Proverbs 10

Guarani MBYA (Nhanderuete ayvu iky'a e'ỹ va'e)

← Chapter 9 Jump to: Chapter 11 →

1Ta'y kuery hi'arandu va'e ombovy'a 'rã nguu, ha'e rã ta'y kuery hi'arandu e'ỹ va'e ma omomboriau 'rã oxy.

2Mba'emo jajejavya rupi jajou va'e ma mba'everã ndovarei, ha'e rã teko porã ma nhandereraa jepe 'rã manoa gui.

3Senhor ndoejai 'rã heko porã va'e karuai oendu oikovy aguã, ha'e rã heko vai va'e ma Senhor ojoko 'rã oipotapa rei va'e ojou e'ỹ aguã.

4Inhate'ỹa rupi omba'eapo va'e ndojoui 'rã mba'eve, ha'e rã ikyre'ỹa rupi omba'eapo va'e ma ojou-jouve 'rã oipota va'e.

5Kuaray aku porã jave ta'y hi'arandu va'e omono'õ 'rã mba'emo, ha'e rã mba'emo omono'õa ára py oke rive va'e ma omoxĩmba rei 'rã nguu kuery.

6Heko porã va'e akã re oĩ 'rã imoingo porãarã, ha'e rã heko vai va'e ma nhomoingo vai aguã rupi anho ijayvu.

7Heko porã va'e re nhanema'endu'aa ma nhanemoingo porã 'rã, ha'e rã heko vai va'e rery re nhanema'endu'aa ma mba'emo ru'ũgue rami rive.

8Opy'a py hi'arandu va'e omoĩ porã 'rã ojapo uka pyre, ha'e rã o'arandua rupi e'ỹ ijayvu va'e ma oĩ vai 'rã.

9Anhetẽ rupi ikuai va'e oĩ atã 'rã, ha'e rã tape karẽ rupi ikuai va'e re ma oikuaa potaa 'rãe.

10Nhombotavya rupi oxapymi-pymi va'e ma nhomomboriau va'e vy, o'arandua rupi e'ỹ ijayvu va'e oĩ vai 'rãe.

11Heko porã va'e ayvu ma tekove me'ẽa ae, ha'e rã heko vai va'e ma jojuka aguã rupi anho ijayvu.

12Mborayvu rupi e'ỹ ikuai va'e nhomopu'ãmba rei 'rã. Ha'e rã porayvu va'e ma ojao'i uka 'rã ojejavya ague.

13Oiko kuaa va'e ijayvu rã nhaendu vy jajou 'rã nhane'arandurã, ha'e rã hi'arandu e'ỹ va'e ma oinupãa aguã rami ikuai.

14Hi'arandu va'e omoĩ porã 'rã 'arandua, ha'e rã heko vai va'e ma onhemokanhy uka aguã rupi rive ijayvu.

15Oguerekopa va'e ma omba'e rei-rei re oĩ atã, tetã ikorapa va'e py rami, ha'e rã iporiaukue'i ma ikuai axy 'rã mba'eve ndoguerekoia py.

16Heko porã va'e oikoague repy ma tekove, ha'e rã heko vai va'e ma ojejavyague repy ae 'rã ojou.

17Ombo'ea ague rami ikuai va'e ma tape tekove katy oo va'e rupi oje'oi, ha'e rã omongeta ague rupi e'ỹ ikuai va'e ma ha'eve e'ỹa katy 'rã oje'oi.

18Ijapu va'e ma opy'a re omoĩ 'rã joe nda'ija'eia, joekokue omombe'u merami rive va'e ma hi'arandu e'ỹ va'e ae.

19Ijayvu reta rei va'e ojejavy 'rãe, ha'e rã ayvu py ojejoko kuaa va'e ma oiko kuaa va'e vy ae.

20Heko porã va'e ayvu ma prata oiporavo pyre rami, ha'e rã heko vai va'e kuraxõ ma mba'erã ndovarei.

21Heko porã va'e ayvu ma teta omongaru va'e rami, ha'e rã hi'arandu e'ỹ va'e kuery ma omanomba rive 'rã, ndoikuaa potaxei rire.

22Senhor nhandereroayvu porã vy ojapo jajou-jouve aguã rami, neĩ peteĩve henda py nanhanemomboriaui 'rã.

23Hi'arandu e'ỹ va'e oikuaa ramo opa marã rei nhandekuaia rupi merami 'rã javy'a, ha'e rã avakue oikuaa ete va'e pe ma nhane'arandua rupi vy 'rãe javy'a.

24Heko vai va'e mba'emo gui okyjea va'e ae 'rã oiko hexe, ha'e rã heko porã va'e oarõ oikovya ma Nhanderuete ojapo 'rã ojeupity aguã rami.

25Yvytu vaikue opytu'u xapy'aa rami avi heko vai va'e kuery reko voi okanhy xapy'a 'rã, ha'e rã heko porã va'e ma oĩ atã riae 'rã.

26Nhaneraĩ pe vinagre nda'evei, ha'e nhanderexa pe ma hataxĩ nda'evei, ha'e rami ae inhate'ỹ va'e nda'evei avi ijokuaia pe.

27Senhor renonde jajererokyjea rupi vy jaikove puku 'rã, ha'e rã heko vai va'e ikuaia ma ijapy voi 'rã.

28Heko porã va'e oarõa ma ombovy'a 'rã, ha'e rã heko vai va'e oarõa ma oaxa rive 'rã.

29Senhor guigua tape ma anhetẽ rupi ikuai va'e onhemi aguã, ha'e rã heko vai va'e pe ma imombaarã rive oĩ.

30Heko porã va'e ma raka'eve rã peve ndoityai 'rã, ha'e rã heko vai va'e ma nomombytaai 'rã yvy re.

31Heko porã va'e ayvu nhomo'aranduve 'rã, ha'e rã ijayvu vaikue rei va'e ma omombaa 'rã.

32Heko porã va'e ayvu nhombovy'a 'rã, ha'e rã heko vai va'e ma ha'eve'ỹa rupigua re anho 'rã ijayvu.

← Chapter 9 Jump to: Chapter 11 →