Proverbs 21

Ilonggo (Ang Biblia (1982))

← Chapter 20 Jump to: Chapter 22 →

1Ang tagiposoon sang hari yara sa kamut sang Ginoo subong sang mga iligan sang tubig; ginaliso niya ini sa bisan diin ang buut niya.

2Ang tagsa ka dalanon sang tawo matadlong sa iya kaugalingon nga mga mata, apang ang Ginoo nagatimbang sang mga tagiposoon.

3Ang paghimo sang pagkamatarung kag katarungan labi pa ka kalahamut-an sa Ginoo sang sa halad.

4Ang matinaastaason nga panolok kag ang bugalon nga tagiposoon, ang suga sang malauton, ini sila sala.

5Ang mga hunahuna sang mapisan nagapadolong lamang sa kabuganaan, apang ang tagsatagsa nga madalas nagadalidali lamang sa kinawad-on.

6Ang pagkuha sing mga bahandi paagi sa dila nga butigon amo ang alisngaw nga ginapalid pakadto pakari sang mga nagapangita sang kamatayon.

7Ang pagkalugus sang mga malauton magasilhig sa ila, bangud nga nagadumili sila sa paghimo sang katarungan.

8Ang dalanon sang nalulanan sing sala tama ka tiko, apang ang binuhatan sang putli matarung.

9Maayo pa ang pagpuyo sa pamusud sang atop sang sa mag-upud sa masuayon nga babayi sa balay nga masangkad.

10Ang kalag sang malauton nagahandum sing malain; ang iya isigkatawo wala makakita sing kahamuut sa iya mga mata.

11Kon ang mayubiton silotan, ang kulangkulang ginapaalam; kon ang maalam tudloan, nagabaton sia sing ihibalo.

12Ang matarung nga tawo nagapatugsiling sang balay sang malauton; kon paano nga ang malauton ginalandas sa ila kalaglagan.

13Ang bisan sin-o nga nagapabungul sa pagsinggit sang imol sia man magasinggit apang indi sia pagpamatian.

14Ang dolot sa tago nagapalugpay sang kaakig; kag ang hatag sa sabak, sang mabaskug nga kasingkal.

15Kalipay sang matarung ang paghimo sing katarungan, apang kalaglagan ini sa mga manughikot sang kalautan.

16Ang tawo nga nagalipas sa dalan sang paghangup magapahuway sa katilingban sang mga patay.

17Ang nagahigugma sang kalipayan mangin-imol nga tawo; ang nagahigugma sang alak kag lana indi magmanggaranon.

18Ang malauton gawad tungud sa matarung, kag ang mabudhion nagaabut sa baylo sang matadlong.

19Maayo pa nga magapuyo sa desiertong duta sang sa mag-upud sa babaying masuayon kag maakigon.

20May bahandi nga bilidhon kag lana sa puluy-an sang maalam, apang ang tawo nga buangbuang nagahalunhon sini.

21Ang nagasonod sa pagkamatarung kag kalolo makakita sing kabuhi, pagkamatarung, kag dungug.

22Ang maalam nga tawo nagataklas sang banwa sang gamhanan kag nagadala sa idalum sang kusug nga iya ginasaligan.

23Ang bisan sin-o nga nagabantay sang iya baba kag sang iya dila nagabantay sang iya kalag gikan sa kalisdanan.

24Ang bugalon kag palabilabihon nga tawo, “Mayubiton” amo ang iya ngalan nga nagahikot sa pagkamatinaastaason sang bugal.

25Ang handum sang matamad nagapatay sa iya kay ang iya mga kamut nagadumili sa pagpangabudlay.

26May dira nga nagahamkon sing hinakog sa bug-os nga adlaw, apang ang matarung nagahatag kag wala nagapugung.

27Ang halad sang malauton kangil-aran; daw ano pa gid kon dalhon niya ini nga may malaut nga hunahuna.

28Ang saksi nga dimatuud mawala, apang ang tawo nga nagapamati magapamolong sang amo agud nga magpadayon.

29Ang tawo nga malaut nagapadamul sang iya nawung, apang ang matadlong nagapalig-on sang iya mga dalanon.

30Walay kaalam, ukon paghangup, ukon laygay, makadaug sa Ginoo.

31Ang kabayo nahanda sa adlaw sang inaway, apang ang pagdaug gikan sa Ginoo.

← Chapter 20 Jump to: Chapter 22 →