Proverbs 12

Guarani MBYA (Nhanderuete ayvu iky'a e'ỹ va'e)

← Chapter 11 Jump to: Chapter 13 →

1Onhemo'arandu uka va'e oguerovy'a 'arandua, ha'e rã nonhemongeta ukai va'e ma hi'arandu e'ỹ va'e ae.

2Heko porã va'e oupity 'rã Senhor omboaxya, ha'e rã opa marã rei onhembopy'a va'e ma ombopaga 'rã.

3Avakue ojejavy reia rupi ikuai va'e noĩ atã kuaai 'rã, ha'e rã heko porã va'e ma ndoipe'aai 'rã.

4Kunhague hi'arandu va'e ma ime oguerovy'a 'rã, ha'e rã oxĩmba rei aguã rami ikuai va'e ma ikãgue omou'ũmba heravy va'e rami.

5Heko porã va'e ipy'a 'rã ha'evea rupi anho, ha'e rã heko vai va'e ma nhombotavya rupi rive 'rã nhomongeta.

6Heko vai va'e ayvu ma jouguy omoẽxe vy oma'ẽ mbegue va'e rami, ha'e rã heko porã va'e ayvu ma jogueraa jepearã.

7Heko vai va'e oitya rã noĩvei ma 'rã, ha'e rã heko porã va'e ramymino kuery ma ikuai riae 'rã.

8Avakue hi'arandu va'e re ima'endu'a porãa 'rã, ha'e rã opa marã onhembopy'a va'e ma ojou vaia 'rã.

9Nhanhemboyvate rei teĩ karuai nhaendu jepi 'rãgue py ha'eveve nhanhemo'yvyĩ'i reve nhamba'eapo jaikovy aguã.

10Heko porã va'e opena porã 'rã guymba kuery re, ha'e rã heko vai va'e py'a re ma nhomoingo axyxea rive oĩ.

11Oyvy re omba'eapo va'e oguereko reta 'rã tembi'u, ha'e rã hi'arandu e'ỹ va'e kuery ma mba'emo rive ojou aguã rupi ikuai.

12Heko vai va'e ikuai 'rã teko vairã joua rupi rive, ha'e rã heko porã va'e ma yvyra hapo porã ha'e hi'a porã va'e rami.

13Heko vai va'e onhembo'a uka 'rã ha'e ae ijayvua py, ha'e rã heko porã va'e ma oo jepe 'rã ojexavai aguã gui.

14Avakue ijayvu porãa rupi ojou 'rã imoingo porãarã, peteĩ-teĩ ojou 'rã opo py ojapoague repy.

15Hi'arandu e'ỹ va'e ma ojeupe ae ha'evea rami merami oiko, ha'e rã hi'arandu va'e ma omongetaa rã ojapyxaka pota 'rã.

16Hi'arandu e'ỹ va'e ma opoxya oexa uka vyvoi 'rã, ha'e rã hi'arandu va'e ma hexe ijayvua teĩ ojejoko kuaa 'rã.

17Anhetẽ rupi ijayvu va'e ojapo ha'evea rami oikuaa potaa aguã rami, ha'e rã ijapu va'e ma ojapo nhombotavypaa aguã rami.

18Kyxe xĩ py rami avi ijayvuxe va'e ayvu nhomboperepa 'rã, ha'e rã hi'arandu va'e ayvu ma moã.

19Anhetẽ rupi ijayvu va'e ikuai riae 'rã, ha'e rã ijapu va'e ma xapy'a'i guarã rive.

20Heko vai va'e py'a re oĩ nhombotavy aguã rive, ha'e rã peteĩ rami ikuai aguã re nhomongeta va'e ma oendu 'rã ovy'aa.

21Heko porã va'e re mba'emo vai ndoikoi 'rã, ha'e rã heko vai va'e re ma imoingo axyarã rive 'rã ou.

22Ijapu va'e gui Senhor ojeguaru, ha'e rã anhetẽ rupi ikuai va'e ma oguerovy'a.

23Hi'arandu va'e ndoikuaa ukapa rei 'rã mba'emo oikuaa va'e, ha'e rã hi'arandu e'ỹ va'e ma oexa ukapa vyvoi 'rã o'arandu e'ỹa.

24Ikyre'ỹ va'e ipo'aka 'rã joe, ha'e rã inhate'ỹ va'e ma omomba'eapo nhea'ãa rive 'rã.

25Avakue py'a re heko eta reia oĩ va'e ombojero'a rei 'rã, ha'e rã ayvu porã'i ma ombovy'a 'rã.

26Heko porã va'e oguereko 'rã heravy oirũ kuery, ha'e rã heko vai va'e kuery ma ojavy uka 'rã tape.

27Inhate'ỹ va'e ndoexyi 'rã xo'o ojuka va'ekue, ha'e rã ikyre'ỹ va'e ma mba'emo ojou va'ekue ombovare ete 'rã.

28Teko porã rupi oo va'e ojou 'rã tekove, ha'e va'e tape rupi manoa noĩ.

← Chapter 11 Jump to: Chapter 13 →