili suligunyinyari zaashee. Dina nti yɛn nyɛ Yawɛ shihirili shɛli din ni beni sahakam ka ku vuui.”

← Chapter 54 Jump to: Chapter 56 →