2 Chronicles 22

Mien Bible (Thai Script) © Thailand Bible Society, 2007

← Chapter 21 Jump to: Chapter 23 →

1เยลูซาเลม เญย แปะ ฝีง เหลียบ เยโฮลัม เญย ตอน-ไฝ, อาหัดยา, หฑิบ เจี๊ยน นิ่น โหฒว ฮู่ง, เหว่ย หฒุ กัน อาหลับ เมี่ยน ต้าย เถา เธี้ยง วั้ว กวั้น เมี่ยน, ไต๋ เหฑ่ง อาหัดยา เญย หฒวัง ก๋อ. ยูดา เญย ฮู่ง, เยโฮลัม, เญย ตอน, อาหัดยา, ฯฒฯ ฝาว เหว่ย กุ๊น อ๊ะ.

2อาหัดยา ฝาว เหว่ย โหฒว ฮู่ง เญย เฒี่ยง โห่, หฮญัง-เจ๊ย ตุ๊ หญี่ เหฒียบ เหญ่ย หฮญัง. นิ่น เยียม เยลูซาเลม กุ๊น เหยียด หฮญัง. นิ่น เญย มา เซ โอมลี เญย เซียะ-ฟุน, อาทาลิยา.

3อาหัดยา หย่า เอย เจี๊ยน อาหับ วั้ว เปย๊า เมี่ยน เญย หฒะเอ๋ย โหฒว, เหว่ย หฒุ นิ่น เญย มา หฌาว นิ่น โหฒว หว่าย.

4หฒิว เฒี้ยว หมั่ง นิ่น โหฒว หว่าย สี่, ฮนั้ง อาหับ วั้ว เปย๊า เมี่ยน โหฒว, เหว่ย หฒุ นิ่น เญย เตีย ไต่ ลิ์ว, ม่าย อาหับ เญย เมี่ยน โหฒว นิ่น เญย ธ่าง ล่าง เมี่ยน ฯฒฯ ต้อ นิ่น หฒุ ป่าย อ๊ะ.

5นิ่น เอย เจี๊ยน วั้ว เต๋ย เมี่ยน ธ่าง ล่าง เญย หว่า เหธา อิสะลาเอน เญย ฮู่ง, อาหับ เญย ตอน, โยลัม, มี่ง ลาโม้ดกิเลอาด เหธา ซีเลีย เญย ฮู่ง, ฮาซาเอน, เบ๊าะ จ๋า. ซีเลีย เมี่ยน หย่า โหฒว ปุน โยลัม หฒุ มุน.

6โยลัม ฯฒฯ หฑวน เถา ยิดเลเอน หฒ่อ นิ่น เยียม ลาโม้ด เหธา ซีเลีย ฮู่ง, ฮาซาเอน, เบ๊าะ จ๋า หฒุ มุน เญย ต๋อง. ยูดา เญย ฮู่ง, เยโฮลัม เญย ตอน, อาหัดยา, ฯฒฯ เหฌี่ย เถา ยิดเลเอน หมั่ง อาหับ เญย ตอน, โยลัม, เหว่ย หฒุ โยลัม หฒุ มุน.

7อาหัดยา เหฌี่ย มี่ง ปวั้ง โยลัม ฯฒฯ หฒุ เหมียด เซ หฒิว ทิน-ฮู่ง ตี่ง ต้าย เญย หฒะเอ๋ย. เหว่ย หฒุ อาหัดยา มี่ง วั้ว หฒั่น, นิ่น เหธา โยลัม ธ้วด มี่ง ปวั้ง นิมซี เญย ตอน, เยฮู, ต้ง เฒี้ยว หล่ง โย่ว ออน ต้าย เหว่ย เหมียด อาหับ เญย โต้ว ฒง.

8เยฮู ตี่ง เจี๊ยน อาหับ เญย เปย๊า ฒง เมี่ยน เญย ฒุ์ย วั้ว หฒั่น, นิ่น ล์อ ปวัด ยูดา เญย เปย๊ย เฒ้ย เหธา อาหัดยา เญย ฟุน, เหว่ย หฒุ นิ่น บัว กัน เจี๊ยน นิ่น ต้าย. เยฮู ฯฒฯ ไต๋ เหฑ่ง นิ่น บัว.

9อาหัดยา ปี๋ง เจี๊ยน เยียม สะมาเลีย, เยฮู ชะ ล์อ. เยฮู เญย เมี่ยน เฒาะ อาหัดยา ต้อ มี่ง ปุน เยฮู, เยฮู ฯฒฯ ไต๋ นิ่น อ๊ะ. นิ่น บัว เฒาะ นิ่น หฒัง เจี๊ยน เหว่ย หฒุ นิ่น บัว ก๊อง, “นิ่น เซ เยโฮซาฟัด เญย ฟุน. เยโฮซาฟัด หล่ง เหฑ่ง เฮญี้ยว ล์อ เฒี้ยว. ” ฮนั้ง หน่าย อาหัดยา เญย โต้ว ฒง ไม้ ม่าย หาย เต้า ไฮ่ กุ๊น เต่ย-ปูง.

10อาหัดยา เญย มา ปวัด นิ่น เญย ตอน หฒุ ไต๋ ไต่, นิ่น ฯฒฯ เจี์ย กอน ไต๋ ยูดา โต้ว ฒง ม่าย ฮู่ง โต้ว เญย เมี่ยน.

11มป่า เยโฮลัม ฮู่ง เญย เซียะ, เยโฮเชบา, เฒาะ อาหัดยา เญย ตอน, โยอาด, เยียม อ๋อย หฒุ ไต๋ ไต่ เญย ฮู่ง ตอน บุด๋ง หนิ่ม ธ้วด ต้าย. เยโฮเชบา ต้อ โยอาด เหธา ต้อ โยอาด วั้ว เต้า โปว ปี๋ง เจี๊ยน เหยียด ฉง เกน. ฮนั้ง หน่าย เยโฮลัม ฮู่ง เญย เซียะ, เซ เยโฮยาดา ไซ เมี่ยน เญย เอ๊า, เหว่ย นิ่น โหฒว อาหัดยา เญย หมั่ว, นิ่น ปี๋ง โยอาด, ไม้ ปุน หฒุ อาทาลิยา ไต๋.

12โยอาด เหธา นิ่น บัว เยียม จุ๊ หฮญัง, ปี๋ง เจี๊ยน หฒั่ง ทิน-ฮู่ง เญย เปย๊า กะญั์ว. อาทาลิยา หย่า กุ๊น เต่ย-ปูง.

← Chapter 21 Jump to: Chapter 23 →