2 Chronicles 6

Mien Bible (Thai Script) © Thailand Bible Society, 2007

1วั้ว หฒั่น ซาโลมอน เต๋า เก๋า ก๊อง, “ เฒี้ยว ก๊อง นิ่น อ๋อย เยียม หฮมวัง ไห่ เญย บ๋วน กะญั์ว.

2เยีย เหว่ย เม่ย เหธย เหฒียง เหยียด นอม เหฑว่ย ไห่ เญย เปย๊า, เซ โหฒว นอม ต๋อง เหว่ย ปุน เม่ย เหยียด ลิ์ว เยียม.”

3อิสะลาเอน เญย หฒวัง เมี่ยน หธ่อ โซ้ว เจี๊ยน วั้ว, ซาโลมอน ฮู่ง ฮวิน หฑวน ต้าย ปวัง หว่า นิ่น บัว.

4นิ่น ก๊อง, “เธง เฒี้ยว, อิสะลาเอน เมี่ยน เญย ทิน-ฮู่ง. นิ่น หฒิว นิ่น กั้น เญย ฑุ่ย เหธา เยีย เญย เตีย, ดาวิด, แล์ง เญย หว่า หล่ง นิ่น กั้น เญย ปั์ว โหฒว เหฒียง. เหว่ย หฒุ นิ่น ก๊อง,

5‘เยียม เยีย ต้อ เยีย เญย แปะ ฝีง, อิสะลาเอน เมี่ยน, ธ้วด อียิบ ต้าย, เยีย ไม้ กิ๊น หาย ฝีง อิสะลาเอน เมี่ยน เญย หาย นอม ฒี่ง เหว่ย เยีย เญย เม่ง เหลียบ นอม เปย๊า. เยีย หย่า ไม้ กิ๊น หาย เต้า โหฒว เปย๊ย เฒ้ย ต้อ เยีย เญย แปะ ฝีง, อิสะลาเอน เมี่ยน.

6มป่า อี้ หฒั่น เยีย กิ๊น เยลูซาเลม เหว่ย เหลียบ เยีย เญย เม่ง เยียม หน่าย นอม ต๋อง. เยีย หย่า กิ๊น ดาวิด ต้าย กุ๊น เยีย เญย แปะ ฝีง, อิสะลาเอน เมี่ยน.’

7“เยีย เญย เตีย, ดาวิด, เจี์ย เฮญี้ยว อ๋อย เหว่ย เฒี้ยว, อิสะลาเอน เมี่ยน เญย ทิน-ฮู่ง เญย เม่ง, เหลียบ นอม เปย๊า.

8มป่า เฒี้ยว ก๊อง บั๋ว เยีย เญย เตีย, ดาวิด, ‘เม่ย เจี์ย เฮญี้ยว เหว่ย เยีย เญย เม่ง เหลียบ นอม เปย๊า เซ หลง ไห่ อ๊ะ, เหว่ย หฒุ เม่ย ม่าย น้าย หญู่ง หฒะเอ๋ย เยียม เม่ย เญย เฮญี้ยว.

9มป่า เม่ย กั้น ไม้ ตุ๊ เหธย. เซ เม่ย เญย เธียน ตอน อ๋อย เหว่ย เยีย เญย เม่ง เหธย นอม เปย๊า.’

10“อี้ หฒั่น เฒี้ยว เอย นิ่น แล์ง เญย หว่า โหฒว. เยีย หฑิบ เจี๊ยน เยีย เญย เตีย, ดาวิด, เฒว์ย เจี๊ยน อิสะลาเอน เมี่ยน เญย ฮู่ง เหว่ย, ฮนั้ง เฒี้ยว แล์ง นอ. เยีย หย่า ตุ๊ เหว่ย เฒี้ยว, อิสะลาเอน เมี่ยน เญย ทิน-ฮู่ง เญย เม่ง, เหธย เหฒียง เปย๊า.

11เยีย หลิ่ว เล์ย เหฒียง ต๋อง อัน แล์ง แหง่ง หว่า ฟาง. ฟาง กะญั์ว ม่าย ต้ง เฒี้ยว เหธา อิสะลาเอน เมี่ยน แล์ง เจี์ย เญย แหง่ง หว่า.”

12ซาโลมอน ฯฒฯ โซ้ว เจี๊ยน เฒี้ยว เญย เหฒี่ย-ต้อง หฑะเฮมียน แหมง, ตอง เจี๊ยน เหยียด หฒวัง กั๊บ ฒุ้น เญย อิสะลาเอน เมี่ยน ซูง ปั์ว เต๋า เก๋า.

13(ซาโลมอน หล่ง ต้ง ซิ โหฒว เหยียด นอม พ่าง, ด๊าว ปยา เดาะ, จั๊ง ปยา เดาะ, ฮลัง ปัว เดาะ. นิ่น เฒาะ พ่าง อัน เจี๊ยน หลาด กะญั์ว, บุด๋ง เญย ต๋อง. นิ่น ฝาว น้าย นอม พ่าง ตอง เจี๊ยน เหยียด หฒวัง กั๊บ ฒุ้น เญย อิสะลาเอน เมี่ยน เกว่ย เหฌี่ย ซูง ปั์ว หูง เจี๊ยน ลู่ง.)

14นิ่น ก๊อง, “โอ เฒี้ยว, อิสะลาเอน เมี่ยน เญย ทิน-ฮู่ง อ่า, เยียม กู้ หงว่าย ลู่ง ไฟ กะเดี๊ย เดา ไม้ ม่าย เฒี่ยน ฮนั้ง เม่ย นอ. เม่ย เอย เจี๊ยน เม่ย แล์ง เญย แหง่ง หว่า ปุน ธีง เม่ย เหฒียบ ฒัวะ เญย ฮนั้ม เม่ย เญย โปว, ต้ง หล่ง เหฑ่ง เฮญี้ยว กัน หลง เม่ย วั้ว เต๋ย.

15เม่ย เอย เจี๊ยน เม่ย เญย โปว, เยีย เญย เตีย, ดาวิด, แล์ง เญย หว่า โหฒว. เม่ย กั้น เญย ฑุ่ย แล์ง, เม่ย กั้น เญย ปั์ว อี้ ฮนอย หย่า โหฒว เหฒียง อ๊ะ.

16“โอ เฒี้ยว, อิสะลาเอน เมี่ยน เญย ทิน-ฮู่ง อ่า, โท้ อี้ หฒั่น เอย เจี๊ยน เม่ย เหธา เม่ย เญย โปว, เยีย เญย เตีย, ดาวิด, แล์ง เญย หว่า โหฒว. วั้ว หฒั่น เม่ย ก๊อง, ‘สี ก๊อง เม่ย เญย เฒ้ย-ฟุน ไฝ ฟิม, กัน หลง เยีย เญย เล์ย-หลัด ฮนั้ง เม่ย กัน นอ, เม่ย ฯฒฯ เหยียด ลิ์ว ม่าย เฒ้ย-ฟุน เฒว์ย อิสะลาเอน เมี่ยน เญย ฮู่ง เหว่ย.’

17โอ เฒี้ยว, อิสะลาเอน เมี่ยน เญย ทิน-ฮู่ง อ่า, โท้ เม่ย อี้ หฒั่น โหฒว เหฒียง หฒิว เม่ย เหธา เม่ย เญย โปว, ดาวิด, แล์ง เญย หว่า.

18“ทิน-ฮู่ง หฒะเก้ง อ๋อย เหธา ป้าม เมี่ยน เยียม ป้าม เกน ไฟ? ลู่ง เหธา เก้า ฮลัง เจี๋ย เญย ลู่ง, เม่ย เยียม ไม้ เหฌี่ย. วั้ว หญู่ง, เยีย เหธย น้าย นอม เปย๊า เม่ย เก้า เยียม ไม้ เหฌี่ย อ๊ะ.

19โอ เฒี้ยว, เยีย เญย ทิน-ฮู่ง อ่า, โท้ หมวัง เม่ย เญย โปว ตอง เจี๊ยน เม่ย เต๋า เก๋า โจ้ว เญย หว่า. โท้ หมวัง เม่ย เญย โปว เยียม เม่ย เญย หฑะเฮมียน เต๋า เก๋า โท้ น้าย เต๋ย หว่า.

20โท้ เม่ย ฮนอยๆ ม์วนๆ หมั่ง เจี๊ยน น้าย นอม เปย๊า, เซ ต้ง เม่ย ก๊อง น้าย นอม ต๋อง, ‘เยีย อ๋อย เหลียบ เยีย เญย เม่ง เยียม น้าย นอม ต๋อง.’ เม่ย ฯฒฯ หมวัง ไฮ์ เม่ย เญย โปว ฮวิน น้าย นอม ต๋อง เต๋า เก๋า เญย หว่า.

21เม่ย เญย โปว เหธา เม่ย เญย แปะ ฝีง, อิสะลาเอน เมี่ยน, ฮวิน น้าย นอม ต๋อง เต๋า เก๋า เญย เฒี่ยง โห่, โท้ เม่ย เยียม วั้ว ลู่ง, เม่ย เยียม เญย ต๋อง, หมวัง เยีย บัว โจ้ว เญย หว่า. หมวัง ไฮ์ ลิ์ว หย่า โท้ กวั่ง เยีย บัว เญย ฒุ์ย.

22“สี ก๊อง ม่าย เต้า เมี่ยน โหฒว ต่อง กั้น เต้า เมี่ยน ฯฒฯ หฒุ เมี่ยน เห่ว โด๊ว เหฒียว, อ๋อย หฒุ ต้อ นิ่น เถา น้าย หฒั่ง ทิน-ฮู่ง เญย เปย๊า, ปุน นิ่น เยียม เม่ย เญย เหฒี่ย-ต้อง หฑะเฮมียน แหมง โด๊ว เหฒียว.

23โท้ เม่ย เยียม กู้ หงว่าย ลู่ง หมวัง หย่า เอย เจี๊ยน โหฒว. โท้ เซี้ยม เม่ย เญย โปว บัว หย่า ตี่ง โหฒว ต่อง วั้ว เต้า เญย ฒุ์ย, ปุน นิ่น หฒิว นิ่น โหฒว เญย หฒุ ดาม-ตอง, แอ๋ง ตี่ง ไม้ โหฒว ต่อง วั้ว เต้า ไม้ ม่าย ฒุ์ย, ปุน นิ่น หฒิว นิ่น โหฒว เญย ตุ๊ หลง.

24“เม่ย เญย แปะ ฝีง, อิสะลาเอน เมี่ยน, หาย หฒั่น ป์าม ฒุ์ย ต่อง เม่ย, ฯฒฯ หฒุ วิน-วั้ง ฮี่ง นิ่น บัว, ฆะฮ้า นิ่น บัว หฑวน ต้าย ล์อ เม่ย, เยียม น้าย นอม เปย๊า เหญี่ยม เม่ย เญย บั๋ว, เต๋า เก๋า โจ้ว เม่ย,

25โท้ เม่ย เยียม กู้ หงว่าย ลู่ง หมวัง ไฮ์ หย่า กวั่ง เม่ย เญย แปะ ฝีง, อิสะลาเอน เมี่ยน, เญย ฒุ์ย, ต้อ นิ่น บัว หฑวน ต้าย เยียม เม่ย เหธย ปุน นิ่น บัว เหธา นิ่น บัว เญย อง-ถาย เญย เต่ย-ปูง.

26“เม่ย เญย แปะ ฝีง, อิสะลาเอน เมี่ยน, หาย หฒั่น ป์าม ฒุ์ย ต่อง เม่ย, เม่ย ฯฒฯ ตี่ง ฒุ์ย ปุน ลู่ง ฮ์าน, ไม้ ตุ้ย บยู่ง เหฌี่ย, สี ก๊อง นิ่น บัว ฮวิน น้าย นอม ต๋อง เต๋า เก๋า, เหญี่ยม เม่ย เญย บั๋ว หย่า กวั่ง นิ่น บัว เญย ฒุ์ย,

27โท้ เม่ย เยียม กู้ หงว่าย ลู่ง หมวัง ไฮ์ ฯฒฯ กวั่ง เม่ย เญย โปว, เซ เม่ย เญย แปะ ฝีง, อิสะลาเอน เมี่ยน, เญย ฒุ์ย, หย่า หฌาว หลง เญย เจ๊า เห่ว นิ่น บัว เอย เจี๊ยน โหฒว. โท้ ปุน บยู่ง เหฌี่ย เม่ย ปุน เม่ย เญย แปะ ฝีง หฑิบ เญย เดา.

28“สี ก๊อง เยียม น้าย นอม เต่ย-ปูง ปวั้ง ต้ม หง่อ ไฟ ปุ๊ด ต้ม ววน ไฟ, เบย้า เจี๋ย บั๊ว ปุ๊ด หลัด โต์ว, ไฟ จ๊บ-เหญ่ย ฟ้าน, ไฟ แกง-เมา ฟ้าน, ไฟ ม่าย วิน-วั้ง เว่ย ก๋อม อ๋อย เบ๊าะ เม่ย บัว เญย หาย นอม ฒี่ง, ไฟ ไม้ กุ๊น ปวั้ง หฒุ หาย หญู่ง เหฒะ หน่าน, หาย หญู่ง แป่ง,

29โท้ หมวัง นิ่น บัว เต๋า เก๋า เญย หว่า. สี ก๊อง หาย เต้า เมี่ยน ไฟ เม่ย เญย หฒวัง แปะ ฝีง, อิสะลาเอน เมี่ยน, โจ้ว เม่ย, เก๊าะ-เมี่ยน หย่า เฮญี้ยว มุน เถา เก๊าะ-เมี่ยน เญย ฒุ์ย, หย่า ซูง ปั์ว หูง เจี๊ยน น้าย นอม หฒั่ง ทิน-ฮู่ง เญย เปย๊า,

30โท้ เยียม กู้ หงว่าย ลู่ง, เม่ย เยียม เญย ต๋อง, หมวัง ไฮ์ หย่า กวั่ง นิ่น บัว เญย ฒุ์ย. เม่ย หย่า ฮิ้ว ตุ๊ เมี่ยน เญย เฮญี้ยว, หฒิว เก๊าะ-เมี่ยน โหฒว เญย เจ๊า เถง นิ่น บัว (เหว่ย หฒุ ขูง ม่าย เม่ย กั้น ฮนั้ง ฮิ้ว ตุ๊ หฒวัง ป้าม เมี่ยน เญย เฮญี้ยว.)

31ฮนั้ง หน่าย เหว่ย ปุน นิ่น บัว เยียม เม่ย เหธย ปุน เยีย บัว เญย อง-ถาย เญย เต่ย-ปูง เหยียด เสย ท่าย เม่ย หย่า กัน เม่ย เญย เจ๊า ยั่ง.

32“ก๊อง เถา กั้น ฝีง เมี่ยน, เซ ไม้ เฒ์ย เม่ย เญย อิสะลาเอน แปะ ฝีง, มป่า เหว่ย เม่ย โฮล ไห่ เญย เม่ง เหธา เม่ย เญย ปั์ว เญย ต้ม ชะ เยียม โก เญย เต่ย-ปูง ต้าย. นิ่น ต้าย หูง เจี๊ยน น้าย นอม เปย๊า เต๋า เก๋า,

33โท้ เม่ย เยียม กู้ หงว่าย ลู่ง, เม่ย เยียม เญย ต๋อง, หมวัง ไฮ์ หย่า เอย เจี๊ยน น้าย เต้า กั้น ฝีง เมี่ยน โท้ เญย หว่า โหฒว, เหว่ย ปุน ลู่ง เดี๊ย หม่าน ฝีง เมี่ยน ฮิ้ว ตุ๊ เม่ย เญย เม่ง หย่า กั้ม เหฑีย เม่ย, ท่าย เม่ย ฮนั้ง เม่ย เญย แปะ ฝีง, อิสะลาเอน เมี่ยน, กั้ม เหฑีย เม่ย, ท่าย เม่ย นอ. นิ่น บัว หย่า ไฮ่ ฮิ้ว ตุ๊ เยีย เหธย น้าย นอม เปย๊า, เมี่ยน ฯฒฯ กัน เม่ย เญย บั๋ว เห่ว.

34“สี ก๊อง เม่ย เญย แปะ ฝีง ธ้วด มี่ง เหธา นิ่น บัว เญย วิน-วั้ง เบ๊าะ จ๋า, ไม้ กุ๊น เม่ย พ้าย นิ่น บัว มี่ง หาย นอม ต๋อง, นิ่น บัว หย่า หูง เจี๊ยน เม่ย กิ๊น ต้าย น้าย นอม ฒี่ง เหธา เยีย เหว่ย เม่ย เญย เม่ง เหลียบ ต้าย เญย เปย๊า,

35โท้ เม่ย เยียม กู้ หงว่าย ลู่ง หมวัง นิ่น บัว เต๋า เก๋า โจ้ว เญย หว่า, ปุน นิ่น บัว ตุ๊ ฮี่ง.

36“เม่ย เญย แปะ ฝีง หาย หฒั่น ป์าม ฒุ์ย ต่อง เม่ย, (เหว่ย หฒุ ไม้ ม่าย หาย เต้า ป้าม เมี่ยน ไม้ ป์าม ฒุ์ย,) เม่ย ฯฒฯ เฉีย เจี์ย นิ่น บัว, เฒาะ นิ่น บัว จิว ปุน วิน-วั้ง ธ้าง นิ่น บัว มี่ง เถา วิน-วั้ง เญย เต่ย-ปูง, ไม้ กุ๊น โก ไฟ ฟัด,

37สี ก๊อง นิ่น บัว เยียม หฒุ ธ้าง มี่ง เญย เต่ย-ปูง จั๋ง หฒุ นิ่น บัว เญย ฒุ์ย ฯฒฯ ก๊อย เฮญี้ยว ก๊อย เอ๋ย หฑวน ต้าย ล์อ เม่ย ก๊อง, ‘เยีย บัว ป์าม ฒุ์ย, โหฒว หว่าย สี่,’

38สี ก๊อง นิ่น บัว เยียม หฒุ ธ้าง มี่ง เญย เต่ย-ปูง ปวั๊ง เฮญี้ยว ปวั๊ง เอ๋ย หฑวน ต้าย ล์อ เม่ย, แอ๋ง หูง เจี๊ยน เม่ย จิว ปุน นิ่น บัว เญย อง-ถาย เญย เต่ย-ปูง เหธา เม่ย กิ๊น ต้าย เญย ฒี่ง เหธา เยีย เหว่ย เม่ย เญย เม่ง เหธย ต้าย เญย เปย๊า เต๋า เก๋า,

39โท้ เม่ย เยียม กู้ หงว่าย ลู่ง, เม่ย เยียม เญย ต๋อง, หมวัง นิ่น บัว เต๋า เก๋า โจ้ว เญย หว่า, หย่า ค้อ-เลี่ยน นิ่น บัว. โท้ กวั่ง เม่ย เญย เมี่ยน เญย ฒุ์ย, ต้ง ป์าม ฒุ์ย ต่อง เม่ย วั้ว เต๋ย แปะ ฝีง.

40“โท้ เยีย เญย ทิน-ฮู่ง อี้ หฒั่น หนูง มฒีง หมั่ง เจี๊ยน หย่า แปง มน่อม หมวัง เยียม น้าย นอม ต๋อง เต๋า เก๋า เญย หว่า.

41“โอ เฒี้ยว ทิน-ฮู่ง อ่า, โท้ อี้ หฒั่น เจี์ย ต้าย ม่าะ! เลี่ยม เม่ย เหธา เม่ย ม่าย ชะ เญย วั้ว นอม แล์ง แหง่ง หว่า ฟาง ต้าย เยียม เม่ย ฮิด ขวน เญย ต๋อง. โอ เฒี้ยว ทิน-ฮู่ง อ่า, โท้ ปุน เม่ย เญย ไซ เมี่ยน ตุ๊ เม่ย เญย เหฌียว เอน, หย่า โท้ ปุน เม่ย เญย ธีง-เหฑ่ง แปะ ฝีง เฌียน-โย่ว เหว่ย หฒุ เม่ย เซ หลง ไห่.

42โอ เฒี้ยว ทิน-ฮู่ง, ไม้ ตู๋ง เฆ่ม เม่ย หล่ง โย่ว ออน ต้าย วั้ว เต้า. โท้ จั๋ง เจี๊ยน เม่ย แล์ง เหฒียบ ฒัวะ เญย ฮนั้ม เม่ย เญย โปว, ดาวิด, วั้ว เต๋ย หว่า.”

← Chapter 5 Jump to: Chapter 7 →