Proverbs 23

Guarani MBYA (Nhanderuete ayvu iky'a e'ỹ va'e)

← Chapter 22 Jump to: Chapter 24 →

1Huvixa reve rekaru aguã nemboguapy ri ramo eikuaa pota porã nerenonde py marã ramigua pa oĩ va'e re.

2Emboaxa peteĩ kyxe ndejyryvi re, okaru guaxu va'e ri reiko vy.

3He'uxepa rei eme tembi'u porã omoĩmba teĩ, mba'eta tembi'u ma nembotavyarã oĩ.

4Enhea'ã rei eme rerekopaxea rupi rive, emoĩ eme ha'e nunga ne'arandua py.

5Mba'emo rei re rive teve rema'ẽ riae ta? Mba'eta anhetẽ ete nemba'e rei-rei okanhymba vyvoi 'rã ipepo va'e rami, taguato yvate rupi oveve ovya rami.

6Nda'evei hakate'ỹ va'e rembi'u re rekaru aguã, neĩ he'upaxe rei eme tembi'u porã omoĩ teĩ.

7Mba'eta ha'e va'e oikuaa pota rei 'rã ndere, ha'e ramigua ae vy. Ndevy pe “He'uve ha'e ey'uve tema” he'i 'rã teĩ opy'a py anhetẽ rupi e'ỹ oĩ ndereve.

8Ha'e gui rembojevypa ju 'rã re'u vaipa vyvoi va'ekue, ha'e ijayvu porãa rerovy'aague oaxapa rive 'rã.

9Ndeayvu eme hi'arandu e'ỹ va'e kuery oendu aguã, mba'eta oendu rivepa 'rã 'arandu rupi ndeayvua.

10Perova eme yvy markaarã yma omo'ã mbyre, neĩ peike eme ta'vy tyre'ỹ kuery yvy re,

11mba'eta ha'e kuery Repyarã ma imbaraete, ha'e penderovai onhemoĩ 'rã ha'e kuery repyarã.

12Emoĩ ndepy'a re nembo'eague, ha'e ejapyxaka ayvu mba'emo kuaa ukaa re.

13Emo'arandu e'ỹ eme kyrĩgue. Mba'eta yvyra rovi py reinupãa gui rive nomanoi 'rã.

14Yvyra rovi'i py reinupã vy inhe'ẽ reraa jepe 'rã omano aguã gui.

15Xera'y, ndepy'a py ne'arandu ramo xee voi xepy'a py roguerovy'a 'rã.

16Ha'evea rupi ndeayvu ramo xepy'apy re avy'a riae.

17Ndepy'a py eroangeko rei eme ojejavypa rei va'e ikuaia. Ha'e rami 'rãgue py Senhor renonde rejererokyjea rupi eiko ára nhavõ.

18Mba'eta ha'e rami vy 'rãe nerenonde oĩ porã, ha'e rearõ reikovya ndoaxa rivei 'rã.

19Xera'y, endu ke ne'arandu aguã, ha'e ereko nekuraxõ tape hi'yvi va'e rupi.

20Enhemoirũ eme vinho gui oka'u rei va'e kuery reve, neĩ xo'o ho'u raxa rei va'e kuery reve.

21Mba'eta oy'u raxa ha'e okaru guaxu va'e ma iporiaupa 'rã, avakue hopeyi rei va'e ijao vaikue rei 'rã okuapy.

22Endu ke nderu ndere ta'y va'ekue ayvu. Ndexy gui nderexarai rei eme guive, guaimi'ive'i ma ovy ramo voi.

23Ejogua ke anhetẽ va'e, ha'e gui emboekovia ju eme. Ejogua avi 'arandu ha'e nembo'earã, reiko kuaa aguã.

24Heko porã va'e ru ma ovy'a vaipa 'rã, hi'arandu va'e re ta'y va'e ma oguerovy'a 'rã.

25Tandererovy'a nderu ha'e ndexy, ejapo nderereko'iare ndererovy'a aguã rami.

26Xera'y, eme'ẽ xevy nekuraxõ, ha'e nderexa toguerovy'a xee aikoa.

27Mba'eta kunha itavy rei va'e ma yvykua puku va'e rami, ha'e amboae ava ra'yxy ma yguarã ojo'o po'i'i pyre rami.

28Ha'e nunga kunha ma jojuka va'ety rami oma'ẽ mbegue 'rã oiny joe, heta avakue ma ojapo heko vai aguã rami.

29Mava'e pe 'rã tu haxypa rei? Mava'e pe 'rã tu ipoyi ete? Mava'e re 'rã tu joguero'aa rei? Mava'e pe 'rã tu onhemombe'u? Mava'e 'rã tu mba'e py e'ỹ ojejukapa rei? Mava'e 'rã tu hexa pytã rei va'e?

30Vinho oy'ua rupi tema ikuai va'e pegua ae, oy'u va'erã omoirũ mbyre re onhea'ã va'e.

31Ema'ẽ rive ke vinho pytã porã rei va'e re, karo py oĩ va'e jaexa rã hexakã rei'i ha'e onheẽ porã rei'i oiny teĩ,

32va'eri opaa py ma ndexu'u 'rã mboi rami, nekaraĩ 'rã jai ra'y rami.

33Rexa 'rã mba'emo vaikue, ha'e opa marã 'rã ndeayvu ndepy'a py.

34Renhenhandu 'rã ye'ẽ mbyte oguataa rupi onheno oupy va'e rami, ajukue 'y áry itui va'e rami.

35Ha'e vy aipo're 'rã: “Xepetea ra'e va'eri ndaxyi! Xenupãa ra'e teĩ naendui! Raka'e 'rã tu akuera ju? Ay'uve ju ramo 'rãe ma ha'eve”, 're 'rã.

← Chapter 22 Jump to: Chapter 24 →