Proverbs 2

Ilonggo (Ang Biblia (1982))

← Chapter 1 Jump to: Chapter 3 →

1Anak ko, kon batonon mo ang akon mga polong kag tipigan ang akon mga sogo sa imo,

2sa paglingig sang imo idulungug sa kaalam kag sa pagpahamtang sang imo tagiposoon sa paghangup;

3hoo, kon magtuaw ka sono sa paghantup kag magbayaw sang imo tingug tungud sa paghangup,

4kon pangitaon mo sia subong sang pilak kag mag-usisa sa iya subong sang mga bahandi nga natago;

5niyan mahangup mo ang kahadluk sa Ginoo kag makita mo ang ihibalo sang Dios.

6Kay ang Ginoo nagahatag sing kaalam; gikan sa iya baba nagagowa ang ihibalo kag paghangup;

7sia nagatipon sing maayo nga kaalam nga sa matadlong; sia taming sa mga nagalakat sa kadungganan,

8agud nga mabantayan niya ang mga banas sang katarungan kag matipigan ang dalan sang iya mga balaan.

9Niyan mahangpan mo ang pagkamatarung kag katarungan kag ang pag-alangay, ang tagsa ka maayo nga banas;

10kay ang kaalam magasulud sa imo tagiposoon, kag ang ihibalo manginkahamut-an sa imo kalag;

11ang pagbinagbinag magabantay sa imo; ang paghangup magatipig sa imo;

12sa pagluwas sa imo sa dalanon sang malaut, sa mga tawo nga nagapamolong sing mga butang nga tiko,

13nga nagabiya sang mga banas sang katadlongan sa paglakat sa mga dalan sang kadudulman,

14nga nagakasadya sa paghimo sing malaut kag nagakalipay sa pagkabalingag sang malaut;

15nga tiko sa ila mga dalanon, kag balingag sa ila mga banas.

16Sa pagluwas sa imo sa babayi nga malain, bisan sa dumuloong nga nagaoloolo sa iya mga polong,

17nga nagabiya sang abyan sang iya pagkapamatan-on kag nagalimot sang katipan sang iya Dios;

18kay ang iya balay nagahuyug sa kamatayon, kag ang iya mga banas sa mga patay;

19wala sing nagakadto sa iya nga nagabalik kag wala sila nagalambut sa mga banas sang kabuhi.

20Agud nga maglakat ka sa dalanon sang mga tawo nga maayo kag magbantay sang mga banas sang matarung.

21Kay ang matadlong magapuyo sa duta, kag ang himpit magapabilin sa sini;

22apang ang malauton utdon gikan sa duta, kag ang maluib gabuton sa sini.

← Chapter 1 Jump to: Chapter 3 →