Proverbs 7

Ilonggo (Ang Biblia (1982))

← Chapter 6 Jump to: Chapter 8 →

1Anak ko, bantayi ang akon mga polong kag tipigi sa imo ang akon mga sogo;

2bantayi ang akon mga sogo kag magkabuhi, ang akon kasogoan subong sang tawotawo sang imo mata;

3isabud sila sa imo mga tudlo, isulat sila sa tapitapi sang imo tagiposoon.

4Isiling sa kaalam, “Utud ko ikaw nga babayi,” kag tawga nga himata mo nga babayi ang paghangup;

5agud nga mapalikaw ka nila sa babayi nga tagaluwas, gikan sa dumuloong nga nagaoloolo sa iya mga polong.

6Kay sa talambuan sang akon balay naglingling ako sa akon mga balatibat,

7kag nakita ko sa tunga sang mga kulangkulang, nakilala ko sa tunga sang mga pamatan-on, ang isa ka pamatan-on nga lalaki nga nawad-an sing paghangup,

8nga nagaagi sa dalan malapit sa iya likoan, nga nagaagi sa dalan pakadto sa iya balay

9sa kasisidmun, sa kahaponon sang adlaw, sa tunga sang kagab-ihon kag sa kadudulman.

10Kag yari karon, may babayi nga nagsugata sa iya, nga napanaptan sang iya sang babayi nga makihilawason, kag malalangon sing tagiposoon.

11Babaan sia kag mabuutbuuton, ang iya mga tiil wala nagapahimonong sa iya balay;

12karon yara sia sa mga dalan, karon yara sa mga nakawaan, kag nagapuut sa tagsa ka likoan.

13Gani gindakup niya ang lalaki kag ginhalukan sia, kag sa nawung nga lampingasan nagsiling sia sa iya:

14“Ako may mga halad sang mga halad sa paghidait, sini nga adlaw nabayaran ko ang akon mga saad;

15busa naggowa ako sa pagsugata sa imo, sa pagpangita sing makugi sang imo nawung, kag nakita ko ikaw.

16Ang akon higdaan nahumlaran ko sing mga banig, sing sinamayan nga mga panapton gikan sa binulong sang Egipto;

17ginpahamutan ko ang akon higdaan sang mira, mga aloe, kag sang mga canela.

18Kari, magpahobog kita sang gugma tubtub sa aga; magpangalipay kita sa mga pagdalo.

19Kay ang lalaki wala sa balay; naglakat sia sa malayo nga panlakatan;

20nakadala sia sa iya sing isa ka puyo nga cuarta; magapauli sia sa ugsad.”

21Gindaug sia niya sa iya tama kayuyum nga paghambal; ginpilit sia niya sa pag-oloolo sang iya mga bibig.

22Sa gilayon nagsonod sia sa iya, subong sang baka nga nagapakadto sa ihawan, ukon subong sang isa sa mga grilyos pakadto sa pagsabdong sang buangbuang

23tubtub nga ang baslay maglapus sa iya atay; subong sang pispis nga nagadalidali sa siod; wala sia makahibalo nga ini tungud sa iya kabuhi.

24Busa karon, mga anak ko, pamati sa akon, kag magtalupangud sa mga polong sang akon baba.

25Dili pagpalipasa ang imo tagiposoon sa iya mga dalanon, dili magtalang sa iya mga banas;

26kay napilak niya ang madamu nga pilason; hoo, ang tanan nga ginpamatay niya gamhanan nga kasoldadosan.

27Ang iya balay amo ang dalan pakadto sa Sheol, nga nagadulhog sa mga hulut sang kamatayon.

← Chapter 6 Jump to: Chapter 8 →