Proverbs 8

Ilonggo (Ang Biblia (1982))

← Chapter 7 Jump to: Chapter 9 →

1Wala bala nagasinggit ang kaalam, kag nagapagowa sang iya tingug ang paghangup?

2Sa putokputokan sang mataas nga mga duug sa luyo sang dalan, sa ginkitaan sang mga banas nagatindug sia;

3sa luyo sang mga gawang sa salamputan sang banwa, sa pagsulud sa mga ganhaan nagasinggit sia sing mabaskug:

4“Sa inyo, O mga tawo, nagapanawag ako, kag ang akon tingug nga sa mga anak sang mga tawo.

5O kamo nga mga kulangkulang, hangpa ang paghalong; kamo nga mga buangbuang, magmahangponon sing tagiposoon.

6Pamati, kay magapamolong ako sang maayo gid nga mga butang, kag ang pagbungat sang akon mga bibig manginmatarung nga mga butang;

7kay ang akon baba magamitlang sang kamatooran; ang pagkamalaut kangil-aran sa akon mga bibig.

8Ang tanan nga polong sang akon baba mga pagkamatarung; wala sing tiko ukon balingag sa ila.

9Sila tanan maathag sa iya nga nagahangup kag matarung sa ila nga makakita sing ihibalo.

10Batona ang akon pagtudlo kag indi ang pilak, kag ang ihibalo sang sa pinili nga bulawan;

11kay ang kaalam maayo pa sa mga rubi, kag ang tanan nga butang nga mahandum indi mapaanggid sini.

12Ako, nga kaalam, naghimo sang paghalong nga akon puluy-an, kag nakakita sang ihibalo kag sang pagbinagbinag.

13Ang kahadluk sa Ginoo amo ang pagdumut sang malaut. Ang bugal kag palabilabi kag ang dalan nga malaut kag ang balingag nga baba ginadumtan ko.

14Akon ang laygay kag ang maayo nga ihibalo, ako ang paghangup, may gahum ako.

15Tungud sa akon nagahari ang mga hari, kag ang mga dungganon, nagamando sing katarungan;

16tungud sa akon nagagahum ang mga principe, kag ang mga dungganon, bisan ang tanan nga hukom sang duta.

17Ako nagahigugma sa mga nagahigugma sa akon, kag ang mga nagapangita sa akon sing makugihon makakita sa akon.

18Ang manggad kag dungug yari sa akon, ang nagapadayon nga pagkabutang kag pagkamatarung.

19Ang akon bunga maayo pa sa bulawan, bisan sang bus-og nga bulawan, kag ang akon patubas sang sa pinili nga pilak.

20Nagalakat ako sa dalanon sang pagkamatarung, sa tunga sang mga banas sang katarungan,

21agud nga mapapanubli ko sing pagkabutang ang mga nagahigugma sa akon, kag agud nga mapuno ko ang ila mga bahandian.

22Ang Ginoo nag-angkon sa akon sa pagpamuno sang iya dalanon, sa wala pa ang iya mga binuhatan sang dumaan.

23Ginpahamtang ako kutub sa gihapon, kutub sa pamuno sa wala pa ang duta.

24Sang wala pa sing mga kadadalman natawo ako, sang wala pa sing mga tuburan nga bugana sing tubig.

25Sa wala pa mapahamtang ang kabukiran, sa wala pa ang kabakoloran, natawo ako;

26sang wala pa gid niya mahimo ang duta ukon ang mga latagon, ukon ang pamuno sang yab-ok sang kalibutan.

27Sang gintukud niya ang mga langit, yadto didto ako, sang nagpahamtang sia sing manipolon sa nawung sang kadadalman,

28sang ginpalig-on niya ang mga kahawaan sa ibabaw, sang nagbakud ang mga tuburan sang kadadalman

29sang ginhatag niya sa dagat ang iya dulunan, agud nga ang mga tubig indi maglapas sa iya sogo, sang ginlatidan niya ang mga sadsaran sang duta,

30niyan yara ako sa luyo niya, subong nga pangolo nga manugpangabudlay; kag ako ang iya kalipay adlawadlaw, nga nagakasadya sing dayon sa atubangan niya,

31nga nagakasadya sa iya duta nga sarang mapuy-an kag ang akon kalipay yara kaupud sa mga anak sang mga tawo.

32Busa karon, mga anak ko, pamati sa akon: kay bulahan ang mga nagabantay sang akon mga dalanon.

33Pamatii ang pagtudlo kag magmaalam, kag dili pagdumilii ini.

34Bulahan ang tawo nga nagapamati sa akon, nga nagabantay adlawadlaw sa akon mga gawang, nga nagahulat sa mga bakalan sang akon mga ganhaan.

35Kay kon sin-o ang makakita sa akon makakita sing kabuhi kag makaagum sing kahamuut sa Ginoo;

36apang ang nagapakasala batok sa akon nagadaut sa iya kaugalingon nga kalag; sila tanan nga nagadumut sa akon nagahigugma sang kamatayon.”

← Chapter 7 Jump to: Chapter 9 →