Proverbs 19

Guarani MBYA (Nhanderuete ayvu iky'a e'ỹ va'e)

← Chapter 18 Jump to: Chapter 20 →

1Nanhamboetei 'rã hi'arandu e'ỹ va'e kuery anhetẽ rupi e'ỹ ijayvu va'e. Ha'e rã iporiaukue'i va'eri anhetẽ rupi ikuai va'e ma nhamboete.

2Jaikuaa porã pota e'ỹ re mba'emo jajapo aguã nda'evei, mba'eta oikuaa pota porã e'ỹ va'e ojejavy 'rã.

3Nhande ae 'arandu e'ỹa rupi vy jajavy 'rã tape, va'eri Senhor rovai ae 'rã nhandevai nhandepy'a py.

4Oguerekopa rei va'e heta 'rã ojou oirũrã, ha'e rã iporiaukue'i gui ma irũ kuery ae voi ojepe'apa 'rã.

5Joekokue ramigua rive mombe'uare ma nombopagaa e'ỹi 'rã, ha'e apu rupi ijayvu va'e voi ndoo jepei 'rã.

6Mba'emo omboja'o-ja'o va'e oguerovy'a pavẽ 'rã, mba'emo ome'ẽ rive va'e re onhemoirũ pavẽ 'rã.

7Iporiaukue'i ma hexegua kuery ae'i voi ndoexaxei 'rã, irũ kuery katuve ma ojepe'apa 'rã ixugui. Ha'e kuery rakykue mba'emo re ojerure aguã onha teĩ ndoupityi 'rã.

8O'arandurã ojou va'e ma guekove oayvu vy ae, mba'emo re oikuaa pota porã va'e ojou 'rã ha'eve va'e.

9Joekokue ramigua rive mombe'uare ma nombopagaa e'ỹi 'rã, ijapu rei va'e okanhy 'rãe.

10Hi'arandu e'ỹ va'e oguerekopa rei aguã nda'evei, tembiguai katuve ma nda'eveive huvixa kuery re ipo'aka aguã.

11Jajejokoa rupi vy nanhandevai vyvoi 'rã, nhandere ijayvu vaiague japerdoaa ma nhandejeguarã oĩ.

12Huvixa ipoxya ma guary okororõa rami, ha'e rã iporayvua ma yxapy jai rogue omoakỹa rami.

13Ta'y kuery hi'arandu e'ỹ va'e omoxĩmba rei 'rã nguu, ha'e ta'yxy ijayvu mbegue rei va'e ma otyky tema oiny va'e rami.

14Nguu kuery gui avakue ojopy 'rã ngoorã ha'e omba'e rei-reirã, ha'e rã gua'yxyrã hi'arandu va'e ma Senhor gui ae 'rã ojou.

15Ate'ỹ gui ae nhanderopeyi riae 'rã, ha'e nhaĩ rive riae vy nhaendu 'rã karuai.

16Ojapo uka pyre rami ikuai va'e ma guekove re ae onhangareko va'e, ha'e rã ojee ndoikuaa potai va'e ma omano 'rã.

17Iporiaukue'i mboaxya ma Senhor pe ae oiporuka va'e, ha'e ramo ha'e ju 'rã omboekovia joapo porãague repy.

18Ha'eve teri reve emo'arandu ke ndera'y, teĩ rejuka aguã peve'ỹ ta'vy.

19Ivai ja topaga ipoxy reiague re, mba'eta ndee repy teĩ ha'ekue rami ae ju 'rã oiko.

20Nemongetaa rã ejapyxaka porã ke, endu pota nembo'ea rã, hi'arandu va'e reiko aguã reikoa pukukue re.

21Avakue ma opa mba'e re onhembopy'a teĩ, ha'e rã Senhor onhembopy'aa ma oiko 'rãe.

22Nhanhomboaxya rupi nhandekuai ramo nhandererovy'aa 'rã, ijapu rei va'e 'rãgue py oguerovy'aave 'rã iporiaukue'i.

23Senhor renonde jajererokyjea rupi vy jaupity 'rã tekove. Ha'e rami ikuai va'e ovy'a 'rã, ha'e kuery re ndoui 'rã mba'emo vai.

24Inhate'ỹ va'e ma hy'a py opo'ẽ teĩ ojuru katy ndogueru potai 'rã.

25Jojojai rei va'ekue nhambopaga ramo hi'arandu e'ỹ va'ekue oexa vy oiko kuaa pota nho 'rã okuapy, ha'e hi'arandu va'e nhamongeta rã oiko kuaave 'rã.

26Ta'y nguu ojavyky rei, ha'e oxy omoxẽ rire ma nomboeteavei ramo oxĩmba rei 'rã.

27Xera'y, nembo'ea nerendu potai ri vy rejepe'a 'rã nemo'aranduarã va'ekue ayvu gui.

28Heko vai va'e joekokue omombe'ua py ombojaru rei 'rã imboayvua, heko vai va'e kuery teko vai re anho 'rã ijayvu.

29Jojojai rei va'ekue ma ombopagaa aguã rami ae ikuai, hi'arandu e'ỹ va'e ma oinupãmbaa aguã rami ikuai.

← Chapter 18 Jump to: Chapter 20 →