2 Chronicles 18

Mien Bible (Thai Script) © Thailand Bible Society, 2007

← Chapter 17 Jump to: Chapter 19 →

1เยโฮซาฟัด ปุ๊ด ฒ่อย ไห่ อ๊ะ, ม่าย เม่ง เต้า โฮล. นิ่น เหธา อาหับ ต๊า ธีง-จา เหว่ย จิว หฒัวะ.

2เจี๋ย ลิ์ว เหฒีย หฮญัง, เยโฮซาฟัด มี่ง สะมาเลีย เหธา อาหับ หฑย่าว. อาหับ เหว่ย เยโฮซาฟัด เหธา กัน นิ่น มี่ง เญย เมี่ยน ไต๋ ปะกี ยู่ง เหธา ง่ง ธั้ม เญย. อาหับ ฯฒฯ หยัวะ เยโฮซาฟัด เหธา นิ่น มี่ง เบ๊าะ ลาโม้ดกิเลอาด.

3อิสะลาเอน เญย ฮู่ง, อาหับ, หน่าย ยูดา เญย ฮู่ง, เยโฮซาฟัด, “เม่ย เหธา เยีย มี่ง เบ๊าะ ลาโม้ดกิเลอาด ไฟ?” เยโฮซาฟัด เตา นิ่น, “เยีย เซ ฮนั้ง เม่ย นอ. เยีย เญย แปะ ฝีง หย่า ฮนั้ง เม่ย เญย แปะ ฝีง.

4เยีย บัว ฯฒฯ เหธา เม่ย มี่ง เบ๊าะ จ๋า.” มป่า เยโฮซาฟัด หย่า ก๊อง บั๋ว อิสะลาเอน เญย ฮู่ง, “โท้ หน่าย เฒี้ยว ด่าง.”

5อิสะลาเอน เญย ฮู่ง ฯฒฯ เห่ว โต่ว หว่า เมี่ยน ต้าย กั๊บ ฒุ้น, ม่าย เฝย แป๊ะ เต้า. ฮู่ง เตี๋ย ฯฒฯ หน่าย ก๋า นิ่น บัว, “เยีย บัว หอบ หฒุ มี่ง เบ๊าะ ลาโม้ดกิเลอาด ไฟ ไม้ หอบ หฒุ มี่ง?” นิ่น บัว เตา, “กุ๊น มี่ง อ๊ะ. เหว่ย หฒุ ทิน-ฮู่ง อ๋อย เฒาะ วั้ว นอม ฒี่ง จิว ปุน เยียม ฮู่ง เตี๋ย เญย ปั์ว-เดี๊ย.”

6มป่า เยโฮซาฟัด หน่าย, “เยียม น้าย ไม้ ม่าย เฒี้ยว เญย กั้น เต้า โต่ว หว่า เมี่ยน เยีย บัว ไฮ่ หน่าย นิ่น ไฟ?”

7อิสะลาเอน เญย ฮู่ง เตา เยโฮซาฟัด, “หธ่อ ม่าย เต้า เมี่ยน, เซ อิมลา เญย ตอน, มีคายา. บัว ไฮ่ โท้ นิ่น เถง บัว หน่าย เฒี้ยว. มป่า เยีย ฑอง นิ่น เหว่ย หฒุ นิ่น ไม้ โต่ว เจี๋ย หลง เญย เจ๊า ปุน เยีย, ขูง ก๊อง เธี้ยว เญย สี่ ฮนั้ง.” เยโฮซาฟัด ก๊อง, “ฮู่ง เตี๋ย ไม้ ตู๋ง ฮนั้ง หน่าย ก๊อง.”

8อิสะลาเอน เญย ฮู่ง เห่ว เต้า เจียน ต้าย ฯฒฯ ก๊อง, “มี่ง ต้อ อิมลา เญย ตอน, มีคายา, เซี้ยบๆ เญย ต้าย ม่าะ!”

9อิสะลาเอน เญย ฮู่ง เหธา ยูดา เญย ฮู่ง, เยโฮซาฟัด, เยียม สะมาเลีย เญย ฒี่ง แก้ง ด่าง, เบ๊าะ เบย้า เญย เธี้ยง. เก๊าะ-เมี่ยน เฒว์ย เจี๊ยน ฮู่ง เหว่ย หย่า ฒอง เจี๊ยน นิ่น บัว เญย ฮู่ง ลุย. หฒวัง โต่ว หว่า เมี่ยน เยียม นิ่น บัว เญย หฑะเฮมียน โต่ว หว่า.

10เคนาอะนา เญย ตอน, เสเดคียา, หล่ง เฮลียะ โหฒว จอง. นิ่น ก๊อง, “ เฒี้ยว ฮนั้ง น้าย ก๊อง, ‘เม่ย อ๋อย หล่ง น้าย เต๋ย จอง ฒง ซีเลีย เมี่ยน เถา เหมียด เหฑ่ง นิ่น บัว.’”

11หฒวัง โต่ว หว่า เมี่ยน หย่า ฟี่ ฮนั้ง เญย โต่ว หว่า. นิ่น บัว ก๊อง, “กุ๊น มี่ง เบ๊าะ ลาโม้ดกิเลอาด ฯฒฯ เบ๊าะ ฮี่ง, เหว่ย หฒุ เฒี้ยว อ๋อย เฒาะ วั้ว นอม ฒี่ง จิว ปุน เยียม ฮู่ง เตี๋ย เญย ปั์ว-เดี๊ย.”

12มี่ง เห่ว มีคายา ต้าย วั้ว เต้า โต่ว เฝียน เมี่ยน ก๊อง บั๋ว นิ่น, “หฒวัง โต่ว หว่า เมี่ยน ต้ง โจ๋ว หว่า ก๊อง ฮู่ง เตี๋ย อ๋อย ตุ๊ หลง. โท้ เม่ย เหธา วั้ว เต๋ย ต้ง โจ๋ว หว่า ก๊อง หย่า ขูง ก๊อง ฮู่ง เตี๋ย อ๋อย ตุ๊ หลง ฮนั้ง.”

13มป่า มีคายา ก๊อง, “เยีย เฒี้ยง เจี๊ยน เฒี่ยง เจี๊ยน เญย เฒี้ยว แล์ง หว่า, เยีย เญย ทิน-ฮู่ง ก๊อง หาย หญู่ง, เยีย ฯฒฯ ก๊อง วั้ว หญู่ง ฮนั้ง.”

14มี่ง เถา ฮู่ง เตี๋ย วั้ว หฒั่น, ฮู่ง เตี๋ย หน่าย นิ่น, “มีคายา อ่า, เยีย บัว มี่ง เบ๊าะ ลาโม้ดกิเลอาด หอบ ไฟ ไม้ หอบ?” มีคายา เตา, “กุ๊น มี่ง เบ๊าะ หย่า เบ๊าะ ตุ๊ ฮี่ง. นิ่น บัว อ๋อย หฒุ เยียม ฮู่ง เตี๋ย เญย ปั์ว-เดี๊ย.”

15มป่า ฮู่ง เตี๋ย ก๊อง บั๋ว นิ่น, “เยีย ปุน เม่ย แล์ง บัวะ เหฒีย หฑุ่น หว่า, เม่ย เต๊ง เฒี้ยว เญย บั๋ว เหธา เยีย ขูง ก๊อง เฒียน หว่า ฮนั้ง?”

16มีคายา ฯฒฯ ก๊อง, “เยีย ปวัด อิสะลาเอน เญย หฒวัง เมี่ยน หฑาน มี่ง เยียม บง ฮนั้ง ปะกี ยู่ง กวั้น ไม้ ม่าย หมั่ง ยู่ง เญย เมี่ยน โก๋ว นอ. เฒี้ยว หย่า ก๊อง, ‘น้าย เต๋ย แปะ ฝีง ไม้ ม่าย เฒี้ยว. อ๋อย หฒุ ปุน นิ่น บัว เก๊าะ-เมี่ยน แป้ง ออน เญย หฑวน เก๊าะ-เมี่ยน เญย เปย๊า.’”

17อิสะลาเอน เญย ฮู่ง ก๊อง บั๋ว เยโฮซาฟัด, “เยีย ก๊อง เจี๋ย บั๋ว เม่ย ไม้ เฒ์ย? น้าย เต้า ไม้ โต่ว เจี๋ย หลง เญย หว่า ปุน เยีย. นิ่น ขูง โต่ว เธี้ยว เญย หว่า ฮนั้ง.”

18มีคายา แอ๋ง ก๊อง, “ฮนั้ง น้าย, หมวัง เฒี้ยว เญย หว่า ม่าะ! เยีย ปวัด เฒี้ยว เฒว์ย นิ่น เญย ฮู่ง เหว่ย, หย่า ปวัด กู้ หงว่าย ลู่ง เญย หฒวัง ฟิน-เมี่ยน โซ้ว เจี๊ยน นิ่น เญย หฒาย แหมง, บย่าว แหมง.

19เฒี้ยว ก๊อง, ‘หาย เต้า อ๋อย ดั๊ว อิสะลาเอน เญย ฮู่ง, อาหับ, มี่ง ลาโม้ดกิเลอาด, เยียม วั้ว หฒุ ไต่?’ “ม่าย เต้า ฮนั้ง น้าย นอ ก๊อง, ม่าย เต้า ฮนั้ง วั้ว นอ ก๊อง.

20ฆะฮ้า ม่าย เต้า ธ้วด ต้าย โซ้ว เจี๊ยน เฒี้ยว เญย หฑะเฮมียน ก๊อง, ‘เยีย อ๋อย ดั๊ว นิ่น มี่ง.’ “ เฒี้ยว หน่าย นิ่น, ‘เม่ย อ๋อย หล่ง หาย หญู่ง หฒะเอ๋ย?’

21“นิ่น ก๊อง, ‘เยีย อ๋อย มี่ง โหฒว ปุน นิ่น เญย หฒวัง โต่ว หว่า เมี่ยน ก๊อง-แปะ.’ “ เฒี้ยว แอ๋ง ก๊อง, ‘ฮนั้ง หน่าย เม่ย หฒะเก้ง ไฮ่ ดั๊ว ตุ๊ หฒุ นิ่น อ๊ะ. กุ๊น มี่ง โหฒว ม่าะ!’

22“อี้ หฒั่น เฒี้ยว โหฒว ปุน เม่ย เญย น้าย เต๋ย โต่ว หว่า เมี่ยน เหยียด ฒู้ง ก๊อง-แปะ. เฒี้ยว ฒู้ง ตี่ง เหฒียง ปุน เม่ย อ๋อย หฒุ ต้ม เหฒะ หน่าน.”

23เคนาอะนา เญย ตอน, เสเดคียา, มี่ง เถา, ไบ๋ มีคายา เญย เฮมียน หย่า หน่าย นิ่น, “ เฒี้ยว เญย สีง ลี่ง ธ้วด เยีย ยั่ง หาย มี่ง เหธา เม่ย ก๊อง หว่า แล่?”

24มีคายา เตา, “เม่ย เปียะ เปย๊า กะญั์ว เญย เหยียด ฉง เหว่ย ปี๋ง เจี๊ยน วั้ว ฮนอย เม่ย ฯฒฯ ตุ๊ ปวัด อ๊ะ.”

25อิสะลาเอน เญย ฮู่ง ก๊อง, “เฒาะ มีคายา ฝูง หฑวน จิว ปุน อาโมน แซ้ง-เฒี้ยว เหธา ฮู่ง เญย ตอน, โยอาด.

26อ๋อย หฒุ ก๊อง บั๋ว นิ่น บัว, ‘ฮู่ง เตี๋ย ฮนั้ง น้าย นอ ก๊อง, ‘เฒาะ น้าย เต้า โล้ หววน เจี๊ยน โล่, ปุน ววม เหธา ฌั้ว เก๋า ยู์ง เจี๊ยน แหม่ง ฮนั้ง, ฒั้ว เยีย แป้ง ออน เญย หฑวน ต้าย.’”

27มีคายา ก๊อง, “สี ก๊อง เม่ย ไฮ่ ตุ๊ แป้ง ออน เญย หฑวน ต้าย, เซ ไม้ เฒ์ย เฒี้ยว หล่ง เยีย ก๊อง หว่า.” นิ่น แอ๋ง ก๊อง, “หฒวัง แปะ ฝีง อ่า, โท้ หมวัง หลง โอ่.”

28อิสะลาเอน เญย ฮู่ง เหธา ยูดา เญย ฮู่ง, เยโฮซาฟัด, ฯฒฯ มี่ง ลาโม้ดกิเลอาด.

29อิสะลาเอน เญย ฮู่ง ก๊อง บั๋ว เยโฮซาฟัด, “เปียะ มี่ง เบ๊าะ จ๋า เญย เฒี่ยง โห่ เยีย ฒอง ฮนั้ง เป๋น กั้น เต้า มป่า เม่ย ฒอง เจี๊ยน เม่ย เญย ฮู่ง ลุย-ด๊าว.” อิสะลาเอน เญย ฮู่ง ฯฒฯ ฒอง เป๋น กั้น เต้า, เปียะ มี่ง เบ๊าะ จ๋า.

30ซีเลีย เญย ฮู่ง พ้าย นิ่น เญย เบ๊าะ จ๋า เธีย เญย แปง-เปย๊ย, “ไม้ ตู๋ง เหธา หาย เต้า เบ๊าะ จ๋า ไม้ กุ๊น โฮล ไฝ. ขูง เหธา อิสะลาเอน เญย ฮู่ง เบ๊าะ ฮนั้ง.”

31เบ๊าะ จ๋า เธีย เญย แปง-เปย๊ย ปวัด เยโฮซาฟัด นิ่น บัว ก๊อง, “น้าย เต้า หฒะเก้ง อิสะลาเอน เญย ฮู่ง.” นิ่น บัว ฯฒฯ ต๋าว ซิน มี่ง เบ๊าะ นิ่น. มป่า เยโฮซาฟัด เห่ว. เฒี้ยว แอ๋ง เถง นิ่น อ๊ะ. ทิน-ฮู่ง ต้อ นิ่น บัว เล่ย ฆอย นิ่น อ๊ะ.

32เบ๊าะ จ๋า เธีย เญย แปง-เปย๊ย ปวัด ไม้ เฒ์ย อิสะลาเอน เญย ฮู่ง, นิ่น บัว ฯฒฯ ต๋าว เธีย, ไม้ หฒุ่น เยโฮซาฟัด อ๊ะ.

33มป่า ม่าย เต้า เมี่ยน โก๊ว-เหมว่ย ป๊วน เหยียด ฑิด ฟอง หย่า หฒุ อิสะลาเอน เญย ฮู่ง เยียม นิ่น เบ๊าะ จ๋า เญย ฒอง-ฒุ เหยียด คว้าย เหยียด คว้าย เญย บุด๋ง-ฉัง. ฮู่ง เตี๋ย ฯฒฯ บั๋ว ฒ้าง นิ่น เญย เธีย วั้ว เต้า, “ต๋าว เธีย ทอ เยีย ธ้วด เบ๊าะ จ๋า เธี้ยง. เยีย หฒุ มุน หมี่ อ๊ะ.”

34วั้ว ฮนอย เฒี่ยง ฮนอย เบ๊าะ จ๋า เฮนี้ย เญย. นิ่น บัว หย่า เซ่ง เจี๊ยน ฮู่ง เตี๋ย เยียม นิ่น เญย เธีย กะญั์ว ฮวิน หมั่ง เจี๊ยน อาลัม เมี่ยน เถา ลู่ง หฮมวัง. ลู่ง ม์าน-หฮมวัง นิ่น ไต่ หมี่ อ๊ะ.

← Chapter 17 Jump to: Chapter 19 →