Proverbs 21

Guarani MBYA (Nhanderuete ayvu iky'a e'ỹ va'e)

← Chapter 20 Jump to: Chapter 22 →

1Yxyry rami huvixa py'a oĩ Senhor po py, mba'eta Senhor oipotaa rupi ae 'rã oguereko.

2Avakue pe rã ikuaia ha'e javi ha'evea rami meme, ha'e rami teĩ Senhor oikuaa pota 'rã ipy'a re.

3Senhor pe mymba nhame'ẽa gui oguerovy'ave 'rã nhandereko porãa ha'e ha'evea rami jajoguerekoa.

4Jejou porã reia ha'e opy'a py nhemboyvate reia ma heko vai va'e kuery pe rã tataendy rami teĩ jejavya meme.

5Oikuaa pota porãa rupi onhembopy'a va'e ojoupa 'rã, ha'e rã ojapura rei va'e ma iporiau 'rã.

6Apu rupi nhanhea'ã vy mba'emo jajoupa va'ekue ma opaa py ma mba'everã ndovarei 'rã, ha'e nhanembo'a 'rã manoa nhuã py.

7Heko vai va'e ma nhomoingo axyague py ae omombaa 'rã, teko porã rupi ndoikoxei rire.

8Ava otekoavypa rei va'e oikoa ma ikarẽ rei, ha'e rã heko porã va'e oikoa ma hi'yvi porã.

9Nhanderopy kunha ivai ja rei va'e reve nhaĩa gui ha'eveve 'rãgue oo apyte áry nhaĩ.

10Heko vai va'e opy'a re omoĩ 'rã mba'emo vai anho, neĩ nomboaxyi 'rã ngoo katy'igua voi.

11Jojojai rei va'ekue ombopagaa rã hi'arandu e'ỹ va'ekue oexa vy hi'arandu nho 'rã okuapy, ha'e hi'arandu va'e ombo'ea rã oiko kuaave 'rã.

12Heko vai va'e ngoo py ae ojapo va'e re Heko porã ete va'e oikuaa pota vy omokanhymba 'rã heko vaia rupi ae.

13Iporiaukue'i ojapukaia noendu potai va'ekue ma ha'e ju ojapukai rã noendu potaai avi 'rã.

14Mba'emo nhemi rupi amongue ome'ẽ rã nhomombytu'u 'rã ipoxy reiague gui, mba'emo oexaa py e'ỹ ome'ẽ rã nda'ipoxy reiavei 'rã.

15Ha'evea rami jajoguereko ramo heko porã va'e kuery ovy'a 'rã, ha'e rã heko vai va'e kuery ma onhemondyipa rei 'rã.

16Oiko kuaa rupi oikoa gui ojepe'a va'ekue ma omanogue ikuaia py 'rã opyta oupy.

17Vy'aa rive oguerovy'a va'ekue ma iporiaupa 'rã, vinho ha'e azeite ho'uxe riae va'e ma mba'eve ndojouvei 'rãe.

18Heko vai va'e ome'ẽa 'rã heko porã va'e rekovia, ha'evea rupi ikuai va'e 'rãgue py ha'eve e'ỹa rupi ikuai va'e ojexavai aguã.

19Kunha ivai rei ha'e ijayvu vaipa-ipa va'e reve nhaĩ 'rãgue py ha'eveve peteĩ yvy tekoa e'ỹa py nhaĩ.

20Hi'arandu va'e ro py oĩ 'rã imba'e rei-rei ha'e ho'u va'erã, ha'e rã hi'arandu e'ỹ va'e ma ha'e nunga mokanhymbaarã.

21Teko porã ha'e porayvua rupi ikuai va'e ojou 'rã tekove, teko porã ha'e omboetea aguã.

22Ojerovia rei va'e kuery retã kora re hi'arandu va'e ojeupi vy oitypa 'rã ha'e kuery onhemiaty ojeroviavea va'ekue.

23Ojuru py ijayvu aguã gui ojejoko va'e ma ojoko avi onhe'ẽ imoingo axyarã gui.

24Onhemboyvatea py ojejou porã rei va'e rery ma jojojai rei va'e. Ha'e kuery ma ojerovia rei ha'e nda'ija'ei rei va'e ae.

25Inhate'ỹ va'e omano 'rã mba'emo oikotevẽa py, opo py nomba'eapoxei rire.

26Mba'emo omoaruã rei va'e ma ko'ẽ nhavõ 'rã omoaruã, ha'e rã heko porã va'e ma ome'ẽ 'rã hakate'ỹ reve'ỹ.

27Heko vai va'e mba'emo ome'ẽ va'e ma jeguarua meme, otekoavypa rei reve ome'ẽ rã katuve ma.

28Joekokue ramigua rive omombe'u va'ekue okanhy 'rã, ha'e rã mba'emo oendu porã va'ekue mombe'ua ma nombovaia kuaai 'rã.

29Ava heko vai va'e ma ngova re voi oexa uka 'rã ipy'a ratãa, ha'e rã heko porã va'e ma oikuaa pota 'rã oiko aguã re.

30Senhor rovai rupi ma ndoikoi 'arandua, neĩ mba'emo kuaapa va'e, neĩ nhomongeta kuaa va'erã voi.

31Joe opu'ã aguã kavaju oguereko katupaa teĩ ipo'aka aguã ma Senhor gui ae 'rã ou.

← Chapter 20 Jump to: Chapter 22 →