Proverbs 9

Ilonggo (Ang Biblia (1982))

← Chapter 8 Jump to: Chapter 10 →

1Ang kaalam nagpatindug sang iya balay, sia nagbasbas sang iya pito ka haligi.

2Nag-ihaw sang iya mga sapat, sia nagsimbug sang iya alak, sia man naghanda sang iya latok.

3Nagpadala sia sang iya mga dalaga sa pagsinggit sa mataas gid nga mga duug sang banwa,

4“Ang bisan sin-o nga kulangkulang, magkari sia diri!” Sa iya nga nawad-an sing paghangup nagasiling sia,

5“Kari, kaon kamo sang akon kalan-on kag inum sang alak nga akon nasimbog.

6Magbiya sang pagkakubus, kag magkabuhi, kag maglakat sa dalanon sang paghangup.”

7Ang nagatudlo sa mayubiton nagaagum sa iya kaugalingon sing pasipala, kag ang nagasabdong sa malauton nagaagum sa iya kaugalingon sing dagta.

8Dili pagsabdonga ang mayubiton, basi nga magdumut sia sa imo; sabdonga ang maalam nga tawo, kag higugmaon ka niya.

9Tudloi ang maalam nga tawo, kag sia magamaalam pa gid; ton-i ang matarung nga tawo kag magadugang sia sa tinon-an.

10Ang kahadluk sa Ginoo amo ang pamuno sang kaalam, kag ang ihibalo sang Balaan amo ang paghangup.

11Kay paagi sa akon ang imo mga adlaw magabuad, kag ang mga tuig sang imo kabuhi magadugang.

12Kon maalam ka, maalam ka sa imo kaugalingon; kon magyubit ka, ikaw lamang ang mag-antus sini.

13Ang buangbuang nga babayi magahud; kubus sia kag walay nahibaloan.

14Nagalingkod sia sa ganhaan sang iya balay, sa lingkoran sa mataas nga mga duug sang banwa,

15sa pagtawag sang mga nagaagi, nga nagapadayon sa ila mga dalanon,

16“Ang bisan sin-o nga kubus, maghapit sia diri!” Kag sa iya nga nawad-an sing paghangup nagasiling sia,

17“Ang kinawat nga mga tubig matamis, kag ang kalan-on nga ginkaon sa tago manamit.”

18Apang wala sia makahibalo nga didto yara ang mga patay, nga ang iya mga inagda yara sa kadadalman sang Sheol.

← Chapter 8 Jump to: Chapter 10 →