2 Chronicles 20

Mien Bible (Thai Script) © Thailand Bible Society, 2007

← Chapter 19 Jump to: Chapter 21 →

1ฆะฮ้า โมอับ เมี่ยน เหธา อัมโมน เมี่ยน, แอ๋ง ม่าย เต๋ย เมอูนี เมี่ยน ต้าย เหธา เยโฮซาฟัด เบ๊าะ จ๋า.

2ม่าย เมี่ยน ต้าย บั๋ว เยโฮซาฟัด ฮู่ง, “ม่าย ต้ม กวั้น จุน-แปง เยียม เอโดม เหธา วั้ว หง่าน หฒิ ค้อย-ไต่ ต้าย อ๋อย เหธา ฮู่ง เตี๋ย เบ๊าะ จ๋า. นิ่น บัว ฒู้ง เยียม เจี๊ยน ฮาซาโซนทามา, (แอ๋ง ม่าย กั้น นอม บั๋ว เห่ว เอนเกดี.)

3เยโฮซาฟัด กั้ม เหฑีย ไห่ ฯฒฯ ตี่ง เฮญี้ยว ล์อ เฒี้ยว หย่า ฒุ่น บั๋ว ก๋อม ยูดา เต่ย เญย เมี่ยน เฒย ไม้ หญั่น หาย หญู่ง.

4ยูดา เมี่ยน กั๊บ ฒุ้น ต้าย โท้ เฒี้ยว เถง. นิ่น บัว ฒู้ง เยียม ยูดา เต่ย เญย นอมๆ ฒี่ง ต้าย ล์อ เฒี้ยว.

5เยโฮซาฟัด เยียม ยูดา เมี่ยน เหธา เยลูซาเลม เมี่ยน กั๊บ ฒุ้น เญย ต๋อง โซ้ว เจี๊ยน หฒั่ง เฒี้ยว เญย เปย๊า, หลาด กะญั์ว เญย เซียง-ต๋อง หฑะเฮมียน แหมง.

6นิ่น ก๊อง, “โอ เฒี้ยว, เยีย บัว เญย อง-ถาย เญย ทิน-ฮู่ง อ้า! เม่ย เซ เยียม ลู่ง หฒั่ง เญย ทิน-ฮู่ง ไม้ เฒ์ย? เม่ย กุ๊น ลู่ง เดี๊ย เญย หม่าน ฝีง เญย หม่าน กั๊วะ. เม่ย เญย ปั์ว ม่าย ชะ เฮ้น, หย่า ไม้ ม่าย หาย เต้า ไฮ่ ฮี่ง เจี๋ย เม่ย.

7เยีย บัว เญย ทิน-ฮู่ง อ่า, เม่ย ไม้ เฒ์ย เยียม เม่ย เญย แปะ ฝีง, อิสะลาเอน เมี่ยน, เญย วั้ว ด่าง แหมง หฒุ่น น้าย นอม เต่ย-ปูง เญย เมี่ยน ธ้วด, แอ๋ง เฒาะ เต่ย-ปูง จิว ปุน เม่ย เญย โล์-แกง ต่อย, อับลาฮัม, เญย เฒ้ย-ฟุน หฑิบ ไฟ?

8นิ่น บัว เยียม น้าย นอม ต๋อง หย่า เหว่ย เม่ย เญย เม่ง เหธย นอม สีง ติ่น. นิ่น บัว ก๊อง,

9‘สี ก๊อง ม่าย เหฒะ หน่าน ห่อย เยีย บัว, ไม้ กุ๊น เบ๊าะ จ๋า เญย สี่ ไฟ ต้ม ววน-แป่ง ไฟ ต้ม ฮวาง ต้ม หง่อ, เยีย บัว เยียม โค้ว เญย เฒี่ยง โห่ โซ้ว เจี๊ยน น้าย นอม เปย๊า หฑะเฮมียน ตอง เจี๊ยน เม่ย เห่ว, เหว่ย หฒุ เม่ย เญย เม่ง เยียม น้าย นอม เปย๊า กะญั์ว, เม่ย ฒู้ง อ๋อย หมวัง ไฮ์ หย่า เหฌียว เยีย บัว.’

10“หมั่ง ม่าะ! อี้ หฒั่น อัมโมน เมี่ยน, โมอับ เมี่ยน เหธา เอโดม เมี่ยน ต้าย เบ๊าะ เยีย บัว. ฒิ่น ด่าง อิสะลาเอน เมี่ยน เยียม อียิบ เต่ย-ปูง ต้าย เญย เฒี่ยง โห่, เม่ย ไม้ ปุน นิ่น บัว เปียะ น้าย เต๋ย เมี่ยน เญย เต่ย. เยีย บัว เญย อง-ถาย ฯฒฯ หวี่ง เจี๋ย, ไม้ เหมียด นิ่น บัว.

11หมั่ง ม่าะ! นิ่น บัว ฮนั้ง น้าย นอ วิ่น ปุน เยีย บัว. นิ่น บัว อ๋อย หฒุ่น เยีย บัว ธ้วด เม่ย เญย ป่วน เต่ย-ปูง, ต้ง เม่ย เหธย ปุน เยีย บัว หฑิบ เญย เต่ย-ปูง.

12โอ เยีย บัว เญย ทิน-ฮู่ง อ่า, เม่ย ไม้ ตี่ง นิ่น บัว เญย ฒุ์ย ไฟ? เหว่ย หฒุ เยีย บัว ไม้ ม่าย ชะ เบ๊าะ ต้ง ต้าย เบ๊าะ เยีย บัว วั้ว เต๋ย ต้ม! กวั้น จุน-แปง. เยีย บัว ไม้ ฮิ้ว ตุ๊ ฮนั้ง หาย นอ โหฒว มป่า เยีย บัว เญย มฒีง หมั่ง เจี๊ยน เม่ย.”

13ยูดา เมี่ยน เญย เหยียด ฒู้ง มจั่ง ตอน เหธา นิ่น บัว เญย เอ๊า, นิ่น บัว เญย กู้งว์า เหธา ฝุเจว๊ย กั๊บ ฒุ้น โซ้ว เจี๊ยน เฒี้ยว เญย หฑะเฮมียน.

14ยาฮาซีเอน โซ้ว เจี๊ยน กั๊บ ฒุ้น เญย หฒวัง เมี่ยน บุด๋ง วั้ว หฒั่น, เฒี้ยว เญย สีง ลี่ง เหฌี่ย ต้าย เยียม นิ่น. ยาฮาซีเอน เซ เสคาลิยา เญย ตอน, เสคาลิยา เซ เบไนยา เญย ตอน, เบไนยา เซ เยอีเอน เญย ตอน, เยอีเอน เซ มัดทานิยา เญย ตอน, เซ เลวี เมี่ยน, อาสาบ, เญย เฒ้ย-ฟุน.

15ยาฮาซีเอน ก๊อง, “เยโฮซาฟัด ฮู่ง เหธา เยียม ยูดา เหธา เยลูซาเลม เญย หฒวัง แปะ ฝีง อ่า, เม่ย บัว อ๋อย หฒุ หมวัง. เฒี้ยว ฮนั้ง น้าย ก๊อง บั๋ว เม่ย บัว, ‘ไม้ ตู๋ง หลาย น้าย ต้ม กวั้น จุน-แปง กั้ม เหฑีย, หย่า ไม้ ตู๋ง เฮญี้ยว เมา, เหว่ย หฒุ เบ๊าะ จ๋า เญย เจ๊า เป๋น ทิน-ฮู่ง เญย, ไม้ เฒ์ย เม่ย บัว เญย.

16ฌัง ฮนอย เหฌี่ย มี่ง เหธา นิ่น บัว เบ๊าะ จ๋า. นิ่น บัว อ๋อย ยั่ง สิด เญย ฒอง ฝาว. เม่ย บัว ฯฒฯ ปวั้ง นิ่น บัว เยียม เยลูเอน เต่ย-ปูง-ฮวาง เญย ฮ์อง-คู้.

17ยูดา เหธา เยลูซาเลม เมี่ยน อ้า! น้าย หฑุ่น เม่ย บัว ไม้ หฒุ เบ๊าะ จ๋า. ขูง อ๋อย หฒุ โซ้ว ไบ้ เจี๊ยน เบ๊าะ จ๋า เญย ต๋อง ตี่ง เญย, หมั่ง เจี๊ยน เฒี้ยว เหว่ย เม่ย บัว ฮี่ง. ไม้ ตู๋ง กั้ม เหฑีย หย่า ไม้ ตู๋ง เฮญี้ยว เมา. ฌัง ฮนอย ธ้วด มี่ง เหธา นิ่น บัว เบ๊าะ จ๋า, เฒี้ยว หย่า เหธา เม่ย บัว เยียม.”

18เยโฮซาฟัด ฯฒฯ โด๊ะ มฆ้อง เหฌี่ย, เฮมียน พัวะ เหฌี่ย เถา เดา. ยูดา เหธา เยลูซาเลม เญย หฒวัง แปะ ฝีง หย่า เยียม เฒี้ยว เญย หฑะเฮมียน พัวะ เถา เดา เหธา เจี๊ยน ป๋าย เฒี้ยว.

19เลวี ฝีง เญย โคฮ้าด เมี่ยน เหธา โคลา เมี่ยน โซ้ว เจี์ย ต้าย หล่ง เฉีย โฮล เญย เธง เฒี้ยว, อิสะลาเอน เมี่ยน เญย ทิน-ฮู่ง.

20ตะเหญ่ย ดอม เฑี้ยว เญย แปะ ฝีง ธ้วด เจ๊า มี่ง เทโคอา เต่ย-ปูง-ฮวาง. ธ้วด เจ๊า เญย เฒี่ยง โห่ เยโฮซาฟัด โซ้ว เจี๊ยน ก๊อง, “ยูดา เมี่ยน เหธา เยลูซาเลม เมี่ยน อ้า! หมวัง เยีย ม่าะ! อ๋อย หฒุ เสียน เขา เฒี้ยว, เม่ย บัว เญย ทิน-ฮู่ง, เม่ย บัว ฯฒฯ เยียม ตุ๊ ว้วน. อ๋อย หฒุ เสียน นิ่น เญย โต่ว หว่า เมี่ยน โต่ว เญย หว่า, เม่ย บัว ฯฒฯ ไฮ่ โหฒว ตุ๊ เหฒียง.

21ฮู่ง เตี๋ย เหธา แปะ ฝีง ธ่าง ล่าง ลิ์ว, นิ่น พ้าย ป๋าว ฑูง เมี่ยน ป๋าว ฑูง. เธง เฒี้ยว วั้ว เต๋ย ฒุ เจี๊ยน ธีง-เหฑ่ง เญย ลุย-โหว. ธ้วด มี่ง เญย เฒี่ยง โห่ นิ่น บัว เยียม จุน-แปง เญย หฑะเฮมียน แหมง ป๋าว เจี๊ยน ก๊อง, “แล์ง ฒี่ง เฒี้ยว, เหว่ย หฒุ นิ่น เหยียด ลิ์ว เหฒียบ ฒัวะ เญย ฮนั้ม เมี่ยน.”

22นิ่น บัว เจี์ย กอน ป๋าว ฑูง เธง เญย เฒี่ยง โห่, เฒี้ยว ปุน แปง ฒั้ว เจี๊ยน เบ๊าะ ต้ง ต้าย เหธา ยูดา เมี่ยน เบ๊าะ จ๋า วั้ว เต๋ย อัมโมน เมี่ยน, โมอับ เมี่ยน เหธา เอโดม เมี่ยน. นิ่น บัว ฯฒฯ หฒุ เบ๊าะ เซวย เหฑ่ง.

23เหว่ย หฒุ อัมโมน เหธา โมอับ เมี่ยน แกง เจี๊ยน ไต๋ เอโดม เมี่ยน เถา ไต๋ หฒุด เหฑ่ง. ฆะฮ้า นิ่น บัว เม่ย ไต๋ เยีย, เยีย ไต๋ เม่ย, ฯฒฯ หฒุ เหมียด เหฑ่ง หมี่ อ๊ะ.

24ยูดา เมี่ยน มี่ง เถา เต่ย-ปูง-ฮวาง เญย ล่าว หมั่ง เหฌี่ย ต้ม จุน-แปง กวั้น วั้ว, ขูง ปวัด จั๋น-ไต่ เปว๋ย เจี๊ยน เดา-เป้ย ฮนั้ง. ไม้ ม่าย เหยียด เต้า ตุ๊ ธ้วด สีง แหม่ง.

25เยโฮซาฟัด เหธา นิ่น เญย แปะ ฝีง มี่ง เฑ์า จั๋น-ไต่ เญย กะน้าย วั้ว หฒั่น, นิ่น บัว ปวัด แซง-คู้ ธั้ม เญย, หย่า ม่าย เหฒีย หญู่ง กะน้าย เหธา ลุย-โหว เหธา จ๋าย เญย กะน้าย. นิ่น บัว เหว่ย กั้น เฑ์า ต้าย เถา ฒู้ง เปี้ยน ไม้ ฮี่ง. นิ่น บัว เฑ์า ธ้าง ต้าย เญย กะน้าย ปวั๊ง ปัว ฮนอย เหว่ย หฒุ หฒะเก้ง ธั้ม ไห่.

26เถา ตะเฝย ฮนอย นิ่น บัว เหยียด ฒู้ง เยียม เบลาคา ฮ์อง, เยียม วั้ว เธง เฒี้ยว. เหว่ย น้าย นิ่น บัว หธีง ธ้วด บั๋ว เห่ว เบลาคา ฮ์อง เถา อี้ จ๋า ฮนอย.

27ฆะฮ้า เยียม ยูดา เหธา เยลูซาเลม เญย เต้าๆ เมี่ยน หฑวน อ๊ะ. เยโฮซาฟัด ต้อ นิ่น บัว เฌียนๆ โย่วๆ เญย หฑวน, เหว่ย หฒุ เฒี้ยว เถง นิ่น บัว เบ๊าะ ฮี่ง วิน-วั้ง ฯฒฯ ออน-เหลาะ ไห่.

28นิ่น บัว พัด ต้ม ต้าน ป้า, ฟิ้ว-ต้าน ป้า, ปย๊ม หฑัด หฑวน เถา เยลูซาเลม ฒี่ง เปียะ หฒั่ง เฒี้ยว เญย เปย๊า.

29นอมๆ กั๊วะ เญย ฮู่ง ไฮ์ เฒี้ยว ฮนั้ง น้าย นอ เบ๊าะ ฮี่ง อิสะลาเอน เญย วิน-วั้ง, นิ่น บัว กั้ม เหฑีย ไห่ ทิน-ฮู่ง.

30ฮนั้ง หน่าย เยโฮซาฟัด เญย กั๊วะ ถาย-แป้ง, เหว่ย หฒุ นิ่น เญย ทิน-ฮู่ง ปุน นิ่น เญย เปยย ปูง แป้ง ออน.

31ฮนั้ง น้าย นอ, เยโฮซาฟัด โหฒว ยูดา เญย ฮู่ง. ฝาว เหว่ย กุ๊น เญย เฒี่ยง โห่ นิ่น ตุ๊ ฟ่า เหฒียบ ฮม์ หฮญัง. นิ่น เยียม เยลูซาเลม กุ๊น เญย เฒี่ยง โห่ เหฒียบ ฮม์ หฮญัง. นิ่น เญย มา เซ ซินหิ เญย เซียะ, บั๋ว เห่ว อาซุบา.

32เยโฮซาฟัด เอย เจี๊ยน นิ่น เญย เตีย, อาสา, โหฒว เญย เจ๊า, ไม้ เพียน เหยียด เต๋ย. หฒิว เฒี้ยว หมั่ง นิ่น โหฒว ตุ๊ หอบ.

33มป่า เยียม ฮลัง หฒั่ง เฒี่ยน เญย ต๋อง ไม้ ตุ๊ แธะ กวั่ง. แปะ ฝีง ไม้ แก้ง เหลียบ ตี่ง เฮญี้ยว กัน นิ่น บัว เญย อง-ถาย เญย ทิน-ฮู่ง.

34เยโฮซาฟัด กุ๊น เญย เฒี่ยง โห่ โหฒว เหฒ่ง เหฌี่ย เญย สี่, เยียม กอน เถา เซ้ด เมว์ย, เฟี้ย เจี๊ยน ฮานานี เญย ตอน, เยฮู, เญย โซว-ตาน, เซ จวั่ง อิสะลาเอน เญย ฮู่ง โต้ว ตาน.

35ฆะฮ้า ยูดา ฮู่ง, เยโฮซาฟัด, เหธา อิสะลาเอน เญย ฮู่ง, อาหัดยา, กั๊บ ต่อย. อาหัดยา หย่า โหฒว เอ๊าะ เญย สี่ ธั้ม ไห่.

36นิ่น บัว อี เต้า จวั่ง เจี๊ยน กั๊บ ฑั้ง มี่ง ทานซิด. น้าย เต๋ย ฑั้ง เยียม เอซีโอนเกเบ กั๊บ ต้าย.

37ต๋อย วั้ว หฒั่น, มาเลซา เมี่ยน, โดดาวาหุ เญย ตอน, เอลีเอเซ, โต่ว หว่า บั๋ว เยโฮซาฟัด, “เหว่ย หฒุ เม่ย เหธา อาหัดยา กั๊บ ต่อย, เฒี้ยว อ๋อย โหฒว หว่าย เม่ย โหฒว ต้าย เญย กะน้าย.” วั้ว เต๋ย ฑั้ง ฯฒฯ หฒะเก้ง บ๋าย เหฑ่ง, ไม้ ไฮ่ มี่ง ทานซิด.

← Chapter 19 Jump to: Chapter 21 →