Isaiah 48

Dagbani Bible (Naawuni Kundi Kasi)

← Chapter 47 Jump to: Chapter 49 →

1Yaakubu zuliya bɛn nyɛ bɛ ni boli shɛb’ Izraɛlnima, ka yi yi Juda zuliya ni na la, wummiya! Yawɛ yuli ka yi mali pɔri pɔri, ka yɛri ni yi jɛmdila Izraɛl Naawuni, amaa ka lee bi jɛmd’ o ni yɛlimaŋli ni wuntia.

2Yi nyuri bari yɛra, “Ti nyɛla tiŋ’ kasi la tiŋbihi, ka zaŋ timaŋ’ dalim Izraɛl Naawuni ŋun nyɛ Yawɛ ŋun nyɛ Tɔbbihi Naa ŋɔ.

3Kurimbuni ha ka n daa yaai n noli yɛli yɛl’ shɛŋa yɛla zali, ka kahigi li wuhi, ka di daa bi yuui, ka n chɛ ka di niŋ.

4Dama m mi ni yi nyɛla tipawumlinima, ka yi nyiŋgoya kpɛm’ gari kurigu, ka yi gbɛri mi be kaman daanya la.

5M pun yɛli ya di yɛla zali ka di wɔɣa pɔi ka di naanyi ti niŋ maa ni di chɛ ka yi ku tooi yɛli ni yi wuna bee yi dari binnana mini anzinfa binnana n-niŋ li.

6“N ni daa pun yɛli ya shɛlikam zaa la niŋya, ka yi ni saɣi yɛli ni n ni daa yɛli shɛm maa nyɛla yɛlimaŋli. Pumpɔŋɔ n yɛn yɛli ya la yɛl’ pala, di nyɛla ashili yɛl’ shɛŋa yi ni na ʒi.

7Kulla pumpɔŋɔ ka n nam yɛla maa. Zuŋɔ dabisili ŋɔ ka yi wum di yɛla maa; dinzuɣu yi ku tooi yɛli ni yi pun mi li.

8Yi na ʒi n-wum di yɛla bee m-mi li. Piligu ni ha ka yi pun nyɛ tipawumlinima. Dama m mi ni yi ni tum yɛŋkiŋkabina tuma, ka lan mi ni yi bilim ni ha ka yi pun nyɛ duŋtaariba.

9“N yuli zuɣu ka n chɛ ka n suhu bi yiɣisi. M paɣibu zuɣu ka n gbaai mmaŋa ni di chɛ ka n ku kun ya.

10Nyamiya, n paɣimi neei ya zaa. Pa bɛ ni paɣiri anzinfa shɛm la, amaa wahala ka n zaŋ buɣisi ya.

11N yuli zuɣu ka n niŋ li. N ku chɛ ka bɛ galim n yuli maa. N ku zaŋ n jilima ti so.”

12Izraɛlnim’ bɛn nyɛ n ni boli shɛb’ la, wummiya! Mani n-nyɛ Naawuni; Mani n-nyɛ piligu. Mani n-nyɛ naabu.

13N nuu ka n daa zaŋ nam dunia ŋɔ, ka zaŋ n nudirigu teei sagbana pa zuɣusaa. N yi yɛli ni di niŋ shɛli, di tiɣisirimi zani niŋ li.

14Yi zaa laɣimmiya na nti wum! Wun’ ŋuni n-lee pun yɛli dimbɔŋɔnim’ yɛla zali? Yawɛ ni pii ninvuɣ’ so la ni niŋ o ni lo ni o niŋ Babilɔnnim’ shɛm. O ni tuhi Babilɔnnim’ maa.

15Mani n-yɛli lala maa. Iin, mani m-bol’ o. Mani n-zaŋ o na, ka o mi ni di nasara o tuma ni.

16Mirimiya ma na ti wum n ni yɛn yɛli ya shɛm. Piligu ni zaŋ kana, n na ʒi n-yɛli shɛli ashilɔni. N daa pun beni ka yɛlli ŋɔ na bi niŋ. Pumpɔŋɔ Yawɛ ŋun nyɛ ti Duuma ŋɔ n-zaŋ o shia niŋ n ni n-tim ma.

17Yawɛ ŋun nyɛ Izraɛl Naawuni ŋun be kasi ka nyɛ yi tiligira la yɛliya, “Mani n-nyɛ Yawɛ ŋun nyɛ yi Naawuni. N nyɛla ŋun wuhiri ya din ni niŋ ya zaɣ’ viɛlli, ka lan wuhiri ya yi ni yɛn doli so’ shɛli.

18Yi yi di daa pun doli n zaligunima, yi naan nya alibarika, ka di be kaman kɔzɔrim din bi ŋmaara. Ka yi nasara dibu mi be kaman teeku kɔgbana la.

19Yi zuliya mini yi bihi galisim naan ŋmanila mɔɣ’ bihigu; ka n naan ku chɛ ka bɛ birili kpihim hal baabiɛla gba.

20Yimiya Babilɔn; zomiya ka chɛ ba. Tahimiya suhupiɛlli tahigu n-yɛli di yɛla. Ka mol’ li ka dunia ŋɔ luɣ’ shɛlikam zaa nim’ wum li. Yɛlimiya, “Yawɛ tilig’ o dabili Yaakubu zuliya.”

21O ni daa zaŋ ba kpe tiŋgban’ nɛl’ la ni chana, o daa bi chɛ ka bɛ kpi kɔnyuri. O daa chɛ ka tampiŋ bɔɣi ka kom yi di ni na ka bɛ nyu.

22Yawɛ yɛliya, “Ninvuɣ’ biɛri ku nya suhudoo.”

← Chapter 47 Jump to: Chapter 49 →