Proverbs 25

Ilonggo (Ang Biblia (1982))

← Chapter 24 Jump to: Chapter 26 →

1Ini sila man mga hulubaton ni Salomon, nga ginhuwad sang mga tawo ni Ezequias nga hari sang Juda.

2Himaya sang Dios ang pagtago sing butang, apang ang himaya sang mga hari amo ang pag-usisa sang butang.

3Subong sang mga langit sa kataason, kag sang duta sa kadalumon, sa amo ang tagiposoon sang mga hari dimatungkad.

4Kuhaa ang buay sa pilak, kag nagagowa ang isa ka suludlan nga sa manug-ulay;

5kuhaa ang malauton sa atubangan sang hari, kag ang iya trono mapalig-on sa pagkamatarung.

6Dili ka magpakig-agaw sing una sa atubangan sang hari kag dili ka magtindug sa duug sang dalagku nga mga tawo;

7kay maayo pa nga silingan ka, “Saka ka diri,” sang sa ibutang ka sa manubo pa sa atubangan sang principe. Ang nakita sang imo mga mata

8dili pagdalhon sing dalidali sa corte; kay ano bala ang himoon mo sa olihi sini, kon pakahuy-an ka sang imo isigkatawo?

9Baisi ang imo kasaba upud sa imo isigkatawo, kag dili pag-ibuyagyag ang tinago sang iban;

10basi pasipalahan ka sang makabati sini, kag ang imo kahuluy-an indi madula.

11Ang polong nga napamolong sing nagakaigo kaangay sang mga mansanas nga bulawan sa pinuna nga pilak.

12Subong sang aritos nga bulawan kag puni nga bulawan nga bus-og amo ini ang manugsabdong nga maalam sa idulungug nga matinumanon.

13Subong sang katugnaw sang nieve sa tig-alani amo ini ang manugtunda nga matutum sa mga nagapadala sa iya, kay ginapaumpawan niya ang kalag sang iya mga agalon.

14Subong sang mga gal-um kag hangin nga wala sing ulan amo ini ang nagapabugal sing dimatuud sang iya mga hiyas.

15Tungud sa malawig nga pagpaumud nabuyuk ang manugdumala, kag ang dila nga mahomok nagaboong sang tul-an.

16Nakakita ka bala sing dugus, kaon ka sing tuman sa imo, basi nga butlaon ka sini kag isuka ini.

17Magpanalagsa ang imo tiil sa balay sang imo isigkatawo, basi kon tak-an sia sa imo kag dumtan ka.

18Ang tawo nga nagasaksi sing dimatuud batok sa iya isigkatawo isa ka maso, kag espada, kag baslay nga mataliwis.

19Ang pagsalig sa tawo nga dimatutum sa tion sang kalisud kaangay sang naboong nga ngipon kag tiil nga nagliw-as.

20Subong sang isa nga nagauba sang panapton sa dag-on sang tugnaw kag subong sang langgaw sa sosa, amo ini ang nagaamba sing mga ambahanon sa mabug-at sing tagiposoon.

21Kon gutum ang imo kaaway, hatagi sia sing kalan-on; kag kon ginauhaw sia, hatagi sia sing tubig nga imnun;

22kay magatumpi ka sing mga baga sa iya olo, kag ang Ginoo magabalus sa imo.

23Ang amihan nagadala sing ulan; kag ang dila nga malibakon, sing nawung nga maakigon.

24Maayo pa magpuyo sa pamusud sang atop sang sa mag-upud sa babayi nga masuayon sa masangkad nga balay.

25Subong sang mabugnaw nga mga tubig sa kalag nga nauhaw, amo ini ang maayo nga balita nga nagahalin sa malayo nga duta.

26Subong sang tuburan nga natublag kag tuburan nga mahigko amo ini ang matarung nga nagapasugut sa atubangan sang malauton.

27Indi maayo ang pagkaon sing madamu nga dugus, gani tama kalain sa mga tawo ang pagpangita sang ila kaugalingon nga himaya.

28Ang wala sing pagpugung sa iya espiritu kaangay sang banwa nga guba kag wala sing mga kuta.

← Chapter 24 Jump to: Chapter 26 →