Proverbs 15

Ilonggo (Ang Biblia (1982))

← Chapter 14 Jump to: Chapter 16 →

1Ang mahomok nga panalabton nagapalugpay sang kasingkal, apang ang matigdas nga polong nagapaibwal sang kaakig.

2Ang dila sang maalam nagamitlang sang ihibalo sing matarung, apang ang baba sang mga buangbuang nagaula sing kabuangan.

3Ang mga mata sang Ginoo yara sa tagsa ka duug, nga nagabantay sang malaut kag maayo.

4Ang malolo nga dila amo ang kahoy sang kabuhi, apang ang pagkabalingag sa sini amo ang pagboong sang espiritu.

5Ang buangbuang nagatamay sang pagtudlo sang iya amay, apang ang nagasapak sang pagsabdong nagaagum sing paghalong.

6Sa balay sang matarung may madamung bahandi, apang sa mga kinitaan sang malauton may kagamo.

7Ang mga bibig sang mga maalam nagalapnag sing ihibalo; ang tagiposoon sang buangbuang wala nagahimo sing amo.

8Ang halad sang malauton kangil-aran sa Ginoo, apang ang pangamuyo sang matadlong amo ang iya kalipay.

9Kangil-aran sa Ginoo ang dalanon sang malauton, apang nagahigugma sia sa iya nga nagasonod sang pagkamatarung.

10May matigdas nga pagtudlo sa nagabiya sang dalanon; ang nagadumut sang pagsabdong mapatay.

11Ang Sheol kag ang Kalaglagan yara sa atubangan sang Ginoo, daw ano pa gid niyan ang mga tagiposoon sang mga anak sang mga tawo!

12Ang mayubiton wala nagahigugma nga pagsabdongon; indi sia magkadto sa maalam.

13Ang tagiposoon nga masadya nagahimo sing malipayon nga nawung, apang sa kasubo sang tagiposoon ang espiritu naboong.

14Ang tagiposoon sang may paghangup nagapangita sing ihibalo, apang ang baba sang mga buangbuang nagakabuhi sa kabuangan.

15Ang tanan nga adlaw sang napiotan malaut, apang ang malipayon sing tagiposoon may dalayon nga piesta.

16Maayo pa ang diotay nga naupdan sang kahadluk sa Ginoo sang sa dakung bahandi kag may kagamo sa sini.

17Maayo pa ang pagkaon nga mga utan diin may gugma sang sa pinatambok nga baka kag may dumut sa sini.

18Ang masingkal nga tawo nagapaibwal sing pagbanggianay, apang ang makuli sa pagpangakig nagapalugpay sang kasuayon.

19Ang dalan sang matamad subong sang habong nga tunukon, apang ang banas sang matadlong nahimo nga dalan.

20Ang anak nga maalam nagahimo sing amay nga malipayon, apang ang buangbuang nga tawo nagatamay sa iya iloy.

21Ang kabuangan kalipay sang nawad-an sang kaalam, apang ang tawo nga mahangponon nagatadlong sang iya paglakat.

22Sa wala sing laygay, ang mga katuyoan napaslawan, apang sa kadam-an sang mga manuglaygay napalig-on sila.

23Ang tawo may kalipay sa sabat sang iya baba, kag ang polong sa nagakaigo nga dag-on, daw ano kaayo!

24Sa maalam ang dalanon sang kabuhi nagapaibabaw, agud nga magtaliwan sia gikan sa Sheol sa idalum.

25Ang Ginoo magagabut sang balay sang bugalon, apang magapalig-on sia sang dulunan sang balo nga babayi.

26Ang malaut nga mga pahito kangil-aran sa Ginoo, apang ang mga polong nga matahum putli.

27Ang dalok sang daug nagagamo sang iya kaugalingon nga balay, apang ang nagadumut sang mga hamham magakabuhi.

28Ang tagiposoon sang matarung nagatoon sa pagsabat, apang ang baba sang malauton nagaula sang malaut nga mga butang.

29Ang Ginoo malayo sa malauton, apang nagapamati sia sang pangamuyo sang matarung.

30Ang kapawa sang mga mata nagalipay sang tagiposoon, kag ang maayo nga mga balita nagapatambok sang mga tul-an.

31Ang idulungug nga nagapamati sang pagsabdong sang kabuhi magapabilin sa tunga sang mga maalam.

32Ang nagadumili sang pagtudlo nagatamay sang iya kaugalingon nga kalag, apang ang nagapamati sa pagsabdong nagaagum sing paghangup.

33Ang kahadluk sa Ginoo amo ang pagtudlo sang kaalam, kag ang pagpaubus nagauna sa dungug.

← Chapter 14 Jump to: Chapter 16 →