2 Chronicles 13

Mien Bible (Thai Script) © Thailand Bible Society, 2007

← Chapter 12 Jump to: Chapter 14 →

1เนบัด เญย ตอน, เยโลโบอัม, โหฒว ฮู่ง เหฒียบ เป๊ด หฮญัง วั้ว หฮญัง, อาบียา ฝาว เหว่ย โหฒว ฮู่ง กุ๊น ยูดา.

2นิ่น เยียม เยลูซาเลม กุ๊น ปัว หฮญัง. นิ่น เญย มา เญย บั๋ว เห่ว มีคายา, เซ กิเบอา เมี่ยน, อุลีเอน, เญย เซียะ. อาบียา เหธา เยโลโบอัม ม่าย เบ๊าะ จ๋า เญย เจ๊า ธ้วด.

3อาบียา ต้อ เปยย สิน เต้า กิ๊น ต้าย เบ๊าะ จ๋า เฮ้น เญย แปง. เยโลโบอัม ม่าย เหฮยียด สิน เต้า กิ๊น ต้าย เบ๊าะ จ๋า เฮ้น เญย แปง ต๋อย อาบียา ไบ้ เจี๊ยน อ๋อย เบ๊าะ จ๋า.

4อาบียา เยียม เอฟาอิม เญย บง-ไอ๊ ต๋อง เสมาลาอิม บง กู้ หงว่าย ก๊อง, “เยโลโบอัม เหธา อิสะลาเอน เญย หฒวัง เมี่ยน อ้า! หมวัง เยีย ก๊อง ม่าะ!

5เม่ย บัว ไม้ ฮิ้ว เญย ไฟ? เฒี้ยว, อิสะลาเอน เญย ทิน-ฮู่ง, หล่ง เฑ้า เหลียบ แหง่ง หว่า เหธย ปุน ดาวิด เหธา นิ่น เญย เฒ้ย-ฟุน เหยียด ลิ์ว โหฒว ฮู่ง กุ๊น อิสะลาเอน.

6ไม้ กุ๊น ฮนั้ง หน่าย, ดาวิด เญย ตอน, ซาโลมอน, เญย เหยียด เต้า เจียน, เซ เนบัด เญย ตอน, เยโลโบอัม, แหง่ง นิ่น เญย เฒี้ยว.

7ม่าย เต๋ย ไม้ ลั่ม หล่ง เญย เมี่ยน หว่าย เมี่ยน ต้าย ฒุ้น กัน นิ่น หย่า เหธา ซาโลมอน เญย ตอน, เลโหโบอัม, ต๋อย-เตก. วั้ว หฒั่น เลโหโบอัม หฮญัง-เจ๊ย หลุน, เฮญี้ยว เมา, แหง่ง ไม้ ฮี่ง นิ่น บัว.

8“อี้ หฒั่น เม่ย ฮนั้ม ต้าย เม่ย อ๋อย แหง่ง เฒี้ยว เญย กั๊วะ, เซ เยียม ดาวิด เญย เฒ้ย-ฟุน เญย ปั์ว-เดี๊ย เญย กั๊วะ. เม่ย บัว เมี่ยน เก้ง ธั้ม ไห่ หย่า ม่าย เจียม โหฒว ต้าย เญย ง่ง ตอน, ต้ง เยโลโบอัม โหฒว ต้าย ต๋อง เม่ย บัว เญย เฒี่ยน.

9เม่ย บัว หฒุ่น เฒี้ยว เญย ไซ เมี่ยน, เซ อาโลน เญย เฒ้ย-ฟุน, หย่า หฒุ่น เลวี เมี่ยน เปย๋า, แอ๋ง เหลียบ เม่ย บัว กั้น เญย ไซ เมี่ยน ฮนั้ง กั้น นอม กั๊วะ เญย เมี่ยน เหลียบ นอ, ไม้ เฒ์ย? ไม้ กุ๊น หาย เต้า ต้อ เหยียด เต้า ง่ง โก๊ว ตอน เหธา เสี่ย เต้า ปะกี ยู่ง โก๊ว ต้าย สา หวุย ฯฒฯ ตุ๊ โหฒว ต้ง ไม้ เฒ์ย เป๋น เฒี่ยน เญย ไซ เมี่ยน.

10“มป่า เยีย บัว กั้น แอ๊ะ, เฒี้ยว เซ เยีย บัว เญย ทิน-ฮู่ง. เยีย บัว หย่า ไม้ กวั่ง นิ่น. ฟู-สู เฒี้ยว เญย ไซ เมี่ยน เซ อาโลน เญย เฒ้ย-ฟุน. เลวี เมี่ยน หย่า เถง นิ่น บัว หฒิว นิ่น บัว หอบ หฒุ โหฒว เญย ป่วน.

11นิ่น บัว ดอมๆ ม์วนๆ ฝ่ง ห่อ ปั๊ว เหฒี่ย หย่า ปั๊ว ฮูง ปุน เฒี้ยว. นิ่น บัว หย่า เฒาะ เก๋ง เญย ฌั้ว อัน วั้ว นอม ธีง-เหฑ่ง เตี้ย. นิ่น บัว หย่า โก๋ว เจียม-ตัง-จ๋า เหธา ตัง-ฒ้าน, เหว่ย ฮนอยๆ ลู่ง ม์าน-หฮมวัง เตี๊ยม. เหว่ย หฒุ เยีย บัว เอย เจี๊ยน เฒี้ยว, เยีย บัว เญย ทิน-ฮู่ง, หัด เญย หว่า. มป่า เม่ย บัว กวั่ง นิ่น.

12ทิน-ฮู่ง เหธา เยีย บัว เยียม, โหฒว ต้ง ต้อ เยีย บัว วั้ว เต้า. นิ่น เญย ไซ เมี่ยน นั้น เจี๊ยน หฑัด อ๋อย ปย๊ม เหว่ย ปุน เยีย บัว เหธา เม่ย บัว เบ๊าะ จ๋า. อิสะลาเอน เญย เฒ้ย-ฟุน อ้า! ไม้ ตู๋ง เหธา เฒี้ยว, เม่ย บัว เญย อง-ถาย เญย ทิน-ฮู่ง, เบ๊าะ จ๋า, เหว่ย หฒุ เม่ย บัว เบ๊าะ ไม้ ฮี่ง.”

13เยโลโบอัม พ้าย แปง ปี๋ง เจี๊ยน มี่ง เยียม ยูดา แปง เญย ฆะฮ้า ฆาง. เยโลโบอัม เญย จุน-แปง ฯฒฯ เยียม ยูดา เญย หฑะเฮมียน แหมง. ปี๋ง เจี๊ยน วั้ว เต๋ย แปง เยียม ฆะฮ้า.

14ยูดา ฮวิน หฑวน ปวัด วั้ว ด่าง แหมง เหธา ฆะฮ้า ฆาง ม่าย แปง, นิ่น บัว ฯฒฯ เห่ว เฒี้ยว. ไซ เมี่ยน หย่า ปย๊ม หฑัด.

15ยูดา เมี่ยน ชะ เห่ว ธ้วด เบ๊าะ จ๋า เญย เฉีย. ยูดา เมี่ยน เห่ว ธ้วด วั้ว หฒั่น, ทิน-ฮู่ง ปุน เยโลโบอัม เหธา อิสะลาเอน เญย หฒวัง เมี่ยน เยียม อาบียา เหธา ยูดา เญย หฑะเฮมียน หฒุ เซวย.

16อิสะลาเอน เมี่ยน เปย๋า ยูดา เมี่ยน. ทิน-ฮู่ง เฒาะ อิสะลาเอน เมี่ยน จิว ปุน เยียม ยูดา เญย ปั์ว-เดี๊ย.

17อาบียา เหธา นิ่น เญย จุน-แปง ไต๋ นิ่น บัว ธั้ม เญย. อิสะลาเอน เมี่ยน กิ๊น ต้าย เญย แปง ม่าย ปยา สิน เต้า หฒุ ไต๋ ไต่.

18วั้ว หฑุ่น อิสะลาเอน เมี่ยน หฒุ เซวย. ยูดา เมี่ยน ตุ๊ ฮี่ง, เหว่ย หฒุ นิ่น บัว เขา เฒี้ยว, นิ่น บัว เญย อง-ถาย เญย ทิน-ฮู่ง.

19อาบียา หฒุ่น เยโลโบอัม หย่า ธ้าง ตุ๊ นิ่น เญย ปัว นอม ฒี่ง, เบดเอน, เยซานา เหธา เอโฟโลน แอ๋ง เหธา เว่ย ก๋อม น้าย เต๋ย ฒี่ง เญย ฟิ้ว-ล์าง.

20เยียม อาบียา เญย เสย เฒ้ย เยโลโบอัม ไม้ ตุ๊ แอ๋ง เฮ้น เจี๊ยน ฝาว. เฒี้ยว หย่า ไต๋ นิ่น ไต่ อ๊ะ.

21มป่า อาบียา เฮ้น เจี๊ยน ฝาว. นิ่น หล่ง เหฒียบ เฝย เต้า เอ๊า. ม่าย หญี่ เหฒียบ เหญ่ย เต้า ตอน, เหฒียบ หลัวะ เต้า เซียะ.

22เยียม อาบียา กุ๊น เญย เฒี่ยง โห่ โหฒว เหฒ่ง เหฌี่ย เญย สี่, นิ่น โหฒว เญย เหธา ก๊อง เญย เหยียด ฒู้ง เฟี้ย เจี๊ยน โต่ว หว่า เมี่ยน, อิดโด, เญย โซว-ตาน.

← Chapter 12 Jump to: Chapter 14 →