Isaiah 43

Dagbani Bible (Naawuni Kundi Kasi)

← Chapter 42 Jump to: Chapter 44 →

1Amaa pumpɔŋɔ, Izraɛlnima, Yawɛ ŋun nam ya ŋɔ yɛliya, “Di zɔriya dabiɛm, n ni tiligi ya. M bolila yi yuli, mani n-sun ya.

2Yi yi kpe kom puuni ni yi gari, n ni be yi sani, ka yi yi siɣila mɔɣa ni, di ku niŋ ya shɛli. Ka yi yi kpɛla buɣim ni, di ku din ya; di buɣim niɛm ku tooi din ya.

3Mani n-nyɛ Yawɛ ŋun nyɛ yi Naawuni maa. Izraɛl Naawuni ŋun be kasi ŋɔ n-nyɛ yi tiligira. N ni zaɣisi Ijipti mini Itiɔpia ni Siiba, ka tiligi ya.

4Yi ni nyɛ n ninvuɣ’ gahinda, ka n tiri ya jilima, ka yuri ya la zuɣu, n ni zaɣisi zuliya pam niriba, ka tiligi ya.

5M be yi sani, di zɔriya dabiɛm. N ni laɣim yi zuliya bɛn be wulimpuhili polo ni wulinluhili polo zaa na.

6N ni yɛli nuzaa polo nim’ ni bɛ bahimi ba ka bɛ kuna; ka yɛli nudirigu polo nim’ ni bɛ di gbibi ba. Chɛliya ka m bidibisi bɛn be katiŋ’ ha kuna, ka chɛ ka m bipuɣinsi bɛn be dunia luɣa anahi ŋɔ ni zaa kuna.

7Bɛna bɛn zaa nyɛ n niriba maa, mani n-daa nam ba n jilima zuɣu. Bɛ nyɛla n ni nam shɛba.”

8“Zaŋmiya ninvuɣ’ shɛb’ bɛn mali nina ka nyɛ zoomba la na, ka zaŋ ninvuɣ’ shɛb’ bɛn mali tiba ka nyɛ tikpiranim’ la na.

9Zaŋmiya zuliya kam na, ka chɛ ka niriba laɣimna. Bɛ ni ŋuni m-pun yɛl’ ti dimbɔŋɔ yɛla, ka yɛl’ ti kurimbuni ha yɛla zali? Bɛ zaŋm’ bɛ shɛhiranim’ na ka bɛ ti zani bɛ nyaaŋa, ka chɛ ka bɛ wum ka yɛli ni di nyɛla yɛlimaŋli.

10Yawɛ yɛliya, “Yinima n-nyɛ n shɛhiranima, ka nyɛ n ni pii n dab’ shɛba ni di chɛ ka yi baŋ ka niŋ ma yɛda. Ka lan baŋ ni mani n-nyɛ Naawuni. Naawuni so ka n tooni, ka so mi ka n nyaaŋa.

11“Mani n-nyɛ Yawɛ, ka tiligira so lan kani pahi n zuɣu.

12Yawɛ yɛliya, Mani n-daa yɛli zali, ka di ti niŋ. Tinzun wun’ so na ʒi n-niŋ lala. Yinima n-nyɛ n shɛhiranima.

13Mani n-nyɛ Naawuni, ka pumpɔŋɔ zaŋ chana, mani n-kul nyɛ Naawuni. So ku tooi fa nira n nuu ni bahi; so ku tooi gu n ni yɛn tum shɛli soli.”

14Yawɛ ŋun nyɛ Izraɛl Naawuni ŋun be kasi, ka nyɛ yi tiligira la ni yɛli shɛm m-bɔŋɔ: “Yi zuɣu, n ni tim Babilɔn nti ŋme n-kab’ bɛ dunoya zaa, ka chɛ ka bɛ niriba tahigu leei kumsi.

15Mani n-nyɛ Yawɛ ŋun nyɛ yi Naawuni ŋun be kasi. Mani n-nam yinim’ Izraɛlnima, ka nyɛ yi naa.”

16Yawɛ yɛliya, “N daa chibi soli teeku ni, ka daa ŋme solɔɣu sɔŋ kom pam puuni.

17N daa zaŋ tɔbbihi bɛn mali chɛchɛbunsi ni yuri n-kana ti ku ba. N daa ŋme ba luhi ka bɛ kɔŋ yiɣisibu. N daa pɔbisi ba mi bahi kaman bɛ ni pɔbisiri kpihiri firila mia buɣim shɛm la.

18Di teeri ya binshɛŋa din daa niŋ ka di yuui yɛla bee n-lihiri binshɛŋa din daa pun niŋ kurimbuni ha la.

19Nyamiya, n yɛn tumla tuun’ pala. Di niŋdi pumpɔŋɔ gba; yi bi nya li? N yɛn ŋmɛla soli sɔŋ mɔɣu ni, ka chɛ ka mɔɣa dɔni tiŋgban’ nɛl’ ni.

20Mɔɣu ni biŋkɔbiri ni paɣi ma. Hal yɔbahi mini taatahi gba ni paɣi ma, dama n ni chɛ ka mɔɣa dɔni tiŋgban’ nɛl’ ni n-ti n ni pii ninvuɣ’ shɛb’ la kom ka bɛ nyu.

21Bɛ nyɛla n ni nam shɛb’ ti mmaŋa, ka bɛ kul ni yiini yila paɣiri ma!”

22“Amaa Izraɛlnima, yi nyee daa nyɔni ma mi, ka yi daa bi lan jɛmdi ma.

23Yi daa bi zaŋ piɛri na nti mali sara nyo buɣim ti ma jilima. M bi muɣisi ya ni yi zaŋ sara maligunim’ na ti ti ma. M mi bi muɣisi ya ni yi zaŋ tulaale zim na ti tuɣili ti ma.

24Yi bi da tulaale viɛlli ti ma bee n-zaŋ yi sara maligu biŋkɔbiri kpam ti ma. Amaa yinim’ lee chɛmi ka yi daalahichi yɛla muɣisi ma, ka chɛ ka n nyee nyɔni yi tuumbiɛri.

25Amaa mani n-nyɛ Naawuni ŋun kpihindi yi daalahichi. Mmaŋmaŋ’ zuɣu ka n niŋdi lala maa. N ku lan teei yi daalahichi maa yɛla.

26“Ti chamiya ʒiishee ka yi ti wuhi ma yi ni zaŋ ma taali shɛli zuɣu, ka yi zaŋ yi ni mali yɛtɔɣ’ shɛli ni yi tɔɣisi wuhi ni yi mali yɛlimaŋli na.

27Yi tuuli yabidoo daa tum alahichi, ka yi yɛtɔɣ’ tɔɣisiriba tum alahichi n sani.

28Dinzuɣu ka n ta yi nanim’ bɛn be n sara maligu shee daɣiri, ka chɛ ka yɛl’ biɛɣu paai Yaakubu zuliya, ka chɛ ka bɛ tu Izraɛlnima.”

← Chapter 42 Jump to: Chapter 44 →