Proverbs 31

Guarani MBYA (Nhanderuete ayvu iky'a e'ỹ va'e)

← Chapter 30 Jump to:

1Pova'e ayvu ma Massá pygua huvixave Lemuel ixy ombo'e vy ijayvuague regua.

2Xepi'a, mba'e pa aipoa'e 'rã ndevy, xepi'a xeryepy pyguare? Mba'e pa ndevy aipoa'e 'rã, xepi'a anhemboayvu ma voi va'ekue?

3Emboaxa rive eme nembaraetea kunhague mboae káuxa, emboaxa eme reikoa huvixave reitya kuery pe.

4Lemuel, nda'evei huvixave ha'e rami oiko aguã, nda'evei huvixave vinho oy'u oikovy aguã, neĩ iro va'e re rive yvatekueve ikuai aguã,

5rey'ua rupi rive lei gui nderexarai vy ojexavai rei'i va'e repya gui rejepe'a e'ỹ aguã.

6Iro va'e ma omano rai'i va'e pe anho 'rã nhame'ẽ, ha'e vinho ma ipy'a raxy va'e kuery pegua anho,

7ha'e kuery oy'u vy hexaraipa aguã iporiau reia re, ojexavai reia re riae ima'endu'a e'ỹ aguã.

8Ndeayvu ke ijayvu e'ỹ va'e repya rupi, openamby e'ỹ ikuai va'e ha'e javi repy aguã.

9Ha'evea rami ke ndeayvu renhomboayvua py, reikuaa pota porã aguã iporiaukue'i ha'e oipotapa rei'i va'e pytyvõa rupi.

10Mava'e nda'u ojou kuaa 'rã kunha hi'arandu va'e? Ha'e ramigua ma ita iporãve va'e gui voi ovareve va'e.

11Ha'e va'e re ime ojerovia 'rã okuraxõ py, ixupe ndoatai 'rã mba'emo repyrã.

12Ome pe ojapo vai rei 'rãgue py ojapo porã 'rã, ára nhavõ oikovea pukukue re.

13Ogueru 'rã vexa'i rague ha'e nhimbo, ha'e gui ovy'aa rupi 'rã omba'eapo opo py.

14Kanoã guaxu mba'emo rerua rami avi mombyry gui 'rã kunha va'e ogueru tembi'u.

15Pytũ rei teri reve opu'ã 'rã omongaru aguã ngoo pygua kuery, ha'e guembiguai kuery kunhague pe mba'emo ojapo uka 'rã.

16Mba'etyrã re oikuaa pota porã ma vy ojogua 'rã, uva renhoĩ onhotỹ 'rã omba'eapoague repykue re ojogua va'ekue.

17Kyre'ỹ py onhemonde vy omombaraete 'rã ojyva omba'eapo aguã.

18Mba'emo repyrã ojouxe ramo pyávy teĩ hataendy ndoguei.

19Okuave'ẽ 'rã nhimbo onhemama va'e re, opo rovai py hi'y re ojopy reve.

20Opo oipe'a 'rã ojexavai va'e ha'e oipota va'e kuery oipytyvõ aguã.

21Ha'e gui ngoo py ikuai va'e re oma'ẽ vy ndoguerokyjei 'rã yro'y vaipa teĩ, ao raku py peteĩ-teĩ onhemonde ramo.

22Kunha va'e ojapo avi 'rã onheovã aguã, ha'e onhemonde 'rã ao porã púrpura guigua py anho.

23Ime ma huvixa kuery omboete pavẽ 'rã, oyvy re ikuai va'e mongetaa kuery reve oguapy oiny ramo.

24Ta'yxy ma nhimbo porãgue gui ojapo 'rã aorã, ovende 'rã guive, ku'axã ma mba'emo vendea kuery peguarã voi.

25Ojee omoĩ va'e ma ombaraeterã ha'e omboetepy oiko aguã. Ha'e rami vy ko'ẽ rã guarã re ma ndojapura rei 'rã.

26'Arandu rupi 'rã ijayvu, ha'e joayvua rupi nhombo'e kuaa 'rã.

27Opena porã 'rã ngoo pygua kuery re, ha'e inhate'ỹ reiague re e'ỹ 'rã omongaru.

28Ha'e ramo imemby kuery opu'ãmba vy oxy pe “Ovy'a ete va'e” he'i 'rã okuapy. Ime voi oguerovy'a vy aipoe'i 'rã:

29“Kunhague hi'arandu va'e heta ikuai teĩ ndee ma pavẽ gui ne'aranduve va'e”, he'i 'rã.

30Onhemoporãa re ikuai va'e ojekore 'rã, onhemoatyrõa voi opa rive 'rã. Ha'e rã kunhague Senhor renonde ojererokyjea rupi ikuai va'e ma oguerovy'aa riae 'rã.

31Nhanema'endu'a porã 'rã opo py ojapo porãa re, pavẽ oendua py jarovy'a 'rã oiko porãa.

← Chapter 30 Jump to: