Proverbs 6

Ilonggo (Ang Biblia (1982))

← Chapter 5 Jump to: Chapter 7 →

1Anak ko, kon manginmanugpalig-on ka sa imo isigkatawo, kon magpakigdagpi ka sang imo kamut tungud sa dumuloong;

2nasiod ka sang mga polong sang imo baba, nakuha ka sang mga polong sang imo baba,

3himoa ini karon, anak ko, kag luwason ang imo kaugalingon, sa ginatan-aw nga nag-abut ka sa kamut sang imo isigkatawo: lakat, paubsa ang imo kaugalingon, kag pakilooyi ang imo isigkatawo.

4Dili pagpatologa ang imo mga mata ukon pagpatuyoha ang imo mga ilalakub;

5luwasa ang imo kaugalingon subong sang usa nga babayi gikan sa kamut sang mangangayam, subong sang pispis gikan sa kamut sang manugpispis.

6Kadto sa subay, ikaw nga matamad; patugsilingi ang iya mga dalanon, kag magmaalam.

7Sa wala sing pangolo, manugtatap, ukon manuggahum,

8nagatigana sia sang iya tinapay sa tingadlaw, kag nagatipon sang iya kalan-on sa tig-alani.

9Tubtub bala san-o ang pagtolog mo, O matamad? San-o bala ang pagbangon mo sa imo katologon?

10Apang ang diotay nga tolog, diotay nga katuyo, ang diotay nga panimuko sang mga kamut sa pagtolog,

11sa amo magaabut ang imo kaimolon subong sang buyong, kag ang imo kinawad-on subong sang tawo nga lupit sa hinganiban.

12Tawo nga wala sing pulus, tawo sang kalautan, amo sia nga nagalakat nga may balingag nga baba,

13nga nagapamisuk sang iya mga mata, nga nagapamolong sa iya mga tiil, nga nagasinyas sang iya mga tudlo,

14nga may tagiposoon nga balingag nga nagapahito sing malaut, nga nagasab-ug sing kasuayon sa dalayon;

15busa magaabut sing hinali ang iya kalalat-an; sa hinali balion sia nga indi na mabolong.

16May anum ka butang nga ginadumtan ang Ginoo, pito nga kangil-aran sa iya:

17ang mga mata nga palabilabihon, ang dila nga butigon, kag ang mga kamut nga nagapaagay sing dugo nga wala sing sala,

18ang tagiposoon nga nagapahito sing mga tinutuyo nga malaut, ang mga tiil nga madasig magdalagan sa panistis,

19ang dimatuud nga saksi nga nagamitlang sing mga butig, kag sia nga nagasab-ug sing kasuayon sa tunga sang mga kauturan.

20Anak ko, bantayi ang sogo sang imo amay, kag dili pagbayai ang kasogoan sang imo iloy.

21Ihigot sila sing dalayon sa imo tagiposoon; ibugkos sila sa imo liog.

22Kon maglakat ka, magatuytuy ini sa imo; kon magtolog ka, magabantay ini sa imo; kon magmata ka, magahambal ini sa imo.

23Kay ang sogo amo ang suga kag ang kasogoan kapawa, kag ang mga pagsabdong sang pagtudlo amo ang dalan sang kabuhi,

24sa pagbantay sa imo gikan sa malaut nga babayi, gikan sa pag-oloolo sang dila sang dumuloong.

25Dili ka magkaibog tungud sa iya kaayoayo sa imo tagiposoon, kag dili sia pagpabihaga sa imo tungud sa iya mga ilalakub;

26kay tungud sa babayi nga makihilawason ang tawo ginadul-ong sa isa ka tipik nga tinapay, kag ang babayi nga makihilahion nagapangayam sang bilidhon nga kabuhi.

27Makabutang bala ang lalaki sing kalayo sa iya sabak kag indi masonog ang iya mga panapton?

28Ukon makalakat bala ang isa sa mainit nga mga baga kag indi mapaso ang iya mga tiil?

29Amo man ang nagahiusa sa asawa sang iya isigkatawo; ang bisan sin-o nga nagatandug sa iya indi pagkabigon nga wala sing sala.

30Wala bala ang mga tawo nagatamay sang makawat kon mangawat sia sa pagbusug sang iya kaugalingon kon gutum sia?

31Apang kon madakpan sia, magauli sia sing pito ka pilo; ihatag niya ang tanan nga pagkabutang sang iya balay.

32Ang nagapanglahi sa babayi nawad-an sing paghangup; nagahimo sini ang buut maglaglag sang iya kalag.

33Mga pilas kag pagkadidungganon ang maagum niya, kag ang iya kahuluy-an indi mapanas.

34Kay ang kaimon amo ang kasingkal sang tawo, kag indi sia magpasaylo sa adlaw sang pagtimalus.

35Indi sia magsapak sing bisan ano nga gawad, kag indi sia maayawan bisan maghatag ka sing madamu nga dolot.

← Chapter 5 Jump to: Chapter 7 →