Proverbs 20

Ilonggo (Ang Biblia (1982))

← Chapter 19 Jump to: Chapter 21 →

1Ang alak manug-uligyat, ang ilimnon nga masingkal amo ang manugpagahud; kag bisan sin-o nga nagasayup sa sini indi maalam.

2Ang kakugmat sa hari subong sang pagngurub sang leon; ang nagapaakig sa iya nagapakasala batok sa iya kaugalingon nga kabuhi.

3Kadungganan sang tawo nga magpahilayo sa kasuayon; apang ang tagsa ka buangbuang magapakig-away.

4Ang matamad indi mag-arado bangud sang tigtulugnaw; busa magapakilimos sia sa tig-alani kag wala sia.

5Ang laygay sa tagiposoon sang tawo kaangay sang tubig nga madalum, apang ang tawo nga mahangponon nagasag-ub sini.

6Kalabanan sang mga tawo magabantala ang tagsatagsa sang iya kaugalingon nga kalolo, apang ang tawo nga matutum sin-o bala ang makakita?

7Ang matarung nga tawo nga nagalakat sa iya pagkadungganon— bulahan ang iya mga anak sa olihi niya!

8Ang hari nga nagalingkod sa trono nga hukmanan nagapatal-as sang tanan nga malaut tungud sang iya mga mata.

9Sin-o bala ang makasiling, “Ako nagtinlo sang akon tagiposoon; matinlo ako gikan sa akon sala”?

10Sarisari nga mga itilimbang kag sarisari nga mga sulukban sila nga duha alangay nga kangil-aran sa Ginoo.

11Bisan ang bata nagapakilala paagi sa iya mga binuhatan, kon putli ang iya buhat kag kon matarung ini.

12Ang idulungug nga nagapamati kag ang mata nga nagatan-aw, ang Ginoo naghimo bisan sa ila nga duha.

13Dili paghigugmaa ang katologon, basi nga mag-imol ka; muklata ang imo mga mata, kag mabusug ka sang tinapay.

14“Malain, malain,” nagasiling ang manugbakal; apang sang nakalakat sia, niyan nagapabugal sia.

15May bulawan, kag bugana nga mga rubi; apang ang mga bibig sang ihibalo huluyason nga bilidhon.

16Kuhaa ang iya panapton nga inugpalig-on nga sa dumuloong, kag punggi sia sa kalig-onan nga inugpalig-on tungud sa babayi nga tagaluwas.

17Ang kalan-on sang kabutigan matam-is sa tawo, apang sa olihi ang iya baba mapuno sing magagmay nga bato.

18Ang tagsa ka katuyoan ginapalig-on tungud sa laygay; tungud sa maalam nga pag-ubay himoa ang inaway.

19Ang nagalagaw subong nga palalibak nagapahayag sang mga tinago; busa dili ka mag-upud sa nagahitad sang iya mga bibig.

20Ang nagapakamalaut sang iya amay ukon sang iya iloy, ang iya suga pagapalongon sa pitipit nga kadudulman.

21Ang panublion maagum sing madali sa kamunoan apang ang iya katapusan indi manginbulahan.

22Dili ka magsiling, “Ako magatimalus sang malaut”; hulata ang Ginoo, kag sia magaluwas sa imo.

23Ang sarisari nga itilimbang kangil-aran sa Ginoo, kag ang malimbongon nga timbangan indi maayo.

24Ang mga paglakat sang tawo gikan sa Ginoo; paano bala niyan ang paghangup sang tawo sang iya dalanon?

25Siod sa tawo ang pagsiling sing madali, “Balaan ini,” kag sa tapus na ang mga saad magpangusisa.

26Ang hari nga maalam nagatahup sang mga malauton, kag ginapaligis sila sa aliling sang linasan.

27Ang espiritu sang tawo amo ang suga sang Ginoo, nga nagausisa sang tanan niya nga mga bahin nga nasulud gid.

28Ang kalolo kag kamatooran nagatipig sang hari, kag ang iya trono ginatib-ong sang kalolo.

29Ang himaya sang mga pamatan-on nga lalaki amo ang ila kusug, kag ang katahum sang mga tigulang amo ang ubanon nga olo.

30Ang mga lapdus nga nagapilas nagatinlo sang malaut; ang mga bunal nagatudok sa mga bahin nga nasulud gid.

← Chapter 19 Jump to: Chapter 21 →