Isaiah 56

Dagbani Bible (Naawuni Kundi Kasi)

← Chapter 55 Jump to: Chapter 57 →

1Yawɛ yɛliya, “Doli yɛlimaŋli soli ka tummi din tuhi, dama di ku yuui ka n tiligi ya.

2Ninvuɣ’ so ŋun niŋdi dimbɔŋɔ ka gbib’ li viɛnyɛliŋga ni nya alibarika. Ŋunkam gbibi Vuhim Dabisili viɛnyɛliŋga ka bi saɣim li, ka mi bi tumdi din bie ni nya alibarika.”

3Di bi simdi ni tinzun’ nir’ ŋun niŋ Yawɛ yɛda ti yɛli, “Yawɛ ku saɣi ka m pah’ o niriba ŋɔ ni.” Di mi bi simdi ni namɔɣili ti yɛli, “ Man’ nyɛla ti’ kuŋ.”

4Dama Yawɛ yɛliya, “Namɔɣili so ŋun gbibi n vuhim dabisa, ka niŋdi din tiɣiri n nini, ka gbibi n daalikauli,

5n ni niŋ binshɛli din ni teer’ o yɛla zali n jɛmbu duu ni n niriba sunsuuni, ka ti o yuli din gari bidibisi mini bipuɣinsi. N ni ti o yu’ shɛli din kul ni beni sahakam ka ku kpi.”

6Ka tinzunnim’ bɛn zaŋ bɛmaŋ’ tabili Yawɛ ni bɛ tumd’ o tuma, ka yur’ o, ka nyɛ o daba bɛn zaa gbibi Vuhim Dabisili ka bi saɣindi di zaligunima, ka gbibi n daalikauli viɛnyɛliŋga,

7n ni zaŋ ba na ti niŋ n zoli din be kasi la zuɣu, ka ti ba suhupiɛlli n wunsuhigu duu, ka deei bɛ ni zaŋdi sara shɛli nyɔri buɣim la mini bɛ ni maani sara shɛŋa n sara maligu bimbini zuɣu la. Dama bɛ ni booni n jɛmbu duu la zuliya kam zaa wunsuhigu duu.

8Yawɛ ŋun nyɛ ti Duuma ŋɔ yɛliya, “Mani ŋun laɣim Izraɛlnim’ bɛn daa be yɔɣu la na ni laɣim zuliya shɛb’ na ti pahi bɛ zuɣu.”

9Yinim’ mɔɣu ni biŋkɔbiri bɛn zaa be nyɔŋ puuni, kamiyana ti gbahi di.

10Bɛn guli Izraɛlnim’ zaa nyɛla zoomba, bɛ ka baŋsim. Bɛ ŋmanila ba’ shɛb’ bɛn doya gbihiri ka bi wahira. Bɛ kul domi gbihiri ka zahindi zahima.

11Bɛ ŋmanila ba’ shɛb’ bɛn nyɛ diribarilimnima ka bi diri tiɣiri la. Zuɣulaannim’ ŋɔ gba ka baŋsim. Bɛ zaa dolila bɛ suhuyubu soli, ka kul niŋdila din ni sɔŋ bɛmaŋmaŋ’ kɔŋko.

12Bɛ kul yɛrimi, “Kamiyana ka ti nyu wain; chɛliya ka ti nyu binnyuri kpɛma. Biɛɣuni sa ni be kaman zuŋɔ, hal di sa ni gari lala gba.”

← Chapter 55 Jump to: Chapter 57 →