2 Chronicles 33

Mien Bible (Thai Script) © Thailand Bible Society, 2007

← Chapter 32 Jump to: Chapter 34 →

1มะนัดเส ฝาว เหว่ย โหฒว ฮู่ง วั้ว หฒั่น นิ่น ตุ๊ เหฒียบ เหญ่ย หฮญัง. นิ่น เยียม เยลูซาเลม กุ๊น ฮม์ เหฒียบ ฮม์ หฮญัง.

2หฒิว เฒี้ยว หมั่ง, นิ่น โหฒว หว่าย สี่. นิ่น เอย เจี๊ยน เฒี้ยว หฒุ่น ธ้วด อิสะลาเอน เมี่ยน เญย วั้ว ด่าง แหมง วั้ว เต๋ย ฝีงๆ เมี่ยน โหฒว กั้ม เฑี้ย ไห่ เญย สี่.

3นิ่น แอ๋ง เหธย เจี์ย ต้ง นิ่น เญย เตีย, เฮเซคียา, ป่าย หว่าย วั้ว เต๋ย เยียม ฮลัง หฒั่ง เฒี่ยน เญย ต๋อง. นิ่น แอ๋ง เหว่ย บาอัน เฒี่ยน เหธย เหฒี่ย-ต้อง, หย่า โหฒว อาเซลา เฒี่ยน เญ์ย เญย ฝัง, ฮนั้ง อิสะลาเอน เญย ฮู่ง, อาหับ, นอ. นิ่น ป๋าย หย่า หฒั่ง ลู่ง หฒั่ง เญย หญู่งๆ.

4นิ่น เยียม หฒั่ง เฒี้ยว เญย เปย๊า เหธย เหฒีย นอม เหฒี่ย-ต้อง, เซ เยียม เฒี้ยว ก๊อง, “เยีย อ๋อย เหลียบ เยีย เญย เม่ง เหยียด ลิ์ว ตุ๊ เยียม เยลูซาเลม,” วั้ว นอม ต๋อง.

5นิ่น เยียม หฒั่ง เฒี้ยว เญย เปย๊า อี นอม หลาด กะญั์ว เญย ต๋อง เหว่ย ลู่ง หฒั่ง เญย หญู่งๆ เหธย เหฒี่ย-ต้อง.

6นิ่น เยียม เบนฮินโนม ฮ์อง เฒาะ นิ่น กั้น เญย ตอน ปั๊ว เหฒี่ย, หย่า หมั่ง แหม่ง, โหฒว ฟ้าด, ปู๋ง ตีง ปู๋ง เจี๋ยม, ก๊าน เฮย หย่า โบ๊ว กว๋า. หฒิว เฒี้ยว หมั่ง นิ่น โหฒว หว่าย สี่ ธั้ม ไห่, ธัวะ เฒี้ยว เฉีย เจี์ย ไห่.

7นิ่น เฒาะ นิ่น หฒุ ต้าย วั้ว นอม อาเซลา เฒี่ยน เญ์ย เญย ฝัง อัน เจี๊ยน หฒั่ง เฒี้ยว เญย เปย๊า กะญั์ว. เซ น้าย นอม เปย๊า เฒี้ยว ก๊อง บั๋ว ดาวิด เหธา นิ่น เญย ตอน, ซาโลมอน, “เซ น้าย นอม เปย๊า เหธา เยลูซาเลม ฒี่ง เยีย เยียม ฝีงๆ อิสะลาเอน เมี่ยน บุด๋ง กิ๊น ธ้วด ต้าย เหลียบ เยีย กั้น เญย เม่ง เหว่ย เหยียด ลิ์ว.

8สี ก๊อง อิสะลาเอน เมี่ยน ไฝ ฟิม, เอย เจี๊ยน เยีย หัด เญย เหยียด ฒู้ง หว่า โหฒว, หย่า เอย เจี๊ยน เยีย เญย โปว, โมเซ, จิว ปุน นิ่น บัว เญย เหยียด ฒู้ง เล์ย-หลัด เหธา หลี่ง เหธา เล์ย, เยีย ฒู้ง ไม้ ปุน อิสะลาเอน เมี่ยน หฒุ เล่ย ฆอย เยีย ตี่ง เหฒียง ปุน นิ่น บัว วั้ว นอม เต่ย-ปูง.”

9มป่า มะนัดเส ต้อ ยูดา เหธา เยลูซาเลม เมี่ยน โหฒว ต่อง. นิ่น บัว ฯฒฯ โหฒว เอ๊าะ สี่ ฒู้ง เก้า ธั้ม เฒี้ยว เยียม อิสะลาเอน เมี่ยน เญย หฑะเฮมียน เหมียด เญย เหฒีย นอม กั๊วะ.

10เฒี้ยว เหธา มะนัดเส เหธา นิ่น เญย แปะ ฝีง ก๊อง มป่า นิ่น บัว ไม้ หมวัง.

11เหว่ย น้าย เฒี้ยว ปุน ซีเลีย ฮู่ง เญย จุน-แปง-เปย๊ย ต้าย เบ๊าะ ยูดา. นิ่น บัว เฒาะ เจี๊ยน มะนัดเส, หล่ง ติ๋ว ขวัง เจี๊ยน นิ่น หย่า หล่ง ต้ง ซิ หลิ่ม โด้ เจี๊ยน, ต้อ นิ่น มี่ง บาบีโลน.

12มะนัดเส หฒุ หน่าน ฒี่ง เญย เฒี่ยง โห่, นิ่น โท้ เฒี้ยว, นิ่น เญย ทิน-ฮู่ง, ค้อ-เลี่ยน. นิ่น เยียม นิ่น เญย อง-ถาย เญย ทิน-ฮู่ง เญย หฑะเฮมียน ฒัด กั้น เหฌี่ย ธั้ม เญย.

13นิ่น เต๋า เก๋า โท้ เญย เฒี่ยง โห่, เฒี้ยว ฒิบ นิ่น โจ้ว เญย หว่า, หย่า หมวัง ไฮ์ นิ่น เต๋า เก๋า, ฯฒฯ ต้อ นิ่น หฑวน เถา เยลูซาเลม, ปุน นิ่น กุ๊น นิ่น เญย กั๊วะ. มะนัดเส ฯฒฯ ฮิ้ว ตุ๊ เฒี้ยว เซ ทิน-ฮู่ง.

14ฆะฮ้า มะนัดเส แอ๋ง เหธย เจี์ย ดาวิด เญย ฒี่ง เญย กะเหญี่ย แหมง ฒี่ง หลาด, เยียม ฮ์อง กะญั์ว กีโฮน ววม-ฒี้ง ไฟ ปูง แหมง มี่ง เถา เบย์า-แก้ง, ฮวีง เจี๊ยน โอเฟน เต่ย. นิ่น แอ๋ง ปุน ฒี่ง หลาด ฮลัง ตุ๊ ธั้ม. นิ่น หย่า เหลียบ จุน-แปง-เปย๊ย เยียม ยูดา เว่ย ว้วน เญย เหยียด ฒู้ง ฒี่ง.

15นิ่น เฒาะ กั้น ฝีง เมี่ยน เญย เฒี่ยน กวั่ง หย่า เฒาะ ฆอย เยียม หฒั่ง เฒี้ยว เญย เปย๊า กะญั์ว เญย หมิ่ว-ฝัง. นิ่น แธะ เหธา เยลูซาเลม ฒี่ง นิ่น เยียม หฒั่ง เฒี้ยว เญย เปย๊า เหธย ต้าย เญย เหยียด ฒู้ง เหฒี่ย-ต้อง กวั่ง กะเหญี่ย หฒิ ฒี่ง.

16นิ่น แอ๋ง เหธย เจี์ย เฒี้ยว เญย เหฒี่ย-ต้อง หย่า เยียม วั้ว ฝ่ง ห่อ เหฒี่ย เหว่ย จิว ทง หย่า เหว่ย แล์ง ฒี่ง. นิ่น หย่า หัด ยูดา เมี่ยน อ๋อย หฒุ ฟู-สู เฒี้ยว, อิสะลาเอน เมี่ยน เญย ทิน-ฮู่ง.

17ไม้ กุ๊น ฮนั้ง น้าย, แปะ ฝีง หธ่อ เยียม ฮลัง เญย ต๋อง ฝ่ง ห่อ เหฒี่ย มป่า ขูง เหฒี่ย ปุน เฒี้ยว, นิ่น บัว เญย ทิน-ฮู่ง ฮนั้ง.

18มะนัดเส กุ๊น เญย เฒี่ยง โห่ โหฒว เหฒ่ง เหฌี่ย เญย สี่, เหธา นิ่น เต๋า เก๋า โจ้ว นิ่น เญย ทิน-ฮู่ง เญย หว่า, แอ๋ง เหธา โต่ว หว่า เมี่ยน เต๊ง เฒี้ยว, อิสะลาเอน เญย ทิน-ฮู่ง, เญย เม่ง, ก๊อง บั๋ว นิ่น เญย หว่า, เฟี้ย เจี๊ยน เยียม อิสะลาเอน เญย ฮู่ง โต้ว ตาน.

19ฮู่ง เตี๋ย เต๋า เก๋า เญย หว่า เหธา ทิน-ฮู่ง ฮนั้ง หาย นอ เตา นิ่น, เลี่ยม นิ่น ไม้ แก้ง ฒัด กั้น เหฌี่ย เญย เฒี่ยง โห่ เญย เหยียด ฒู้ง ฒุ์ย เหธา ไม้ เหฒียบ ฒัวะ โหฒว เญย สี่, เหธา นิ่น เหลียบ เยียม ฮลัง หฒั่ง เฒี่ยน เญย ต๋อง หย่า เหลียบ อาเซลา เฒี่ยน เญ์ย เญย ฝัง เหธา เฒี่ยน, เฟี้ย เจี๊ยน โต่ว หว่า เมี่ยน เญย โซว-ตาน.

20มะนัดเส เกวย เสย หมี่ อ๊ะ, หย่า หฒัง เจี๊ยน นิ่น เญย ฮู่ง ติ่น กะญั์ว. นิ่น เญย ตอน, อาโมน, หฑิบ เจี๊ยน นิ่น โหฒว ฮู่ง.

21อาโมน ฝาว เหว่ย โหฒว ฮู่ง วั้ว หฒั่น นิ่น ตุ๊ หญี่ เหฒียบ เหญ่ย หฮญัง. นิ่น หย่า เยียม เยลูซาเลม กุ๊น อี หฮญัง.

22หฒิว เฒี้ยว หมั่ง, นิ่น โหฒว หว่าย สี่ หฒวด นิ่น เญย เตีย, มะนัดเส. นิ่น หฒั่ง แอ๋ง ฝ่ง ห่อ เหฒี่ย นิ่น เญย เตีย, มะนัดเส, โหฒว ต้าย เญย เหยียด ฒู้ง หมิ่ว-ฝัง.

23มป่า นิ่น ไม้ ฮนั้ง นิ่น เญย เตีย, มะนัดเส, เยียม เฒี้ยว เญย หฑะเฮมียน ฒัด กั้น เหฌี่ย. อาโมน ป์าม เญย ฒุ์ย กุ๊น โหฒว กุ๊น โฮล เจี๊ยน ฝาว.

24นิ่น เญย เจียน ล่ม ฑ่อย ธ่าง ล่าง แหง่ง นิ่น, ฯฒฯ เยียม นิ่น เญย ฮู่ง ติ่น ไต๋ นิ่น.

25มป่า กั๊วะ กะญั์ว เญย แปะ ฝีง แอ๋ง ไต๋ ต้ง ธ่าง ล่าง แหง่ง อาโมน ฮู่ง วั้ว เต๋ย. นิ่น บัว แอ๋ง เหลียบ นิ่น เญย ตอน, โยสิยา, หฑิบ เจี๊ยน นิ่น โหฒว ฮู่ง.

← Chapter 32 Jump to: Chapter 34 →