Proverbs 13

Guarani MBYA (Nhanderuete ayvu iky'a e'ỹ va'e)

← Chapter 12 Jump to: Chapter 14 →

1Ta'y hi'arandu va'e oendu pota porã 'rã tuu ombo'e rã, ha'e rã jojojai rei va'e ma noendu potai 'rã omongetaa rã.

2Avakue ijayvu porãa rupi vy ojou 'rã iporã va'e, ha'e rã anhetẽ rupi e'ỹ ikuai va'e ma joguero'axe vai rive.

3Ayvu py ojejoko va'e omoĩ atã 'rã guekovea, ha'e rã ijayvu katu raxa va'e ma ha'e ae onhemoĩ vai.

4Inhate'ỹ va'e ma mba'emo oipota rei teĩ ndojoui 'rã, ha'e rã ikyre'ỹ va'e ma ojoupave 'rã mba'emo.

5Heko porã va'e ndojou porãi 'rã apu, ha'e rã heko vai va'e ma oxĩmba rei 'rã, ojou vaipy ae vy.

6Teko porã ogueraa jepe 'rã anhetẽ rupi ikuai va'e, ha'e rã ojejavypa rei va'e ma teko vai oity 'rã.

7Amongue ma “Arekopa” he'i va'eri mba'eve oguereko vy e'ỹ, ha'e rã amboae kuery ma “Xeporiau'i” he'i va'eri opa mba'e oguereko.

8Avakue oguerekopa va'e ome'ẽmba 'rã guekovia, ha'e rã iporiaukue'i ma avave nomoangekoai 'rã.

9Heko porã va'e rataendy hexakã porã 'rã, ha'e rã heko vai va'e rataendy ma oguepa rive 'rã.

10Jajejou porã reia ma joe nhapu'ã rei aguã rive oĩ, teĩ nhanhemongeta uka vy ma jajou 'rã 'arandu.

11Mba'e rei-rei jajou rive va'ekue opa rive avi 'rã, ha'e rã nhamba'eapoa rupi jajou va'ekue ma hetave 'rã ovy.

12Mba'emo nharõ jaikovya ndoiko voi ramo nhandekuerai 'rã, teĩ jaipota va'ekue ojeupity rã yvyra tekove me'ẽa rami oĩ.

13Omongetaa rã noendu potai va'ekue ombopagaa 'rã, ha'e rã ijayvua oendu vy ojererokyjea rupi ikuai va'e pe ma ome'ẽa reta 'rã.

14Hi'arandu va'e nhanembo'ea ma tekoverã me'ẽa, nhuã manoa gui jaa jepe aguã.

15Hi'arandu porã va'e omboetea 'rã, ha'e rã anhetẽ rupi e'ỹ ikuai va'e reve ma nda'evei nhandekuai aguã.

16Hi'arandu va'e ha'e javi oiko kuaa 'rã, ha'e rã hi'arandu e'ỹ va'e ma oexa uka 'rã o'arandu e'ỹa.

17Heko vai va'e pe mba'emo omombe'u ukaa ramo oiko 'rã mba'emo vai, ha'e rã ojeroviapy pe ri omombe'u ukaa ramo ma moã rami oiko.

18Omongetaa rã noendu potai va'e ma iporiau ha'e oxĩmba rei aguã rami ikuai, ha'e rã omongetaa rã oendu porã pota va'e ma omboetea 'rã.

19Jaipota va'ekue oiko ramo javy'a 'rã nhandepy'a py, ha'e rã hi'arandu e'ỹ va'e ma ojeguaru 'rã gueko vaia gui ojepe'a va'e gui.

20Hi'arandu va'e reve ikuai va'e hi'aranduve 'rã, ha'e rã hi'arandu e'ỹ va'e reve onhemoirũ va'e ma ojexavai rive 'rã.

21Mba'emo vai oupity 'rã ojejavypa rei va'e, ha'e rã heko porã va'e pe ma mba'emo porã anho 'rã ome'ẽa.

22Avakue heko porã va'e ma gua'y ra'y kuery pe 'rã oeja omba'e rei-reikue, ha'e rã ojejavypa rei va'e mba'e rei-reikue ma heko porã va'e peguarã ae 'rã opyta.

23Iporiaukue'i oyvy omboa'eve ramo'iague py opa mba'e hi'a porã 'rã, ha'e rã teko porã rupigua ndoikoi ramo oipe'apaa 'rã.

24Gua'y kuery noinupã potai va'e ma ndoayvui vy, ha'e rã oayvu vy are e'ỹ re omo'arandu pota 'rã.

25Heko porã va'e oguereko reta 'rã ho'u va'erã, ha'e rã heko vai va'e ma oendu 'rã karuai.

← Chapter 12 Jump to: Chapter 14 →