Proverbs 16

Guarani MBYA (Nhanderuete ayvu iky'a e'ỹ va'e)

← Chapter 15 Jump to: Chapter 17 →

1Nhande nhanhembopy'a 'rã mba'emo jajapo aguã, ha'e rã Senhor gui ae 'rã ou nhambovai kuaa aguã.

2Nhandevy ma jaikoa ha'e javi ha'evepa rei teĩ Senhor oikuaa pota 'rã nhandepy'a re.

3Emboaxa Senhor po py mba'emo rejapoxe va'e, ha'e ramo omoingo 'rã reipotaa ha'e javi.

4Senhor opa mba'e omoingo ha'e ae oipotaa rami, heko vai va'e voi omoingo ojexavai aguã.

5Opy'a py ojejou porã rei va'e gui Senhor ojeguaru vy nombopaga e'ỹi 'rãe.

6Nhanhomboaxya ha'e anhetẽ rupi jaiko ramo jajejavyague ojao'ipaa 'rã, Senhor renonde jajererokyjea rupi vy jaa jepe 'rã mba'emo vai gui.

7Xapy'a rei ava oikoa Senhor oguerovy'a vy ojapo 'rã ngovaigua kuery reve voi irũ jevy aguã rami.

8Jarekopa rei reve teko vai rupi jaiko 'rãgue py ha'eveve mboapy'i jareko reve teko porã rupi jaiko.

9Jaiko aguã re nhande nhanhembopy'a teĩ jaguataa rupi nhanderereko va'e ma Senhor ae.

10Huvixa ijayvu 'rã oikuaapaa rupi ae. Ha'e ramo nemboayvu rã ejavy eme ndeayvua py.

11Senhor gui ae 'rã ou ha'evea rami mba'emo japeja ha'e nha'anga aguã, voko py ha'evea ramigua poyia oĩ va'e ma ixuguigua meme.

12Huvixa kuery ojeguaru 'rã teko vai ha'e javi gui, gueko porãa rupi ae 'rã opena oiny.

13Anhetẽ rupigua ayvu huvixa oendu vy oguerovy'a 'rã, oayvu 'rãe anhetẽ rupi ijayvu va'e.

14Huvixa ipoxya nhaendu vy jaikuaa 'rã jojuka ukaxea, teĩ ha'e ramia gui hi'arandu va'e omombytu'u kuaa 'rã.

15Huvixa ovy'a ramo jaikuaa nhomoingove ju aguã. Iporayvua ma ára pyau py arai gui okya rami.

16Ouro jajoua gui ha'eveve nhane'arandurã jajou, prata gui ha'eveve va'e ma jaiko kuaavea.

17Heko porã va'e oikoa ma teko vairã katy e'ỹ 'rã oo, oiko aguã oikuaa pota porã va'e ma ogueraa jepe 'rã guekove.

18Jajejou porã reia ma opaa py nhanembojexavai 'rã, ha'e nhandepy'a py nhanhemboyvate reia ma nhandereityarã oĩ.

19Yvatekueve reve mba'emo jajoupa va'ekue nhamboja'o 'rãgue py ha'eveve yvyĩgueve'i reve nhanhemo'yvyĩ'i.

20Ombo'ea rã ojapyxaka va'e ojou 'rã mba'emo porã, ha'e Senhor re ojerovia va'e ovy'a ete 'rã.

21Okuraxõ py hi'arandu va'e pe “Oiko kuaa va'e” 'ea 'rã, ha'e ijayvu porã kuaa va'e ma nhombo'e porã 'rã.

22'Arandu ojou va'e pe ma tekove me'ẽarã oĩ, ha'e rã hi'arandu e'ỹ va'e ma opaga 'rã nda'ijarakuaai reiague re.

23Hi'arandu va'e okuraxõ py onhembo'e ranhe 'rã ijayvu kuaa aguã, ha'e ramo onhe'ẽ rendu pavẽ 'rã.

24Ayvu porã ma ei he'ẽa rami oĩ nhanekuraxõ re, moã nhanderete moexaĩa rami guive.

25Oĩ tape avakue oexa rã ha'eve rei va'e merami teĩ opaa py ma manoa katy 'rã ogueraa.

26Omba'eapo va'e ma nhembyayi gui ae 'rã omba'eapo, okaruxea ae omokyre'ỹ.

27Avakue vare'ỹ va'e onhea'ã 'rã okuapy teko vai re anho, ha'e ijayvua ma tata mba'emo rapyarã.

28Avakue heko vai va'e ojapo 'rã joguero'a rei aguã rami, ijayvu rei va'e ma joe irũ porã va'ekue teĩ omomboi 'rã joegui.

29Avakue ojerovia rei va'e oirũ kuery ombotavy vy oguereko 'rã tape vai rupi.

30Oxapymi rei va'e onhembopy'a 'rã oiny teko vai re, ha'e gui onhembexu'u reve ojapo ete 'rã.

31Omboetepy 'a xiĩa ma ijeguarã oĩ, tape teko porã katy oo va'e rupi oje'oi va'e pegua ae.

32Joe nhapu'ã rei aguã re jajerovia rei 'rãgue py ha'eveve nhandevai vyvoi e'ỹa, tetã ha'e javi re nhandepo'aka 'rãgue py ha'eveve nhande ae jajejoko kuaa.

33Xortea jaexa teĩ Senhor gui meme ou jaikuaa aguã.

← Chapter 15 Jump to: Chapter 17 →