Proverbs 11

Guarani MBYA (Nhanderuete ayvu iky'a e'ỹ va'e)

← Chapter 10 Jump to: Chapter 12 →

1Jokorea rupi mba'emo opeja va'e gui Senhor ojeguaru, ha'e rã ha'evea'i rami opeja va'e ma oguerovy'a 'rã.

2Jajejou porã rei rive ramo avave rei nanhanemboeteai 'rã, teĩ nhanhemo'yvyĩ'i vy ma jajou 'rã nhane'arandurã.

3Heko porã va'e anhetẽ rupi ikuaia ma oguereko 'rã ha'evea rupi, ha'e rã anhetẽ rupi e'ỹ ikuai va'e ma anhetẽ e'ỹa ae 'rã omomba.

4Nhombopagaa ára py opa mba'e jarekopa va'ekue ndovarei 'rã mba'everã, ha'e rã nhandereko porãa ma nhandereraa jepe 'rã manoa gui.

5Anhetẽ rupi ipy'a va'e pe ma heko porãa ae omoatyrõ 'rã haperã, ha'e rã heko vai va'e ma ho'apa 'rã ha'e kuery ae reko vaia py.

6Heko porã va'e oo jepe 'rã ha'e kuery ae reko porãa py, ha'e rã jokorea rupi ikuai va'e ma ha'e kuery ae reko vaia py 'rã ombo'aa.

7Heko vai va'e omano ramo mba'emo oarõague voi opa 'rã, heko vai va'e oarõague opa rive 'rãe.

8Heko porã va'e ogueraa jepea 'rã ojexavaia gui, ha'e gui heko vai va'e re jevy 'rã ha'e nunga ou.

9Anhetẽ rupi e'ỹ ikuai va'e ma ayvu py rive oity 'rã oirũ kuery, ha'e rã heko porã va'e ma mba'emo oikuaa rupi oo jepe 'rã.

10Heko porã va'e ikuai porã ramo tetã pygua kuery ha'e javi 'rã ovy'a okuapy, ovy'a avi 'rã okuapy heko vai va'e okanhy ramo.

11Heko porã va'e ogueroayvu porãa rupi tetã ha'e javi rupi 'rã ikuai porã, ha'e rã heko vai va'e kuery ijayvua rupi ma oitya 'rã.

12Oirũ pe “Mba'e vare'ỹ” he'i va'e re ma noĩ 'arandua, ha'e rã ava hi'arandu va'e ma okyrirĩ 'rã oikovy.

13Joekokue ramigua rive omombe'u va'e onhea'ã 'rã onhomi mbyre oikuaa aguã, ha'e rã ojeroviapy ma onhomi mbyre nomboaxai 'rã.

14Joguerekoa hi'arandu va'e ndoikoi ramo avakue pavẽ 'rã ho'apa, teĩ nhomongetaa heta ikuai ramo ma ikuai porã 'rã.

15Oirũ orevea opaga aguã rami oiko va'e ojexavai 'rã, ha'e rã ha'e rami ndoikoi va'e ma oĩ atã 'rã.

16Kunha porayvu va'e ojou 'rã imboetearã, ipo'akakueve ojou-joupavea rami avi.

17Mborayvu rupi ikuai va'e ma ha'e kuery pe ae ojapo porã, ha'e rã joapo vai rei va'e ma ha'e kuery ae onhemoĩ vai uka.

18Heko vai va'e ojeupe guarã ojou va'e ma imarã va'erã, ha'e rã teko porã rupi oiko va'e ma anhetẽ ete va'e guigua ojou 'rã oikoague repy.

19Heko porã va'e oo 'rãe tekove katy, ha'e rã teko vai rupi ikuai va'e ma omano ete 'rãe.

20Opy'a py opa marã ikuai va'e gui Senhor ojeguaru ete 'rã, ha'e rã anhetẽ rupi ikuai va'e ma oguerovy'a 'rã.

21Heko vai va'e nombopagaa e'ỹi 'rã, jaikuaa, ha'e rã heko porã va'e kuery regua ma oo jepe 'rã.

22Ouro guigua ma poryko xĩ jeguarã oĩ ramo nda'evei. Ha'e rami ae kunha porã re hi'arandu e'ỹa oĩ ramo nda'evei.

23Heko porã va'e oipotaa rami vy oiko 'rã nhomoingo porãarã, ha'e rã heko vai va'e ma mba'emo oarõ va'ekue 'rãgue py oiko 'rã imbopagaarã.

24Joupe mba'emo ome'ẽ rive-rive'i va'e ojou retave 'rã heravy, ha'e rã nome'ẽ rivexei va'e ma oipotapa rei 'rã.

25Imba'eme'ẽ porã kuaa va'e ma oiko porã 'rã, joupe oy'u va'erã ome'ẽ va'ekue ju omboy'ua 'rãe.

26Mba'emo aju nomboja'oxei va'e re ma heta va'e kuery ijayvu vai 'rã okuapy, ha'e rã ivendeare ma ogueroayvu porãa 'rã.

27Joupe ojapo porãa rupi ikuai va'e omboetea 'rã, ha'e rã teko vai rupi rive ikuai va'e ma ha'e kuery re ae ju 'rã ojeapa heko vaiague.

28Omba'e rei-rei re rive ojerovia va'e ho'a 'rã, ha'e rã heko porã va'e ma ijaguyje 'rã mba'emo rogue ipyaupaa rami.

29Ngopygua kuery ndoguereko kuaai va'e ojou 'rã yvytu rive, ha'e hi'arandu e'ỹ va'e ikuai 'rã hi'arandu va'e rembiguairã.

30Heko porã va'e ma yvyra'a tekove me'ẽa rami ikuai, tekoverã joua ma hi'arandu va'e ae vy ma 'rã.

31Yvy re heko porã va'e ikuai teria ja ombopagaa 'rã. Heko vai ha'e ojejavypa rei va'e kuery katuve ma ombopagaa 'rã.

← Chapter 10 Jump to: Chapter 12 →