Proverbs 27

Guarani MBYA (Nhanderuete ayvu iky'a e'ỹ va'e)

← Chapter 26 Jump to: Chapter 28 →

1Nda'evei ko'ẽ rã guarã rerovy'a ma voi aguã, mba'eta ndereikuaai mba'e pa oiko 'rãa.

2Tove amboae kuery tandererovy'a, ndee ae e'ỹ. Mombyry guigua tandererovy'a, ndee ae 'rãgue py.

3Ita ma ipoyi va'e, ita ku'i voi voyi avi, ha'e rami teĩ mokoĩve gui ipoyive va'e ma hi'arandu e'ỹ va'e ipoxya rupi ijayvua.

4Ivai ja rei va'e nhomoingo axy 'rã, ojerovia rei va'e voi nhombojexavai 'rã, ha'e rã oexa'ã vaikue rei va'e ma mava'e 'rã tu ojoko kuaa?

5Jajoayvua ndajaexa ukai 'rãgue py ha'eveve anhetẽ ete va'e rupi nhanhomongeta porãa.

6Nhanderayvu va'e nhandevy ijayvu ete teĩ ojapo porã 'rã, ha'e rã nhandere ija'e e'ỹ va'e ma nhandejuru rayvu teĩ jaikuaa 'rã nhanembotavy vy ria.

7Hevyatã va'e ma ei retãgue omombo rive 'rã, ha'e rã inhembyayi va'e pe ma iro va'e teĩ he'ẽ 'rã.

8Ngoo gui mombyry rupi ava oguata rei oikovy va'e ma guyra'i guaity gui mombyry oveve oikovy va'e rami avi.

9Nhaneirũ nhanemongeta porã ramo jajou porã 'rã, azeite ha'e heakuã porã va'e nhanembovy'aa rami avi.

10Nderexarai rei eme neirũ gui, neĩ nderu irũ gui, ha'e rã nderegua ro py ma evaẽ eme rejexavaia ára. Mba'eta ndero katy'i oĩ va'e nepytyvõve 'rã nderegua ae'i mombyry oĩ va'e gui.

11Xera'y, ne'arandu ke. Ha'e ramo 'rãe avy'a xepy'a py, xere ijayvu rei va'e kuery pe ambovai kuaa 'rã guive.

12Hi'arandu va'e ma mba'emo vai ou rã oexa vy onhemi 'rã, ha'e rã hi'arandu e'ỹ va'e ma oove tema vy oiko axyve rive 'rã.

13Orevea rekovia opaga aguã rami opyta va'ekue gui ijao oipe'aa 'rã, oexa va'ety e'ỹ rekovia onhemoingo va'ekue gui katuve ma oipe'aa 'rã.

14Aje'ive'i reve ngoo katy'igua pe oxarura atã va'e ma ijayvu vai va'e rami rive ojeapo.

15Oky vaipa oiny jave otyky tema va'e ma kunha ivai ja rei va'e reve joo rami;

16ha'e va'e nanhamokyrirĩ kuaai 'rã yvytu nanhamombytu'u kuaaia rami, ha'e azeite nhandepo py rive nanhanoẽ kuaaia rami avi.

17Ferro guigua ma ferro py ae nhaĩmbe'e, ha'e rami ae avi avakue oirũ reve nhomombaraete.

18Figo rembypy re opena porã va'e pe ha'eve 'rã hi'a gui ho'u aguã, ha'e opatõ re oikuaa pota porã va'ety ma omboetea 'rã.

19Yy py nhanderova 'ã ojekuaa 'rã, ha'e rami ae avi nhandepy'a re oĩ va'e ojekuaa 'rã nhandekuaia re.

20Manoa ha'e yvykua vaikue py oĩve tema 'rã, ha'e avakue rexa voi oexapavexe tema.

21Prata nhamboyku-a py, ha'e ouro tata rupa py jaiky'a'oa rami avi, nhande voi nhanera'angaa 'rã nhandererovy'aa rã nhaendua py.

22Mba'emo ra'yĩ nhamongu'ia rami avi hi'arandu e'ỹ va'e re jajeai teĩ, ndajaipe'ai 'rã ijarakuaa e'ỹa.

23Eikuaa pota porã ke nerymba vexa'i ikuaia re, ha'e epena porã nerymba kuery re,

24mba'eta mba'emo jareko va'e noĩ riaei 'rã, huvixa po'akaa voi ndoiko riaei 'rã hamymino jevy-jevy kuery peve.

25Yvyty ikuai va'e gui jai rogue reru aguã rejaya rire hokypa ju 'rã,

26ha'e rire rereko 'rã vexa'i rague ndeaorã, ha'e kavara ava gui rejou 'rã yvy repyrã.

27Kavara kunha gui ndoatai 'rã kamby rey'u aguã, ndero pygua kuery ha'e javi okaru porã aguã, nerembiguai kunhague ikuai va'e voi.

← Chapter 26 Jump to: Chapter 28 →