2 Chronicles 8

Mien Bible (Thai Script) © Thailand Bible Society, 2007

← Chapter 7 Jump to: Chapter 9 →

1ซาโลมอน หล่ง หญี่ เหฒียบ หฮญัง เหธย หฒั่ง เฒี้ยว เญย เปย๊า เหธา นิ่น กั้น เญย ฮู่ง ติ่น.

2ฆะฮ้า ซาโลมอน เซียง-เหธย เจี์ย ต้ง ฮีลาม จิว ปุน นิ่น วั้ว เต๋ย ฒี่ง หย่า ปุน อิสะลาเอน เมี่ยน เยียม.

3ซาโลมอน มี่ง ฮามัดโสบา หย่า ธ้าง ตุ๊ หมี่ อ๊ะ.

4นิ่น เหธย เยียม เต่ย-ปูง-ฮวาง เญย ทัดโม ฒี่ง เหธา เยียม ฮามัด เหธย ต้าย เหว่ย เซียว กะน้าย เญย นอมๆ ฒี่ง.

5นิ่น แอ๋ง เหธย วั้ว เจี๋ย เญย เบดโฮโลน ฒี่ง เหธา วั้ว เดี๊ย เญย เบดโฮโลน ฒี่ง เป๋น เว่ย ว้วน เญย ฒี่ง, ม่าย ฒี่ง หลาด, ม่าย หลาด แก้ง เหธา แก้ง ซอน.

6นิ่น หย่า เหธย บาอาลัด ฒี่ง เหธา ซาโลมอน เซียว กะน้าย เญย เหยียด ฒู้ง ฒี่ง, แอ๋ง เหธา เซียว เบ๊าะ จ๋า เญย ม์า-เธีย เหธา ฒ้าง ม์า-เธีย เญย แปง เญย เหยียด ฒู้ง ฒี่ง, เหธา นิ่น ม่าย เฮญี้ยว เยียม เยลูซาเลม เหธา เลบานอน เหธา นิ่น กุ๊น ก๋อม เญย กั๊วะ เญย นอมๆ ต๋อง เหธย เญย หญู่งๆ.

7เหฒ่ง เหฌี่ย เญย ฮิดไท เมี่ยน, อาโมไล เมี่ยน, เปลิดซี เมี่ยน, ฮีไว เมี่ยน เหธา เยบุด เมี่ยน, ต้ง ไม้ เฒ์ย อิสะลาเอน เมี่ยน,

8เซ ต้ง อิสะลาเอน เมี่ยน ไม้ ไฮ่ เหมียด ไม้ เหฑ่ง, หธ่อ เยียม เต่ย-ปูง วั้ว เต๋ย เมี่ยน เญย เฒ้ย-ฟุน, ซาโลมอน อ๊าบ โหฒว กง-โปว-เฮนี้ย เญย โน่ว เถา อี้ จ๋า ฮนอย.

9มป่า ซาโลมอน ไม้ ปุน อิสะลาเอน เมี่ยน หฒุ โหฒว โน่ว. นิ่น บัว โหฒว นิ่น เญย แปง, โหฒว จุน-แปง-เปย๊ย, เหธา กุ๊น ม์า-เธีย เญย ต้ม แปง-เปย๊ย, เหธา ฒ้าง ม์า-เธีย เญย แปง.

10แอ๋ง ม่าย หญี่ แป๊ะ ฮม์ เหฒียบ เต้า โหฒว ซาโลมอน ฮู่ง เญย ต้ม เจียน กุ๊น กง-เมี่ยน.

11ซาโลมอน ต้อ ฟาโล เญย เซียะ เยียม ดาวิด เญย ฒี่ง ฝาว ต้าย เยียม ซาโลมอน เหว่ย นิ่น เหธย วั้ว นอม ฮู่ง ติ่น. ซาโลมอน ก๊อง, “เยีย เญย เอ๊า ไม้ หอบ หฒุ เยียม อิสะลาเอน กั๊วะ เญย ฮู่ง, ดาวิด, เญย ฮู่ง ติ่น, เหว่ย หฒุ เฒี้ยว เญย แล์ง แหง่ง หว่า ฟาง เถา เจี๋ย เญย ต๋อง เซ ธีง-เหฑ่ง.”

12ซาโลมอน เยียม นิ่น เหธย ต้าย เญย เหฒี่ย-ต้อง, เซ เยียม เฒี้ยว เญย เปย๊า เญย แก้ง ด่าง ธับ ธ้วด เญย ต๋อง หฑะเฮมียน แหมง เญย เหฒี่ย-ต้อง, ฝ่ง ห่อ ปั๊ว เหฒี่ย เญย กะน้าย ปุน เฒี้ยว.

13นิ่น หฒิว โมเซ พ้าย เหฒียง เหว่ย ฮนอยๆ เหฒี่ย เญย กะน้าย, เซ เหว่ย ตี้ง กง ฮนอย, เปียะ เซียง-หฮลา, เหธา เหยียด หฮญัง เจี๋ย เญย ปัว นอม ฒิบ. วั้ว เต๋ย ปัว นอม ฒิบ เซ ไม้ อัน ปี๊ง เญย ฌั้ว เญย ฒิบ เหธา เซียว แกง-หฒวัง เญย ฒิบ เหธา บย๊อ ลิ่ว เญย ฒิบ.

14เอย นิ่น เญย เตีย, ดาวิด, เหลียบ ต้าย เญย เล์ย นิ่น พ้าย เหฒียง ไซ เมี่ยน เป๋น เหยียด กวั้น เหยียด กวั้น หฒิว นิ่น บัว เญย กง. นิ่น หย่า พ้าย เลวี เมี่ยน ป๋าว ฑูง เธง ทิน-ฮู่ง หย่า เถง ไซ เมี่ยน หฒิว นิ่น บัว ฮนอยๆ เฉียม หฒุ หล่ง. นิ่น หย่า พ้าย เหฒียง ฒั้ว แก้ง เมี่ยน เป๋น เหยียด กวั้น เหยียด กวั้น ฒั้ว เจี๊ยน เต้าๆ แก้ง เหว่ย หฒุ ทิน-ฮู่ง เญย เมี่ยน, ดาวิด, หัด เหฒียง อ๋อย หฒุ ฮนั้ง น้าย นอ โหฒว.

15นิ่น บัว เอย เจี๊ยน ฮู่ง พ้าย หฒวัง ไซ เมี่ยน เหธา เลวี เมี่ยน, เหว่ย เซียว จ๋าย เญย กะน้าย เญย ต๋อง นิ่น บัว ไม้ ปู๋ง ด๊อด.

16เยียม นิ่น บัว เหลียบ หฒั่ง เฒี้ยว เญย เปย๊า เญย กอน-โด๊ะ เถา อี้ ฮนอย, นิ่น บัว เอย เจี๊ยน ซาโลมอน พ้าย เญย หว่า โหฒว. ฮนั้ง หน่าย หฒั่ง เฒี้ยว เญย เปย๊า เหธย เหฒียง เหฑ่ง อ๊ะ.

17ฆะฮ้า ซาโลมอน มี่ง เอโดม เญย ค้อย-เฮลน เญย เอซีโอนเกเบ เหธา เอลัด.

18ฮีลาม พ้าย เต๋ย นิ่น กั้น เญย ฑั้ง เหธา ฑั้ง-เจียน, ต้ง เกว๋น ค้อย เญย เมี่ยน มี่ง เหธา ซาโลมอน เญย ฑั้ง-เจียน แฑง ฑั้ง มี่ง เถา โอฟี. นิ่น บัว ต้อ ดั้ว ธิน เฝย แป๊ะ ฮม์ เหฒียบ จ้อย เจียม หฑวน ซาโลมอน ฮู่ง วั้ว.

← Chapter 7 Jump to: Chapter 9 →