Proverbs 19

Ilonggo (Ang Biblia (1982))

← Chapter 18 Jump to: Chapter 20 →

1Maayo pa ang imol nga nagalakat sa iya pagkadungganon sang sa balingag sa iya mga bibig, kag buangbuang.

2Ang kalag man nga wala sing ihibalo indi maayo, kag ang madalas sa iya mga tiil nagapakasala.

3Ang kabuangon sang tawo nagapatiko sang iya dalanon, ang iya tagiposoon naakig sa Ginoo.

4Ang pagkabutang nagadugang sing madamu nga abyan, apang ang imol ginabulagan sang iya abyan.

5Ang saksi nga dimatuud indi makaluwas sa silot, kag ang nagamitlang sing kabutigan dili makapalagyo.

6Madamu ang magapakilooy sang kahamuut sang tawo nga maalwan, kag ang tagsa ka tawo abyan sa nagahatag sing mga dolot.

7Ang tanan nga utud sang imol nagadumut sa iya; daw ano pa gid ang pagpalayo sang iya mga abyan sa iya! Ginalagas niya sila sang mga polong, apang sila wala na.

8Ang nagakuha sing kaalam nagahigugma sa iya kalag; ang nagahuput sing paghangup makakita sing kaayohan.

9Ang saksi nga dimatuud indi makaluwas sa silot, kag ang nagamitlang sing kabutigan mawala.

10Ang kabuhi nga madayaw indi angay sa buangbuang, labi pa gid kakubus sang alagad nga maggahum sa mga principe.

11Ang pagbinagbinag sang tawo nagapakuli sa iya sa pagpangakig, kag himaya niya ang pagpasaylo sang paglalis.

12Ang kasingkal sang hari subong sang pagngurub sang leon, apang ang iya kahamuut subong sang ton-og sa hilamon.

13Ang anak nga buangbuang kalalat-an sang iya amay, kag ang mga kasuayon sang asawa dalayon nga pagtolo.

14Ang balay kag ang manggad panublion gikan sa mga ginikanan, apang ang mahalongon nga asawa gikan sa Ginoo.

15Ang pagkatamad nagapahamook sang katologon, kag ang kalag nga matamad magaantus sing gutum.

16Ang nagabantay sang sogo nagabantay sang iya kalag; apang ang mapatumbayaon sang iya mga dalanon mapatay.

17Ang nagakaawa sa imol nagapahulam sa Ginoo, kag ang iya maayo nga buhat bayaran sia niya.

18Disiplinaha ang imo anak sa ginatan-aw nga may paglaum; dili pag-ipahamtang ang imo tagiposoon sa paglaglag sa iya.

19Ang tawo nga daku sing kasingkal magaantus sang silot; kay kon luwason mo sia, himoon mo pa ini liwat.

20Pamatii ang laygay kag batona ang pagtudlo, agud nga magmaalam ka sa imo kaolihian.

21May madamu nga mga pahito sa tagiposoon sang tawo, apang ang laygay sang Ginoo magapadayon.

22Ang nagapahandum sa tawo amo ang iya pagkalolo, kag ang imol nga tawo maayo pa sa butigon.

23Ang kahadluk sa Ginoo nagapadolong sa kabuhi; kag ang may iya sini magakabuhi sia nga busug; indi sia pagduawon sang malaut.

24Ang matamad nagaloog sang iya kamut sa pinggan, kag indi buut bisan magdala sini sa iya baba.

25Sakita ang mayubiton, kag ang kulangkulang magatoon sing paghalong; sabdonga ang mahangponon, kag magahangup sia sing ihibalo.

26Ang nagapintas sa iya amay kag nagalagas sang iya iloy amo ang anak nga nagapakahuya kag nagadala sing pagtamay.

27Untat ka, anak ko, sa pagpamati sing pagtudlo lamang sa pagsayup gikan sa mga polong sang ihibalo.

28Ang wala sing pulus nga saksi nagayubit sa katarungan, kag ang baba sang malauton nagahalunhon sang kalautan.

29Ang mga paghukom ginaaman sa mga mayubiton, kag ang mga lapdus sa likod sang mga buangbuang.

← Chapter 18 Jump to: Chapter 20 →