Proverbs 5

Ilonggo (Ang Biblia (1982))

← Chapter 4 Jump to: Chapter 6 →

1Anak ko, talupangda ang akon kaalam, ilingig ang imo idulungug sa akon paghangup;

2agud nga matipigan mo ang pagbinagbinag, kag agud nga ang imo mga bibig makabantay sang ihibalo.

3Kay ang mga bibig sang babayi nga malain nagapatolo sing dugus, kag ang iya baba madanlug pa sa lana;

4apang sa katapusan mapait sia subong sang ajenjo, matalum subong sang espada nga duha sing sulab.

5Ang iya mga tiil nagapanaug sa kamatayon; ang iya mga tikang nagalambut sa Sheol;

6gani wala sia makakita sang matapan nga banas sang kabuhi; ang iya mga dalanon wala sing kalig-onan, kag wala sia makahibalo sini.

7Busa karon, mga anak ko, pamatii ako, kag dili magbiya sa mga polong sang akon baba.

8Ipalayo sa iya ang imo dalan, kag dili magpalapit sa ganhaan sang iya balay;

9basi kon ihatag mo sa iban ang imo dungug kag ang imo mga tuig sa mapintas;

10basi kon mapuno ang mga dumuloong sang imo kusug, kag ang imo mga pagpangabudlay manginsa balay sang dumuloong;

11kag magakalisud ka sa imo kaolihian, kon ang imo unud kag ang imo lawas mahagas,

12kag magsiling, “Daw ano ang pagdumut ko sang pagtudlo, kag ang akon tagiposoon nagtamay sang pagsabdong!

13Wala ako magtuman sang tingug sang akon mga manunudlo ukon naglingig sang akon idulungug sa mga nagtudlo sa akon.

14Malapit na ako sa tanan nga malaut sa tunga sang pagtilipon kag sang katilingban.”

15Inum sing mga tubig sa imo suluptan, sa nagailig nga mga tubig gikan sa imo kaugalingon nga bobon.

16Maglapta bala sa gowa ang imo mga tuburan, ang mga ilig sang tubig sa mga dalan?

17Manginsa imo kaugalingon lamang sila, kag indi sa mga dumuloong upud sa imo.

18Pagpakamaayohon ang imo tuburan, kag magkalipay sa asawa sang imo pagkapamantan-on,

19subong nga mahigugmaon nga usa nga babayi, maayoayo nga usa nga babayi. Ang iya mga dughan magbusug sa imo sa tanan nga tion, kag magpabihag ka sa gihapon sang iya gugma.

20Kay ngaa bala ikaw, anak ko, magpabihag sa babayi nga malain kag maghakus sang dughan sang isa ka dumuloong?

21Kay ang mga dalan sang tawo yara sa atubangan sang mga mata sang Ginoo, kag ginatapan niya ang tanan niya nga banas.

22Ang iya kaugalingon nga mga kalautan magakuha sang malauton, kag higtan sia sang mga lubid sang iya sala.

23Mapatay sia tungud sa kakulang sang pagtudlo, kag sa pagkadaku sang iya kabuangan magatalang sia.

← Chapter 4 Jump to: Chapter 6 →