2 Chronicles 7

Mien Bible (Thai Script) © Thailand Bible Society, 2007

← Chapter 6 Jump to: Chapter 8 →

1ซาโลมอน เต๋า เก๋า ลิ์ว, โต์ว เยียม ลู่ง เหฌี่ย ต้าย, เหฒียะ ชุย เหฑ่ง ปั๊ว เหฒี่ย เหธา ฝ่ง ห่อ เหฒี่ย เญย กะน้าย. เฒี้ยว เญย ฌัง-หล่าง หย่า เยียม ปวั๊ง เปย๊า.

2ไซ เมี่ยน ไม้ ไฮ่ เปียะ หฒั่ง เฒี้ยว เญย เปย๊า, เหว่ย หฒุ เฒี้ยว เญย ฌัง-หล่าง เยียม ปวั๊ง เฒี้ยว เญย เปย๊า.

3อิสะลาเอน เญย หฒวัง เมี่ยน ปวัด โต์ว เยียม ลู่ง เหฌี่ย ต้าย, หย่า ปวัด เฒี้ยว เญย ฌัง-หล่าง เยียม สีง ติ่น กู้ หงว่าย วั้ว หฒั่น, นิ่น บัว บ๊าบ เหฌี่ย เฮมียน เถา ติ่ม เจี๊ยน หละเปย๊ย เญย เดา ป๋าย, แล์ง ฒี่ง เฒี้ยว, ก๊อง, “ เฒี้ยว เซ หลง ไห่, เหว่ย หฒุ นิ่น เหยียด ลิ์ว เหฒียบ ฒัวะ เญย ฮนั้ม เมี่ยน.”

4ฮู่ง เตี๋ย เหธา หฒวัง แปะ ฝีง เยียม เฒี้ยว เญย หฑะเฮมียน ฝ่ง ห่อ เหฒี่ย.

5ซาโลมอน ฮู่ง หล่ง อี หว่าน อี ธิน เต้า ง่ง เหธา เหยียด สิน อี หว่าน เต้า ปะกี ยู่ง ฝ่ง ห่อ เหฒี่ย. ฮู่ง เตี๋ย เหธา หฒวัง แปะ ฝีง ฯฒฯ ฮนั้ง น้าย นอ เฒาะ ทิน-ฮู่ง เญย เปย๊า ฝูง ปุน นิ่น.

6ไซ เมี่ยน โซ้ว เจี๊ยน เก๊าะ-เมี่ยน เยียม เญย ต๋อง. เลวี เมี่ยน เหธา เจี๊ยน หล่ง โหฒว ฑูง เญย จา-สี่ เธง เฒี้ยว, เซ ดาวิด ฮู่ง โหฒว ต้าย หล่ง แล์ง ฒี่ง เฒี้ยว เหว่ย เฒี้ยว เหยียด ลิ์ว เหฒียบ ฒัวะ เญย ฮนั้ม เมี่ยน. ไซ เมี่ยน ฮวิน มี่ง เลวี เมี่ยน วั้ว ปูง ปย๊ม หฑัด. อิสะลาเอน เญย หฒวัง เมี่ยน โซ้ว เจี๊ยน วั้ว.

7ซาโลมอน สา เยียม หลาด กะญั์ว, หฒั่ง เฒี้ยว เญย เปย๊า หฑะเฮมียน แหมง เญย ต๋อง, ธีง-เหฑ่ง ต้าย. เยียม หน่าย นิ่น ฝ่ง ห่อ ปั๊ว เหฒี่ย เญย กะน้าย เหธา เหฒี่ย เหว่ย จิว ทง เญย แซง-คู้ เฮมย, เหว่ย หฒุ ซาโลมอน โหฒว วั้ว นอม ต้ง ซิ เหฒี่ย-ต้อง อัน ไม้ เหฌี่ย ปั๊ว เหฒี่ย เญย กะน้าย เหธา ฝ่ง ห่อ เญย ล่าง หฒิ เหธา เฮมย.

8วั้ว หฒั่น ซาโลมอน เจี๋ย วั้ว นอม ฒิบ เสี่ย ฮนอย, นิ่น เหธา อิสะลาเอน เญย หฒวัง เมี่ยน กั๊บ ฒุ้น เป๋น นอม ต้ม! หวุ่ย. เซ เยียม เลโบฮามัด มี่ง เถา อียิบ โด๊ะ.

9ตะเป๊ด ฮนอย วั้ว ฮนอย นิ่น บัว กั๊บ ฒุ้น โหฒว เล์ย-ป๋าย, เหว่ย หฒุ นิ่น บัว หล่ง เสี่ย ฮนอย ฝ่ง ห่อ เหฒี่ย-ต้อง แอ๋ง หล่ง เสี่ย ฮนอย เจี๋ย ฒิบ.

10เธี้ยด หฮลา หญี่ เหฒียบ ฟาม วั้ว ฮนอย นิ่น เห่ว หฒวัง เมี่ยน หฑวน นิ่น บัว เญย เปย๊า. นิ่น บัว หฒะเก้ง เฌียน-โย่ว อะเฮน้ย เหว่ย เฒี้ยว โหฒว หลง ปุน ดาวิด เหธา ซาโลมอน เหธา นิ่น เญย แปะ ฝีง, อิสะลาเอน เมี่ยน.

11ซาโลมอน โหฒว เหฒียง หฒั่ง เฒี้ยว เญย เปย๊า เหธา นิ่น กั้น เญย ฮู่ง ติ่น, หย่า เยียม หฒั่ง เฒี้ยว เญย เปย๊า หฒิว นิ่น ม่าย เฮญี้ยว โหฒว เญย โหฒว เหฒียง เหฑ่ง.

12ฆะฮ้า ม่าย ม์วน เฒี้ยว หิ่น ธ้วด ปุน นิ่น ปวัด. เฒี้ยว ก๊อง, “เยีย หมวัง ไฮ์ เม่ย เต๋า เก๋า เญย หว่า หมี่ อ๊ะ. เยีย กิ๊น น้าย นอม ต๋อง เหว่ย เยีย กั้น โหฒว นอม เปย๊า หล่ง ฝ่ง ห่อ ปั๊ว เหฒี่ย.

13“สี ก๊อง เยีย ปุน ลู่ง ฮ์าน ไม้ ตุ้ย บยู่ง, ไฟ ปุน จ๊บ-เหญ่ย ฟ้าน ต้าย หญั่น น้าย นอม เต่ย-ปูง เญย แกง-หฒวัง, ไฟ ปุน เยีย เญย แปะ ฝีง ปุ๊ด ต้ม ววน-แป่ง,

14สี ก๊อง เยีย เญย เมี่ยน, ต้ง กัน เยีย เญย บั๋ว เห่ว วั้ว เต๋ย แปะ ฝีง, เหญี่ยม กั้น โหฒว ไฝ, เต๋า เก๋า ล์อ เยีย, หย่า กวั่ง นิ่น บัว โหฒว เญย หว่าย สี่, เยีย ฯฒฯ เยียม กู้ หงว่าย ลู่ง หมวัง ไฮ์ หย่า กวั่ง นิ่น บัว เญย ฒุ์ย, แอ๋ง หฒ่อ นิ่น บัว เญย เต่ย-ปูง หลง.

15เยีย ฒู้ง หนูง มฒีง หมั่ง, แปง มน่อม หมวัง เยียม น้าย นอม ต๋อง เต๋า เก๋า เญย หว่า.

16เหว่ย หฒุ อี้ หฒั่น เยีย กิ๊น น้าย นอม เปย๊า หย่า ปุน เปย๊า ธีง-เหฑ่ง เหว่ย เหลียบ เยีย เญย เม่ง เหยียด ลิ์ว เยียม น้าย. เยีย เญย มฒีง, เยีย เญย เฮญี้ยว อ๋อย หฒั่นๆ เยียม น้าย.

17“เม่ย กั้น แอ๊ะ, สี ก๊อง เม่ย เหฒียบ ฒัวะ เญย กัน หลง เยีย ฮนั้ง เม่ย เญย เตีย, ดาวิด, นอ, เม่ย หย่า เอย เหฑ่ง เยีย พ้าย เญย เหยียด ฒู้ง หว่า, หย่า กัน หลง เยีย เญย หลี่ง เหธา เล์ย-หลัด,

18เยีย ฯฒฯ เหลียบ ว้วน เม่ย เญย ฮู่ง เหว่ย ฮนั้ง เยีย แล์ง ปุน เม่ย เญย เตีย, ดาวิด นอ. วั้ว หฒั่น เยีย ก๊อง, ‘เม่ย เญย เฒ้ย-ฟุน เหยียด ลิ์ว ไม้ ตั๋ง เมี่ยน โหฒว ฮู่ง กุ๊น อิสะลาเอน.’

19“มป่า สี ก๊อง เม่ย กวั่ง, ไม้ กัน เยีย หย่า ไม้ เอย เยีย จิว ปุน เม่ย บัว เญย หลี่ง เหธา เล์ย-หลัด, ฯฒฯ มี่ง ฟู-สู หฒั่ง เหญี่ย เญย เฒี่ยน นอ,

20เยีย ฯฒฯ แปง อิสะลาเอน เมี่ยน ธ้วด, ไม้ ปุน เยียม เยีย จิว ปุน นิ่น บัว วั้ว นอม เต่ย-ปูง. เลี่ยม เว่ย เยีย เญย เม่ง เยีย ปุน ธีง-เหฑ่ง น้าย นอม เปย๊า, เยีย หย่า กวั่ง ไม้ หมั่ง. เยีย หย่า อ๋อย ปุน น้าย นอม เปย๊า เยียม หม่าน ฝีง บุด๋ง หฒุ เมี่ยน โหฒว โก๊ว ก๊อง หย่า จั๊ด.

21ต้ง อี้ หฒั่น เมี่ยน ท่าย น้าย นอม เปย๊า, เจี๋ย เจ๊า เญย เมี่ยน ฯฒฯ อ๋อย บัวะ ฮ่อง ไห่, จั๊ด เจี๊ยน ก๊อง, ‘ เฒี้ยว เหว่ย หาย ติ่ว ฮนั้ง น้าย นอ โหฒว ปุน น้าย นอม เต่ย-ปูง เหธา น้าย นอม เปย๊า?’

22เมี่ยน ฯฒฯ เตา, ‘หลาย นิ่น บัว กวั่ง เฒี้ยว, นิ่น บัว เญย อง-ถาย เญย ทิน-ฮู่ง, ต้ง ต้อ นิ่น บัว ธ้วด อียิบ เต่ย-ปูง เญย ทิน-ฮู่ง. นิ่น บัว มี่ง ปัวะ หฒั่ง, ฟู-สู, ป๋าย เหญี่ย เญย เฒี่ยน, เฒี้ยว หธีง ปุน นิ่น บัว หฒุ น้าย เต๋ย เธี้ยว เญย เหฒะ หน่าน.’”

← Chapter 6 Jump to: Chapter 8 →