Proverbs 14

Ilonggo (Ang Biblia (1982))

← Chapter 13 Jump to: Chapter 15 →

1Ang tagsa ka babayi nga maalam nagapatindug sang iya balay, apang ang buangbuang nagaguba sini sa iya kaugalingon nga mga kamut.

2Ang nagalakat sa iya pagkatadlong nagakahadluk sa Ginoo, apang ang balingag sa iya mga dalanon nagatamay sa iya.

3Sa baba sang buangbuang yara ang bilogon tungud sa iya bugal, apang ang mga bibig sang maalam magatipig sa ila.

4Diin walay mga baka, matinlo ang pasungan; apang tungud sa kusug sang baka may madamu nga patubas.

5Ang matutum nga saksi indi magbutig, apang ang saksi nga dimatuud nagamitlang sing kabutigan.

6Ang mayubiton nagapangita sing kaalam kag wala makakita sini, apang ang ihibalo mahapus sa may paghangup.

7Kadto ka sa atubangan sang tawo nga buangbuang, kag indi ka makahantup sa iya sang mga bibig sang ihibalo.

8Ang kaalam sang mahalongon amo ang paghangup sang iya dalanon, apang ang kabuangan sang mga buangbuang amo ang limbong.

9Ang halad-tungud-sa-paglapas nagauligyat sang mga buangbuang, apang sa tunga sang mga matadlong may maayong kabubut-on.

10Ang tagiposoon nakahibalo sang iya kaugalingon nga kapaitan, kag ang dumuloong wala nagatublag sang iya kalipay.

11Ang balay sang malauton laglagon, apang ang layanglayang sang matadlong magauswag.

12May dalanon nga daw matarung sa tawo, apang ang iya katapusan mga dalanon sang kamatayon.

13Bisan sa kinadlaw ang tagiposoon masulub-on, kag ang katapusan sang kinalipay kabug-atan.

14Ang nag-isol sa tagiposoon mapuno sang iya kaugalingon nga mga dalanon, kag ang tawo nga maayo mabusug gikan sa iya kaugalingon.

15Ang kulangkulang nagapati sa tagsa ka polong, apang ang mahalongon nagatan-aw sa iya paglakat.

16Ang maalam nga tawo nahadluk kag nagatalikod sa malaut, apang ang buangbuang nagapabugal kag may pagsalig.

17Ang madali maakig magahisayo sing binuang, kag ang tawo nga malaut sing mga padugi ginadumtan.

18Ang kulangkulang nagapanubli sang kabuangan, apang ang mahalongon purungpurungan sing ihibalo.

19Ang malaut nagayaub sa atubangan sang maayo, ang malauton sa mga gawang sang matarung.

20Ang imol ginadumtan bisan sang iya kaugalingon nga isigkatawo, apang ang manggaranon may madamung abyan.

21Ang nagatamay sang iya isigkatawo nagapakasala, apang ang nagakaawa sa imol malipayon sia.

22Wala bala nagasayup ang mga nagapahito sing malaut? Ang kalooy kag kamatooran manginsa ila nga nagapahito sing maayo.

23Sa tanan nga pangabudlay may kapuslanan, apang ang hambal sang mga bibig nagapadolong lamang sa kaimolan.

24Ang purungpurung sang maalam amo ang ila manggad, apang ang kabuangan sang mga buangbuang kabuangan lamang.

25Ang saksi nga matuud nagaluwas sing mga kalag, apang ang nagamitlang sing mga kabutigan nagalimbong.

26Sa kahadluk sa Ginoo yara ang mabakud nga pagsalig, kag ang iya mga anak may duug nga dalangpan.

27Ang kahadluk sa Ginoo amo ang tuburan sang kabuhi, agud nga ang isa makalikaw sa mga siod sang kamatayon.

28Sa kadam-an sang katawohan yara ang himaya sang hari, apang ang pagkakulang sang katawohan amo ang kalaglagan sang principe.

29Ang makuli sa pagpangakig daku sing paghangup, apang ang madalas sing espiritu nagapataas sang kabuangan.

30Ang malinong nga tagiposoon amo ang kabuhi sang unud, apang ang kahisa amo ang pagkagabuk sang mga tul-an.

31Ang nagapigus sang imol nagapakahuya sang iya Magbubuhat, apang ang nagakalooy sa nawad-an nagapadungug sa iya.

32Ang malauton ginamusmus sang iya malaut nga buhat, apang ang matarung may dalangpan sa iya kamatayon.

33Ang kaalam nagapahuway sa tagiposoon sang may paghangup, apang ang yara sa nasulud nga bahin sang mga buangbuang ginapakilala.

34Ang pagkamatarung nagapataas sang pungsud, apang ang sala kahuluy-an sa bisan ano nga katawohan.

35Ang kahamuut sang hari ayon sa alagad nga nagahisayo sing maalamon, apang ang iya kasingkal manginbatok sa iya nga nagapakahuya.

← Chapter 13 Jump to: Chapter 15 →