Proverbs 26

Guarani MBYA (Nhanderuete ayvu iky'a e'ỹ va'e)

← Chapter 25 Jump to: Chapter 27 →

1Hi'arandu e'ỹ va'e nda'eve ranhei nhamboete aguã, kuaray puku py yro'y apĩ ho'aa rami, e'ỹ vy mba'emo nhamono'õa ára py oky riae rã nda'eveia rami avi.

2Mba'e py e'ỹ joe ijayvu vaia oaxapa rive 'rã, guyra'i ha'e mbyju'i oveve jogueravya rami avi.

3Vakapi ma kavaju peguarã, juruxã ma mburika peguarã, ha'e rã yvyra rovi'i ma hi'arandu e'ỹ va'e kupe peguarã.

4Hi'arandu e'ỹ va'e embovai eme 'arandu e'ỹa rupi ijayvuague rami, ha'e va'e reko rami ndee voi reiko e'ỹ aguã.

5Hi'arandu e'ỹ va'e 'arandu e'ỹa rupi ijayvu rã rembovai 'rãe, ha'e ae oikuaapa va'e rami rive onhemoingo e'ỹ aguã.

6Hi'arandu e'ỹ va'e pe ri ayvu nhamombe'u uka vy jajexavai 'rã nhandepy rupi nhanhekyxĩ, e'ỹ vy veneno jay'u rivea rami avi.

7Hetyma rovaikue va'e oguata aguã nda'eveia rami avi arandu regua ayvu rupi hi'arandu e'ỹ va'e ijayvu aguã nda'evei.

8Hi'arandu e'ỹ va'e nda'eve ranhei nhamboete aguã, ita hepyve va'e mba'emo vaikue reiaty py omombo va'e rami avi.

9Oka'u va'e opo py juu rakãgue oguereko aguã nda'eveia rami avi arandu regua ayvu rupi hi'arandu e'ỹ va'e ijayvu aguã nda'evei.

10Hi'arandu e'ỹ va'e ha'e otekoavy rei va'e kuery omba'eapo aguã ojou va'e ma hapa va'e nhonhyvõmbaa rami avi.

11Hi'arandu e'ỹ va'e ijarakuaa e'ỹague rami ae ikuai va'e ma jagua ha'e ae ombojevyague py ju oo va'e rami avi.

12Rexa ma pa peteĩ ava ha'e ae oikuaa rami rive onhemo'arandu va'e? Ha'e va'e gui hi'arandu e'ỹve va'ekue oikuaave 'rã.

13Inhate'ỹ va'e ma aipoe'i: “Peteĩ guary oiko tape rupi, peteĩ guary oĩ tape'i py”, he'i rive 'rã.

14Inhate'ỹ va'e ngupa py itui va'e ma okẽ oĩa re ae ojevy-jevy va'e rami.

15Inhate'ỹ va'e hy'a py opo'ẽ teĩ ndogueru potai 'rã ojuru katy.

16Inhate'ỹ va'e ha'e ae oikuaa rami rive sete avakue ombovai porã kuaa va'e gui oikuaave merami 'rã.

17Jagua oaxa ovy va'e nambi re omoatã va'e ma joe rive oikuaa pota va'e reve joo rami.

18Inhakã porã e'ỹ va'e jojukaxe vy tata ha'e hu'y omombo rive va'e rami,

19ha'e rami ae ava oirũ ombotavypa rire teĩ “Xeroryai vy rima ha'e rami ajapo”, he'i va'e.

20Yxakã e'ỹ ramo tata ogue 'rã, ha'e rami ae avi ijayvu vaikue rei va'e ndoikoia py opytu'upa 'rã joguero'a rei va'e.

21Tapyĩgue ma tapyĩrã, ha'e yxakã ma tatarã oĩa rami avi ava ivai ja va'e ojapo 'rã joguero'a rei aguã rami.

22Ijayvu vaikue rei va'e ijayvua ma tembi'u hee va'e rami oguejy 'rã nhandepy'apy katy.

23Porayvua rupi merami ijayvu va'eri ipy'a re mba'emo vai anho oĩ va'e ma mba'emo ryru yapo guigua hi'áry rupi rive prata py onhovã mbyre rami avi.

24Porayvu vy e'ỹ ijayvu porã'i merami va'e ma opy'a re omoĩ 'rã nhombotavypa aguã rive.

25Ndereve ha'e va'e ijayvu porã'i teĩ erovia eme, mba'eta ipy'a re oĩ sete-kue otekoavy aguã.

26Ha'e va'e onhenhomi 'rã ndajoayvui reia jaikuaa e'ỹ aguã, teĩ jaikuaa pavẽ nho 'rã.

27Yvy jo'oare ho'a 'rã ha'ekue py ae, ha'e ita mbojerea áry ae 'rã ojere.

28Apu rupi rive ijayvu va'e ombojexavai 'rã hendua kuery, anhetẽ rupi e'ỹ ijayvu va'e ma nhomoingo axy 'rãe.

← Chapter 25 Jump to: Chapter 27 →