2 Chronicles 28

Mien Bible (Thai Script) © Thailand Bible Society, 2007

← Chapter 27 Jump to: Chapter 29 →

1อาหัด ฝาว เหว่ย โหฒว ฮู่ง วั้ว หฒั่น, นิ่น ตุ๊ หญี่ เหฒียบ หฮญัง. นิ่น หย่า เยียม เยลูซาเลม กุ๊น เหฒียบ หลัวะ หฮญัง. นิ่น ไม้ ฮนั้ง นิ่น เญย อง-ถาย, ดาวิด, นอ. หฒิว เฒี้ยว หมั่ง, อาหัด โหฒว ไม้ หอบ.

2นิ่น เอย เจี๊ยน อิสะลาเอน เญย ฮู่ง โหฒว. นิ่น หย่า โต๋ หมิ่ว-ฝัง เหว่ย ป๋าย บาอัน เฒี่ยน.

3นิ่น เยียม เบนฮินโนม ฮ์อง ปั๊ว ฮูง หย่า เฒาะ นิ่น เญย ตอน บัว หล่ง โต์ว ปั๊ว เหฒี่ย ฝ่ง ห่อ, หฒวด เจี๊ยน เฒี้ยว หฒุ่น ธ้วด อิสะลาเอน เมี่ยน เญย วั้ว ด่าง แหมง วั้ว เต๋ย ฝีงๆ เมี่ยน โหฒว กั้ม เฑี้ย ไห่ เญย สี่.

4นิ่น เยียม ฮลัง หฒั่ง เฒี่ยน เญย ต๋อง เหธา บง-ไอ๊ ต๋อง, แอ๋ง เยียม ติ้วๆ เดี๋ยง-ฝาน ฝ่ง ห่อ ปั๊ว เหฒี่ย หย่า ปั๊ว ฮูง.

5เหว่ย น้าย เฒี้ยว, นิ่น เญย ทิน-ฮู่ง, เฒาะ นิ่น จิว ปุน ซีเลีย เญย ฮู่ง. ซีเลีย เญย ฮู่ง เบ๊าะ ฮี่ง นิ่น หย่า ธ้าง นิ่น เญย แปะ ฝีง ธั้ม เญย ต้อ มี่ง ดามัดกัด ฒี่ง. ทิน-ฮู่ง หย่า เฒาะ นิ่น จิว ปุน อิสะลาเอน เญย ฮู่ง. อิสะลาเอน เญย ฮู่ง ปุน นิ่น บัว หฒุ ไต๋ ไต่ ธั้ม.

6ดุ ฮนอย ฮนั้ง เลมาลิยา เญย ตอน, เปคา, ไต๋ ยูดา เมี่ยน เบ๊าะ จ๋า เฮ้น เญย แปง เหยียด สิน อี หว่าน เต้า หลาย นิ่น บัว กวั่ง เฒี้ยว, นิ่น บัว เญย อง-ถาย เญย ทิน-ฮู่ง.

7ม่าย เต้า เอฟาอิม เมี่ยน เบ๊าะ จ๋า เฮ้น เญย แปง, บั๋ว เห่ว สิกลี, ไต๋ ฮู่ง เตี๋ย เญย ตอน, มาอาเสอา, เหธา โก๋ว ฮู่ง ติ่น เญย ต้ม เจียน, อัดลีคัม, เหธา เยียม ฮู่ง เตี๋ย กะเดี๊ย แหมง โฮล เจี๋ย วั้ว เต้า เอนคานา.

8อิสะลาเอน เมี่ยน กว๊าด นิ่น บัว เญย ก๋อ-โย์ว, มเซียะ ตอน เหธา น่าม โญ์ว มี่ง. เหยียด ฒู้ง ม่าย อี สิน เต้า. นิ่น บัว หย่า ธ้าง ตุ๊ กะน้าย ธั้ม ไห่, ต้อ เจี๊ยน หฑวน สะมาเลีย.

9มป่า เยียม วั้ว ม่าย เฒี้ยว เญย เหยียด เต้า โต่ว หว่า เมี่ยน, บั๋ว เห่ว โอเดด. จุน-แปง กวั้น หฑวน เถา สะมาเลีย นิ่น ธ้วด มี่ง ฒิบ ฯฒฯ ก๊อง บั๋ว นิ่น บัว, “เหว่ย หฒุ เฒี้ยว, เม่ย บัว เญย อง-ถาย เญย ทิน-ฮู่ง, เฉีย เจี์ย ยูดา, นิ่น เฒาะ นิ่น บัว จิว ปุน เยียม เม่ย บัว เญย ปั์ว-เดี๊ย. เม่ย บัว เฉีย เจี์ย เจี๊ยน ไต๋ เญย เฉีย ฝาว เถา ลู่ง หมี่ อ๊ะ.

10อี้ หฒั่น เม่ย บัว ม่าย เฮญี้ยว อ๊าบ เหธา เม่ย บัว จวั่ง ฝีง เญย เมี่ยน โหฒว เม่ย บัว เญย โน่ว เก๊า โน่ว เป์ย. มป่า เม่ย บัว กั้น ไม้ ป์าม ฒุ์ย ต่อง เฒี้ยว, เม่ย บัว เญย ทิน-ฮู่ง ไฟ?

11อี้ หฒั่น เม่ย บัว หมวัง เยีย ก๊อง ม่าะ! อ๋อย หฒุ เฒาะ เม่ย บัว กว๊าด ต้าย จวั่ง ฝีง เญย ก๋อ-โย์ว ฝูง หฑวน เหว่ย หฒุ เฒี้ยว เฉีย เจี์ย! ไห่ เม่ย บัว.

12ม่าย เต๋ย เอฟาอิม เญย เปย๊ย เฒ้ย, เซ เยโฮฮานัน เญย ตอน, อาซาลิยา, เหธา เมซินเลโม้ด เญย ตอน, เบเลคิยา, เหธา ซันลูม เญย ตอน, เยฮิดคียา, เหธา หัดไล เญย ตอน, อามาสา, โซ้ว เจี์ย ต้าย แหง่ง เจี๊ยน เบ๊าะ จ๋า หฑวน ต้าย เญย หฒวัง เมี่ยน.

13นิ่น บัว ก๊อง, “เม่ย บัว ไม้ ตู๋ง ต้อ ธ้าง ต้าย น้าย เต๋ย เมี่ยน เปียะ น้าย. ไม้ เฒย แอ๊ะ, เม่ย บัว โหฒว ต่อง เฒี้ยว. เยีย บัว ฒู้ง ม่าย ฒุ์ย หมี่ อ๊ะ. เม่ย บัว แอ๋ง จา ปุน เยีย บัว ดาม เก้า เฮนี้ย. บัว ม่าย ฒุ์ย โฮล ไห่ อ๊ะ. นิ่น ฒู้ง โน์ว ไห่ อิสะลาเอน เมี่ยน หมี่ อ๊ะ.”

14แปง ฯฒฯ เฒาะ กว๊าด ต้าย เญย เมี่ยน เหธา ธ้าง ต้าย เญย กะน้าย กวั่ง เจี๊ยน เปย๊ย เฒ้ย เหธา กั๊บ ฒุ้น เญย หฒวัง เมี่ยน เญย หฑะเฮมียน.

15ต้ง เต๊ะ เจี๊ยน บั๋ว เห่ว วั้ว เต๋ย เมี่ยน ฯฒฯ ต้อ กว๊าด ต้าย เญย เมี่ยน. เยียม วั้ว เต๋ย ธ้าง ต้าย เญย กะน้าย นิ่น บัว เฒาะ เต๋ย ลุย-โหว ปุน แล่ง แก๊ง เญย วั้ว เต๋ย ฒุ. นิ่น บัว ปุน ลุย-โหว, เฮ่, หญั่น ฮบ เหธา ฑ้าด กะน้าย-มุน เญย โย่ว. เมา เญย วั้ว เต๋ย นิ่น บัว ปุน เก้ เจี๊ยน ล่อ ฝูง เถา นิ่น บัว กั้น เญย ก๋อ-โย์ว เยียม เยลีโค, เซ ตาว เดี๋ยง เญย ฒี่ง. ฆะฮ้า นิ่น บัว กั้น หฑวน สะมาเลีย หมี่ อ๊ะ.

16วั้ว หฒั่น อาหัด ฮู่ง ฝูง เมี่ยน มี่ง ล์อ อัดซีเลีย เญย ฮู่ง โท้ นิ่น เถง,

17เหว่ย หฒุ เอโดม เมี่ยน แอ๋ง ต้าย เบ๊าะ ยูดา หย่า กว๊าด เมี่ยน มี่ง.

18ฟีลิสะเตีย เมี่ยน หย่า ธ้าง เปียะ ยูดา บง-ไอ๊ ต๋อง เหธา เนเกบ. นิ่น บัว ธ้าง ตุ๊ แอ๋ง เยียม เจี๊ยน เบดเซเม้ด, ไอยาโลน, เกเดโล้ด, โสโค เหธา เว่ย ก๋อม เญย ล์าง, ทิมนาฮา เหธา เว่ย ก๋อม เญย ล์าง เหธา กิมโซ เหธา เว่ย ก๋อม เญย ล์าง.

19เฒี้ยว ฒัด ยูดา เหฌี่ย, หลาย อิสะลาเอน เญย ฮู่ง, อาหัด, เหว่ย หฒุ นิ่น เยียม ยูดา โธะ เมี่ยน โหฒว หว่าย สี่ หย่า ไม้ เหฒียบ ฒัวะ เญย โหฒว ปุน เฒี้ยว.

20อัดซีเลีย เญย ฮู่ง, ทิกลัดปิเลเส, ต้าย เบ๊าะ นิ่น, ฒู้ง ห่อย ไม้ เฒ์ย เถง นิ่น ม่าย ชะ.

21อาหัด เฒาะ เยียม หฒั่ง เฒี้ยว เญย เปย๊า เญย ฒิ่น ฒ่อย เหธา ฮู่ง ติ่น เญย ฒิ่น ฒ่อย เหธา โหฒว แปะ ฝีง เญย หฒวัง เปย๊ย เฒ้ย เญย ฒิ่น ฒ่อย ฝูง ปุน อัดซีเลีย เญย ฮู่ง, มป่า เถง ไม้ หฒุ นิ่น กั้น.

22น้าย เต้า อาหัด ปวั้ง หฒุ โค้ว หน่าน เญย เฒี่ยง โห่, นิ่น เก้า ฟัด ไม้ เหฒียบ ฒัวะ เญย โหฒว ปุน เฒี้ยว.

23นิ่น ต้อ กะน้าย ฝ่ง โห่ เหฒี่ย ปุน ดามัดกัด เญย เฒี่ยน, ต้ง ปุน นิ่น หฒุ เซวย วั้ว เต๋ย. นิ่น หย่า ก๊อง, “เหว่ย หฒุ ซีเลีย เญย ฮู่ง เญย เฒี่ยน เถง นิ่น บัว, เยีย ฯฒฯ ฝ่ง ห่อ เหฒี่ย ปุน น้าย เต๋ย เฒี่ยน, นิ่น บัว ฯฒฯ เถง เยีย.” มป่า น้าย เต๋ย เฒี่ยน ปุน นิ่น เหธา อิสะลาเอน เญย หฒวัง เมี่ยน หฒุ เหมียด.

24อาหัด เฒาะ หฒั่ง ทิน-ฮู่ง เญย เปย๊า เญย เหยียด ฒู้ง จา-ต๋อง เบ๊าะ ฮู้ โหฒว เหฒีย เหฮลง. นิ่น กวน เจี๊ยน หฒั่ง เฒี้ยว เญย เปย๊า เญย แก้ง, หย่า เยียม เยลูซาเลม เญย นอมๆ เก๊าะ เหว่ย กั้น เหธย เหฒี่ย-ต้อง.

25เยียม ยูดา เญย นอมๆ ฒี่ง นิ่น เหธย เยียม ฮลัง เญย ต๋อง เหว่ย ปั๊ว ฮูง ปุน เหญี่ย เญย เฒี่ยน, ฯฒฯ ธัวะ เฒี้ยว, นิ่น เญย ทิน-ฮู่ง, เฉีย เจี์ย ไห่.

26อาหัด โหฒว เหฒ่ง เหฌี่ย เญย สี่ เหธา นิ่น เญย เหยียด ฒู้ง เจ๊า, เยียม กอน เถา เซ้ด เมว์ย, เฟี้ย เจี๊ยน ยูดา เหธา อิสะลาเอน เญย ฮู่ง โต้ว ตาน.

27อาหัด เกวย เสย หมี่ อ๊ะ, หย่า หฒัง เจี๊ยน เยลูซาเลม ฒี่ง. มป่า นิ่น ไม้ ตุ๊ เยียม อิสะลาเอน เญย ฮู่ง เญย โฒ้ว-เก้ม. นิ่น เญย ตอน, เฮเซคียา, หฑิบ เจี๊ยน นิ่น โหฒว ฮู่ง.

← Chapter 27 Jump to: Chapter 29 →