Proverbs 17

Guarani MBYA (Nhanderuete ayvu iky'a e'ỹ va'e)

← Chapter 16 Jump to: Chapter 18 →

1Nhandero py jajoguero'apa rei reve xo'o ja'u vaipa 'rãgue py ha'eveve nhandekuai rivea py peteĩ'i mbojape ja'u.

2Ta'y kuery oxĩmba aguã rupi ikuai va'e gui ma tembiguai kuery hi'arandu va'e ipo'akave 'rã, ha'e rami vy ojopy 'rã ta'y kuery peguarã va'ekue ae.

3Prata ma hi'angaarã py 'rã nhamoĩ, ha'e ouro ma tata py, ha'e rã nhandepy'a re oikuaa pota va'e ma Senhor ae.

4Heko vai va'e ojapyxaka 'rã mba'emo vai rupi ijayvu va'e re, ijapu va'e oenduxe vai 'rã ayvuxe.

5Iporiaukue'i jojai reia kuery ma Imoingoare re voi ijayvu rei rire jexavaia oguerovy'a rei va'e ndopaga e'ỹi 'rã.

6Tamoĩ kuery oguerovy'a 'rã guamymino kuery, ha'e rami ae avi ta'y kuery oguerovy'a 'rã nguu kuery.

7Hi'arandu e'ỹ va'e nda'ijayvu porã kuaai 'rãe, ha'e huvixa kuery nda'evei ijapu aguã.

8Ha'eve'ỹa rami ojapo ukaxe vy mba'emo ome'ẽ va'e oikuaa teĩ oipota va'e rei ita ojapoa rami, mba'eta mamo rã oikoa py tema oipotaa oiko 'rã.

9Amboae kuery ojejavyague ndoikuaa ukai va'e oexa uka oayvua, ha'e rã mba'ekue omboaxa-axa rei va'e ma ojapo 'rã joe irũve va'ety joegui oja'o aguã rami.

10Hi'arandu e'ỹ va'e cem-kue oinupãa teĩ noendui 'rã merami, ha'e rã hi'arandu va'e ma omongetaa rã oenduxe ete 'rã.

11Nanhonhe'ẽ rendui va'e kuery onhea'ã mba'emo vai re anho. Ha'e nunga rupi ha'e kuery rovai omboua 'rã imbojexavaiarã.

12Urso gua'y'i re inharõ va'e reve nhanhovaexĩa gui nda'eveive hi'arandu e'ỹ va'e ijarakuaa rupi e'ỹ ikuai va'e reve nhanhovaexĩ.

13Amongue pe ojapo porãa 'rãgue py mba'emo vai re omboekovia rire hoo py oiko riae 'rã mba'emo vai.

14Yy ombotyague gui oxyry xapy'aa rami avi jajoguero'a ypya. Ha'e nunga rupi ha'eveve japytu'u voi, joegui jaja'o e'ỹ aguã.

15Senhor ndojou porãi 'rã heko vai va'e omboeko porã rivea rã, neĩ heko porã va'e ombopaga rivea rã guive.

16Hi'arandu e'ỹ va'e o'arandurã ojoguaxe vy merami peráta oguereko opo py, nai'arandui ae ma va'eri.

17Nhaneirũ kuery nhanderayvu 'rã jaikoa jave re, ha'e rami vy jajexavaia py onhemoingo 'rã nhaneretarã ae'i rami.

18Avakue hi'arandu e'ỹ va'e onhemoĩ vai uka rive vy ojea katy'igua orevea opaga aguã rami ikuai.

19Joguero'a reixe vai va'e ojejavy reia rupi rive 'rã ikuai, ha'e ngokẽ ombotuvixa va'ekue py ae 'rã ojeity uka.

20Anhetẽ rupi e'ỹ ipy'a va'e ndojoui 'rã ha'eve va'e, peteĩ rupi e'ỹ ijayvu va'e ho'a 'rã mba'emo vai py.

21Ta'y hi'arandu e'ỹ va'e omomboriau 'rã nguu kuery. Ndoiko kuaai rei va'e ru kuery ma ndovy'ai 'rã.

22Nhandepy'a py vy'aa ma moã porã rami 'rã oĩ, ha'e rã nhanenhe'ẽ py nhandekueraia oĩ vy ma omombirupa 'rã nhanekãgue.

23Heko vai va'e onhevende nhemi 'rã peráta re, ha'eve e'ỹa ramigua rupi joguereko aguã.

24Mba'emo oikuaa va'e onhea'ã 'rã hi'aranduve aguã anho, ha'e rã hi'arandu e'ỹ va'e ma yvy re mba'emo ikuai va'e re rei 'rã oma'ẽ oikovy.

25Ta'y hi'arandu e'ỹ va'e omomboriau 'rã nguu, omonguerai rei avi 'rã hereko'iare.

26Heko porã va'e nhambopaga aguã nda'evei, huvixa nhamoingo axy reia ma ha'eve'ỹ va'e ae.

27Ayvu py ojejoko va'e ma hi'arandu va'e, oiko rive'i va'e ma oiko kuaa va'e ae.

28Hi'arandu e'ỹ va'e teĩ okyrirĩ oiny rã jaikuaa 'rã hi'arandua rami, ijayvua py ojejoko va'e jaikuaa 'rã oiko kuaa va'e rami ae.

← Chapter 16 Jump to: Chapter 18 →