Proverbs 25

Guarani MBYA (Nhanderuete ayvu iky'a e'ỹ va'e)

← Chapter 24 Jump to: Chapter 26 →

1Po rami voi 'arandu regua ayvu Salomão omombe'u rã Judá pygua huvixa Ezequias rembiguai kuery ombopara va'ekue.

2Nhanderuete gueko ndoikuaa ukapai ramo nhamboete, ha'e rã huvixa kuery ma mba'emo re oikuaa pota porã ramo nhamboete.

3Huvixa kuery py'a re oĩ va'e jaikuaa va'erã e'ỹ, yva yvatea ha'e yvy guýry oĩ va'e rami avi.

4Prata gui iky'a oĩ va'ekue oipe'aa ramo opyta 'rã mba'emo ryrurã apoa pe.

5Huvixa renonde gui heko vai va'e oipe'aa ramo ipo'akaa oĩ atãve 'rã teko porã rupi anho.

6Enhemboyvate rei eme huvixa renonde, eĩ eme guive yvatekueve mbyte,

7mba'eta huvixa renonde reĩ jave nemo'yvyĩ'i 'rãgue py ha'eveve ndevy “Ejuve kyvõ katy” he'i. Mba'emo nderexa py rexa va'ekue

8nda'evei remombe'upa vyvoi rei aguã nemboayvua py. Mba'eta opaa py mba'exa 'rã tu rejapo nderovaigua nemoĩ vai ramo?

9Eikuaa pota ha'e nungakue re ndea katy'igua reve anho'i, eikuaa uka eme oikuaa uka e'ỹ pyre,

10nerenduare ijayvu rei e'ỹ aguã ndere, ha'e rexĩmbaa py reĩ vai e'ỹ aguã.

11Ha'eve jave ayvu nhamombe'u va'e ma maçã ouro guigua prata py ombojeguaa rami avi.

12Namixã ha'e jegua ouro ete'i gui ojapo pyre rami avi, hi'arandu va'e nhomongetaa ha'eve 'rã ojapyxaka porã va'e pe.

13Mba'emo omono'õa ára py yro'y nhanemoro'yxãmba va'e rami avi tembiguai ojeroviapy ombovy'a 'rã imondoukaare kuery, ipatõ kuery onhe'ẽ py oguerovy'a ramo.

14Mba'emo ome'ẽ aguã re ijayvu rive va'e ma arai ha'e yvytu oky vy e'ỹ va'e rami avi.

15Nhandevaia rupi e'ỹ nhandeayvu ramo huvixa kuery ojapo 'rã jajerurea, nhandeayvu porã'ia ma ombovopa 'rã mba'emo kãgue voi.

16Ei rejou ri vy he'u vaipa eme, re'u vaipa vy rembojevypa e'ỹ aguã.

17Tereo riae eme ndero katy'i oĩ va'ea py, ndejou vai vy ndereroporiau e'ỹ aguã.

18Avakue guetarã rekokue rive mombe'ua ma nhomboguaiaty, kyxe ha'e hu'y haimbe va'e rami avi 'rã nhomomba.

19Jajexavaia py ojeroviapy re'ỹ jajeroviaa ma nhaneraĩ opẽ va'e py jakaru, e'ỹ vy nhandepy vaikue'i py jaguataa rami avi.

20Iporiau'i va'e oĩa py oporaei rive reia ma yro'y teĩ oao omboi va'e rami, e'ỹ vy joai py vinagre oikyty va'e rami avi.

21Ndere ija'e e'ỹ va'e kuery okaruxe ramo eme'ẽ ho'u va'erã, ijy'uvei ramo eme'ẽ oy'u aguã,

22mba'eta ha'e rami vy 'rã rejapo inhakã áry tapyĩ hexakã va'e ramigua oendu aguã rami, ha'e rã ndevy pe ma Senhor ome'ẽ 'rã mba'emo porã.

23Kuaray apu'a'ia katy gui yvytu oky oguerua rami avi nhombotavya rupi ijayvu va'e nhombopoxypa 'rãe.

24Opy kunha ivai ja rei va'e reve nhaĩa gui ha'eveve 'rã oo apyte áry nhaĩ.

25Tekoa mombyrya guigua ayvu porã omombe'u rã nhaendua ma nhandey'uvei reve yro'yxã jay'ua rami avi.

26Heko porã va'ekue ri heko vai va'e pe ojerereko uka va'e ma yvu yapo rei ha'e iky'a rei va'e rami avi.

27Nhande ae rive jajejou porã reia ma ei ja'u vaipa rã nda'eveia rami avi.

28Avakue ojejoko e'ỹ va'e ma peteĩ tetã nda'ikoravei vy oitypa pyre rami avi ikuai.

← Chapter 24 Jump to: Chapter 26 →