Isaiah 50

Dagbani Bible (Naawuni Kundi Kasi)

← Chapter 49 Jump to: Chapter 51 →

1Yawɛ yɛliya, “Yi tɛhiya ni n daa chɛ ka n niriba maa chaŋmi kaman doo ni yihiri o paɣ’ shɛm la? Bee yi tɛhiya ni n daa chɛmi ka yi leei daba kaman nir’ ni zaŋd’ o bihi kɔhiri ka bɛ leeri daba shɛm la? Aai, yi daalahichi tumbu zuɣu n-chɛ ka yi leei daba. Yi tuumbiɛri tumbu zuɣu n-chɛ ka bɛ daa gbahi ya chaŋ ti leei daba.

2“Bɔ n-niŋ ka n daa ka yi sanna nti bi nya so? Bɔ n-niŋ ka n daa kuhi boli ya ka so bi saɣi? N kala yiko din ni tooi tiligi ya? Bee n kala yaa din ni tooi fan ya bahi. N ni tooi chɛ ka teeku kom nyuui, ka chɛ ka mɔɣa leei tiŋgban’ nɛli, ka kɔnyuri ku di puuni zahim ka bɛ pooi nyɔni.

3N ni tooi chɛ ka sagbana sabigi libilibi kaman di kumdila so kuli la.”

4Yawɛ ŋun nyɛ ti Duuma ŋɔ ti ma noli din ni tooi wuhi niriba ni di chɛ ka n tooi kpaŋsi bɛn gbarigi suhuri. O neeri ma la asiba kam, ka yoori n tiba ni n wum kaman ninvuɣ’ so ŋun deeri wuhibu.

5Yawɛ ŋun nyɛ ti Duuma ŋɔ yooi n tiba, ka m mi bi niŋ tipawumli bee n-lab’ nyaaŋa.

6N daa chɛ n yaaŋa ti ninvuɣ’ shɛb’ bɛn buri ma, ka chɛ n jira ti ninvuɣ’ shɛb’ bɛn dariti sibiri n teeŋkɔbiri. M mi daa bi ŋmaligi n nini bahi kpaŋ’ ka chɛ ninvuɣ’ shɛb’ bɛn maani ma ansarisi bee bɛn tuhiri nintɔri viɛri ma.

7Yawɛ ŋun nyɛ ti Duuma ŋɔ ni sɔŋdi ma zuɣu, n ku di vi. Dinzuɣu ka n zuɣu ʒe ya. M mi ni n ku di vi.

8Ŋun yɛn zani n nyaaŋa mirina. Ŋuni n-lee ni tooi wuhi n taali ni nyɛ shɛli? Ŋuni n-lee nyɛ ŋun fiɣisiri ma maa? O chɛ ka m min’ o chaŋ ʒiishee, ka ti gbɛri ti kpa taba.

9Yawɛ ŋun nyɛ ti Duuma ŋɔ n-nyɛ n sɔŋda ka ŋuni n-lee ni tooi wuhi ni m mali taali? Bɛ zaa ni kpi kaman siturili la. Lɛla ni ŋub’ ba zaa.

10Ŋuni n-lee be yi ni n-zɔri Yawɛ, ka deeg’ o dabili noli? Ŋun be zibisim ni ka neesim ka o sani, o niŋmi Yawɛ naani, ka zaŋ omaŋ’ dalim o Naawuni.

11Yinim’ bɛn zaa lo nia biɛri ni yi saɣim yi tab’ la, yi nia biɛri maa ni ŋmaligi din ya. Man’ Yawɛ ni chɛ ka dimbɔŋɔ niŋ ya. Yi bahigu ti ku viɛla.

← Chapter 49 Jump to: Chapter 51 →