Proverbs 12

Ilonggo (Ang Biblia (1982))

← Chapter 11 Jump to: Chapter 13 →

1Ang bisan sin-o nga nagahigugma sang pagtudlo nagahigugma sang ihibalo, apang ang nagadumut sang pagsabdong sapatsapaton.

2Ang tawo nga maayo magaagum sing pagpahamuut sa Ginoo, apang ang tawo nga malaut sing mga padugi tagudilian niya.

3Ang tawo indi mapalig-on paagi sa pagkamalaut, apang ang gamut sang matarung indi mationg.

4Ang takus nga babayi amo ang purungpurung sang iya bana, apang ang nagapakahuya subong sang pagkagabok sa iya mga tul-an.

5Ang mga hunahuna sang matarung mga matarung; ang mga laygay sang malauton mga limbong.

6Ang mga polong sang malauton amo ang mga pagpuut tungud sa dugo, apang ang baba sang matadlong magaluwas sa ila.

7Ang malauton ginalaglag kag nagakawala, apang ang panimalay sang matarung magatindug.

8Ang tawo dayawon sono sa iya kaalam, apang ang balingag sa tagiposoon pagatamayon.

9Maayo pa ang kubus kag may alagad sang sa nagapadungug sang iya kaugalingon kag ginakulang sing kalan-on.

10Ang matarung nga tawo nagapakamahal sang kabuhi sang iya sapat, apang ang mahinoklogon nga mga kalooy sang malauton mapintas.

11Ang nagauma sang iya duta may madamung kalan-on; apang ang nagasonod sa walay pulus nawad-an sing paghangup.

12Ang malauton naghandum sang pukut sang malaut nga mga tawo, apang ang gamut sang mga matarung nagapamunga.

13Sa paglalis sang mga bibig yara ang siod sa malaut nga tawo, apang ang matarung magagowa gikan sa kagamo.

14Ang tawo mabusug sang maayo sa bunga sang iya baba, kag ang hinimoan sang mga kamut sang tawo ihatag sa iya.

15Ang dalanon sang buangbuang matarung sa iya kaugalingon nga mga mata, apang ang maalam nagapamati sa laygay.

16Ang kagamo sang buangbuang mahibaloan sa gilayon, apang ang mahalongon nagatago sang kahuluy-an.

17Ang nagamitlang sing kamatooran nagapahayag sing pagkamatarung, apang ang saksi nga dimatuud nagamitlang sing limbong.

18May dira nga nagapamolong sing madalas kaangay sang mga pagsuntok sang espada, apang ang dila sang maalam bolong.

19Ang bibig sang kamatooran palig-onon sa gihapon, apang ang dila nga butigon sa isa lamang ka tion.

20Ang limbong yara sa tagiposoon sang mga nagapadugi sing malaut, apang sa mga manuglaygay sang paghidait yara ang kalipay.

21Walay halit nga mahanabu sa matarung, apang ang malauton pun-on sang malaut.

22Ang mga bibig nga butigon kangil-aran sa Ginoo, apang ang mga nagahisayo sing minatuud amo ang iya kalipay.

23Ang tawo nga mahalongon nagatago sing ihibalo, apang ang tagiposoon sang buangbuang nagabantala sing kabuangan.

24Ang mga kamut sang makugihon magagahum, apang ang matamad ipasakup sa pangabudlay.

25Ang kabug-atan sa tagiposoon sang tawo nagapakoko sini, apang ang maayong polong nagapasadya sini.

26Ang matarung tuytuy sa iya isigkatawo, apang ang dalanon sang malauton nagapasayup sa ila.

27Ang matamad nga tawo wala nagaasal sang iya pinangayaman, apang ang bilidhon nga pagkabutang sang tawo tungud sa makugihon.

28Sa dalanon sang pagkamatarung yara ang kabuhi, kag sa iya banas walay kamatayon.

← Chapter 11 Jump to: Chapter 13 →