Proverbs 13

Ilonggo (Ang Biblia (1982))

← Chapter 12 Jump to: Chapter 14 →

1Ang anak nga maalam nagapamati sang pagtudlo sang iya amay, apang ang mayubiton wala nagapamati sang badlong.

2Ang tawo magakaon sang maayo sa bunga sang iya baba, apang ang kalag sang maluib magakaon sang panglugus.

3Ang nagabantay sang iya baba nagatipig sang iya kabuhi; ang nagabuka sing malapad sang iya mga bibig may kalaglagan.

4Ang kalag sang matamad nagahandum, kag walay bisan ano, apang ang kalag sang makugihon magatambok.

5Ang matarung nga tawo nagadumut sang pagbutig, apang ang malauton nga tawo kangil-aran, kag nagalambut sa kahuluy-an.

6Ang pagkamatarung nagabantay sang matadlong sa dalanon, apang ang pagkamalaut nagalaglag sang makasasala.

7May dira nga nagapakamanggaranon, apang walay bisan ano; may yara nga nagapakaimol, apang may dakung pagkabutang.

8Ang gawad sang kabuhi sang tawo amo ang iya manggad, apang ang imol wala nagapamati sang pamahog.

9Ang kapawa sang matarung nagakalipay, apang ang suga sang malauton palongon.

10Tungud sa bugal nagaabut lamang ang binanggianay, apang sa nalaygayan sing maayo yara ang kaalam.

11Ang pagkabutang nga naagum sa kadayawan magabuhin, apang ang nagatipon sa pagpangabudlay magadugang.

12Ang paglaum nga napalantang nagapasakit sang tagiposoon, apang kon mag-abut ang handum, ini kahoy sang kabuhi.

13Ang bisan sin-o nga nagatamay sang polong nagadala sing kalaglagan sa iya kaugalingon, apang ang nagakahadluk sang sogo balusan.

14Ang kasogoan sang maalam amo ang tuburan sang kabuhi, agud nga ang isa makapalagyo sa mga siod sang kamatayon.

15Ang maayo nga paghangup nagahatag sing pagpahamuut, apang ang dalanon sang malalison maiwat.

16Ang tagsa ka mahalongon nga tawo nagapangabudlay nga may ihibalo, apang ang buangbuang nagapadayag sang iya kabuangan.

17Ang malaut nga manugbalita nagakaholog sa malaut, apang ang matutum nga embajador bolong.

18Kaimolan kag kahuluy-an iya sang nagadumili sang pagtudlo, apang ang nagasapak sang pagsabdong padunggan.

19Ang handum nga natuman matam-is sa kalag; apang kangil-aran sa mga buangbuang ang pagbiya sa malaut.

20Maglakat upud sa maalam nga mga tawo kag manginmaalam ka, apang ang kaupdanan sang mga buangbuang magaantus.

21Ang malaut nagalagas sa mga makasasala, apang ang matarung balusan sing kaayohan.

22Ang maayong tawo nagabilin sing palanublion sa mga anak sang iya anak, kag ang pagkabutang sang makasasala natipon tungud sa matarung.

23Ang madamung kalan-on yara sa palangumhan sang imol, apang may yara nga ginalaglag paagi sa dikatarungan.

24Ang nagapugung sang iya bilogon nagadumut sang iya anak, apang ang nagahigugma sa iya nagasilot sa iya sa nagakaigo nga tion.

25Ang matarung nagakaon tubtub sa kabulusgan sang iya kalag, apang ang tiyan sang malauton mawad-an.

← Chapter 12 Jump to: Chapter 14 →