Proverbs 18

Guarani MBYA (Nhanderuete ayvu iky'a e'ỹ va'e)

← Chapter 17 Jump to: Chapter 19 →

1Joexaxe e'ỹ rei va'e ma ha'e kuery ae oipotaa rami rive ikuai, ha'e vy noenduxei 'rã 'arandu anhetẽ ete va'e.

2Hi'arandu e'ỹ va'e ndoikuaaxei 'rã 'arandu, ha'e kuery ae akã gui rive 'rã ijayvu.

3Teko vai oĩ ramo oĩ avi 'rã jojou vaia, ha'e nhaxĩmba aguã rami nhandekuai ramo nanhanemboeteavei ma 'rã.

4Avakue ijayvua ma yy typy va'e ramigua, ha'e hi'arandu va'e ayvu ma yakã'i oxyry va'e rami 'rã.

5Nda'evei otekoavy va'ekue nhamboeko porã aguã, neĩ heko porã'i va'e nhambopaga aguã guive.

6Hi'arandu e'ỹ va'e ijayvua ojapo 'rã joguero'a rei aguã rami, onhenupã ukaa rupi merami ijayvu.

7Hi'arandu e'ỹ va'e ayvu ma ha'e kuery ae imombaarã rive, ijayvua ma nhuã py inhe'ẽ mbo'aarã.

8Ijayvuxe reia ma he'ẽve va'e rami oguejy 'rã ipy'apy katy.

9Inhate'ỹa rupi rive omba'eapo va'e ma mba'emo ojavyky rei va'e regua ae ikuai.

10Senhor rery ma torre imbaraeteve va'e, ha'e py heko porã va'e onhemi vy oiko porã aguã.

11Oguerekopa va'e pe rã imba'e rei-rei ma tetã ikorapa va'e rami, ha'e oikuaa rã ikora yvate va'e rami ae.

12Avakue ikuai axy e'ỹa ja ojejou porã rei 'rã opy'a py, ha'e rã onhemo'yvyĩ'i va'e ma omboetea 'rã.

13Nhaendu kuaa e'ỹ re nhambovai vy nhaxĩmba rei 'rã nhane'arandu e'ỹa py.

14Avakue imba'eaxy teĩ ipy'a guaxua omombaraete 'rã, ha'e rã onhe'ẽ py ikueraia ma noguerombaraetei 'rã.

15Hi'arandu va'e opy'a re omoĩ 'rã oikuaa porãve aguã, oapyxa rupi voi onhea'ã 'rã oikuaa aguã.

16Joupe avakue mba'emo ome'ẽ 'rã tape oipe'a uka vy, yvatekueve reve ijayvu aguã peve.

17Ha'e ranhe ojepy ukaa rupi ijayvu rã ixupe “Ha'evea ramigua” ja'e ranhe 'rã, amboae kuery ou vy omboayvu e'ỹa ja.

18Nhombovake va'e kuery xortea oexa vy opytu'upa 'rã joupe ijayvu atãa gui, ipo'akakueve teĩ oikuaa vyvoi 'rã.

19Nhanderegua nhambopoxy rire haxy ete 'rã ha'eve vai ju aguã, ijayvu atãa rupi onhemboty 'rã oo ikorapa va'e rokẽ jokoa rami.

20Nhandeayvuague rami oiko ramo javy'a 'rã nhanekuraxõ py, nhandeayvua ojeupity ramo jarovy'a 'rã.

21Nhandeayvua py jajoapo 'rã omano, e'ỹ vy oikove aguã rami. Ijayvu porã kuaa va'e oiko porã 'rã.

22Nhandera'yxyrã jajou vy mba'emo porã jajou, ha'e jaupity Senhor nhanemoingo porãa.

23Iporiaukue'i ma mba'emo re ojerurea rupi 'rã ijayvu, ha'e rã oguerekopa va'e ma ombovai atã rei 'rã.

24Avakue irũ reta va'e omokanhy tema 'rã imondovy. Ha'e rami teĩ peteĩ oiko avi nhaneirũ nhanderegua ae'i gui nhanderayvuve va'e.

← Chapter 17 Jump to: Chapter 19 →