Proverbs 29

Guarani MBYA (Nhanderuete ayvu iky'a e'ỹ va'e)

← Chapter 28 Jump to: Chapter 30 →

1Ava omongetaa riae teĩ inhakã ratã va'e pe ma ou xapy'a 'rã heityarã, oo jepe e'ỹ re.

2Heko porã va'e heta-etave ramo heta va'e kuery ovy'a 'rã, ha'e rã heko vai va'e ipo'aka ramo heta va'e kuery ndovy'ai 'rã.

3Ava hi'arandu va'e ombovy'a 'rã nguu, ha'e rã kunha itavy rei va'e re irũ va'e ma omokanhymba rive 'rã oguereko va'ekue.

4Huvixa heko porã va'e opena porã 'rã yvy re, ha'e rã imposto re anho oiko va'e ma nhomoingo axy rei 'rã.

5Ava ojea katy'igua oguerorya rupi rive oiko va'e ma nhuã omoĩ oikoaty rupi ae.

6Heko vai va'e ojejavya py oĩ nhuã imbo'aarã, ha'e rã heko porã va'e ma oporai 'rã ovy'aa rupi.

7Heko porã va'e oikuaa pota 'rã iporiaukue'i re, ha'e rã heko vai va'e ma ha'e kuery re ndoikuaa potai 'rã.

8Avakue porojojai rei va'e ojapo 'rã tetã ha'e javi rupigua joguero'a aguã rami, ha'e rã hi'arandu va'e ma omombytu'u 'rã ipoxy va'e.

9Heko vai va'e pe hi'arandu va'e ijayvu ramo ipoxy, e'ỹ vy jojojai reia gui opytu'u e'ỹ re ae 'rã oiko.

10Jouguy moẽaty kuery nda'ija'ei 'rã anhetẽ rupi ipy'a va'e re, ha'e vy onhea'ã 'rã oipe'a aguã heko porã va'e rekove.

11Heko vai va'e oexa ukapa rei 'rã opoxya, ha'e rã hi'arandu va'e ma onhenhomi kuaa 'rã.

12Ayvu anhetẽ e'ỹ va'e re rive huvixa ojapyxaka ramo hembiguai kuery ha'e javi heko vai 'rã.

13Iporiaukue'i ha'e imbojexavaiare pe joo ramigua oiko, mba'eta mokoĩve pe ma Senhor oiko omoexakã va'e.

14Iporiaukue'i re huvixa ha'evea rami oikuaa pota va'e ojapo opo'akaa oĩ atã aguã raka'e rã peve guarã.

15Yvyra rovi'i py 'rã nhanhomo'arandu, oikuaa aguã, ha'e rã kyrĩgue ha'e kuery ae oikuaa rami rive ikuai vy omoxĩmba rei 'rã oxy kuery.

16Heko vai va'e hetave ovy ramo teko vai voi hetave 'rã ovy, va'eri ha'e kuery okanhymba rã heko porã va'e kuery oexa 'rã.

17Emo'arandu ke ndera'y kuery, ha'e ramo nembovy'a 'rã, ojapo 'rã nenhe'ẽ py revy'a aguã rami.

18Profeta ayvu nonhendui rã heta va'e kuery opa marã rei 'rã ikuai, ha'e rã lei rupi ikuai va'e ma ovy'a 'rã.

19Tembiguai ma nomo'aranduai 'rã ayvu py rive, oendu kuaa rei teĩ nanhonhe'ẽ rendui 'rã.

20Rexa ma pa peteĩ ava oikuaa pota e'ỹ re ijayvu va'e? Ha'e va'e gui hi'arandu e'ỹve va'ekue hi'aranduve 'rã.

21Nerembiguai kuery kyrĩ'i guive rerory rive rire raka'eve rã onhemoingoxe 'rã ndera'y ae'i rami.

22Ivai ja rei va'e ojapo 'rã joguero'apa rei aguã rami, ojerovia rei va'e joapo 'rã otekoavyve aguã rami.

23Onhemboyvate va'e omo'yvyĩ'iave 'rã, ha'e rã onhe'ẽ py onhemo'yvyĩ'i va'ekue ma omboeteave 'rã.

24Imonda va'e re onhemoirũ va'e ma onhe'ẽ re ae nda'ija'ei, ayvu poyi oendu teĩ mba'eve py nonhemombe'ui 'rã.

25Avakue gui okyjea rupi rive ikuai va'e ojejopy uka 'rã nhuã py, ha'e rã Senhor re ojerovia va'e ma oĩ atã 'rã.

26Heta 'rã ikuai huvixa ojou porãa aguã rive onhea'ã va'e, ha'e rã ava mboeko porãarã ma Senhor gui ae ou.

27Heko porã va'e pe rã heko vai va'e ma ojeguarupy, ha'e rã heko vai va'e ma ojeguaru 'rã heko porãa rupi oiko va'e gui.

← Chapter 28 Jump to: Chapter 30 →