2 Chronicles 23

Mien Bible (Thai Script) © Thailand Bible Society, 2007

← Chapter 22 Jump to: Chapter 24 →

1เถา ตะเธี้ยด หฮญัง เยโฮยาดา ไซ เมี่ยน โหฒว เฮ้น เจี๊ยน ฝาว. นิ่น ฯฒฯ ปุน กุ๊น เหยียด แป๊ะ เต้า เญย แปง-เป๊ย เหธา นิ่น แล์ง หว่า. ม่าย เยโลฮัม เญย ตอน, อาซาลิยา, เหธา เยโฮฮานัน เญย ตอน, อิสะมาเอน, เหธา โอเบด เญย ตอน, อาซาลิยา, เหธา อาดายา เญย ตอน, มาอาเสอา, เหธา สิกลี เญย ตอน, เอลีซาฟัด.

2นิ่น บัว ฯฒฯ มี่ง ก๋อม ยูดา เต่ย, เห่ว เยียม ยูดา เญย นอมๆ ฒี่ง เญย เลวี เมี่ยน เหธา อิสะลาเอน เญย ปู้ง ป่วน เปย๊ย เฒ้ย ต้าย ฒุ้น. นิ่น บัว ฯฒฯ ต้าย เถา เยลูซาเลม.

3กั๊บ ฒุ้น เญย หฒวัง เมี่ยน ฯฒฯ เยียม หฒั่ง ทิน-ฮู่ง เญย เปย๊า เหธา ฮู่ง เตี๋ย เหลียบ เจี์ย แหง่ง หว่า. เยโฮยาดา ก๊อง บั๋ว นิ่น บัว, “หมั่ง ม่าะ! น้าย เซ ฮู่ง เตี๋ย เญย ตอน. นิ่น อ๋อย หฒุ โหฒว ฮู่ง กุ๊น ฮนั้ง เฒี้ยว ก๊อง ดาวิด เญย เฒ้ย-ฟุน อ๋อย หฒุ กุ๊น นอ.

4เม่ย บัว อ๋อย หฒุ ฮนั้ง น้าย นอ โหฒว. เถา ตี้ง กง ฮนอย, ไซ เมี่ยน เหธา เลวี เมี่ยน หฒิว ล่วน ปาน เปียะ วั้ว ฮนอย, ม่าย ปัว โก๊ว เญย เหยียด โก๊ว อ๋อย หฒุ ฒั้ว แก้ง.

5ปัว โก๊ว เญย เหยียด โก๊ว อ๋อย หฒุ ฒั้ว ฮู่ง ติ่น, ปัว โก๊ว เญย เหยียด โก๊ว อ๋อย หฒุ ฒั้ว กอน-โด๊ะ วั้ว เต้า หลาด แก้ง. หฒวัง แปะ ฝีง อ๋อย หฒุ เยียม หฒั่ง เฒี้ยว เญย เปย๊า เญย หลาด กะญั์ว.

6ไม้ ตู๋ง ปุน หาย เต้า เปียะ หฒั่ง เฒี้ยว เญย เปย๊า ธ้วด ลิ์ว โหฒว กง ฟู-สู เญย ไซ เมี่ยน เหธา เลวี เมี่ยน. น้าย เต๋ย เปียะ ตุ๊ เญย, เหว่ย หฒุ นิ่น บัว ธีง-เหฑ่ง, มป่า หฒวัง แปะ ฝีง อ๋อย หฒุ เอย เจี๊ยน เฒี้ยว พ้าย เญย หว่า.

7เลวี เมี่ยน อ๋อย หฒุ เว่ย ก๋อม ฮู่ง เตี๋ย, เต้าๆ นั้น เจี๊ยน เบ๊าะ จ๋า เญย หวัวะ กิ่น. หาย เต้า เปียะ หฒั่ง ทิน-ฮู่ง เญย เปย๊า, อ๋อย หฒุ ไต๋ ไต่. ฮู่ง เตี๋ย เปียะ ธ้วด เญย เฒี่ยง โห่ หย่า อ๋อย หฒุ กัน เจี๊ยน นิ่น เยียม.

8เลวี เมี่ยน เหธา ยูดา เญย เหยียด ฒู้ง เมี่ยน ฯฒฯ เอย เจี๊ยน เยโฮยาดา ไซ เมี่ยน พ้าย เญย หว่า โหฒว. เก๊าะ-เมี่ยน ต้อ กั้น เญย เมี่ยน, เซ ตี้ง กง ฮนอย หฒิว ล่วน ปาน เปียะ กง ไฟ ธ้วด กง เญย เมี่ยน, เหว่ย หฒุ เยโฮยาดา ไซ เมี่ยน ไม้ ปู๋ง หาย เต้า ธ้วด กง.

9เยโฮยาดา ไซ เมี่ยน เฒาะ เยียม หฒั่ง ทิน-ฮู่ง เญย เปย๊า ฒิ่น ด่าง เป๋น ดาวิด ฮู่ง เญย ธัง เหธา ท้อง-ป้าย ปุน หฒวัง แปง-เปย๊ย.

10นิ่น หย่า พ้าย หฒวัง แปะ ฝีง, เก๊าะ-เมี่ยน เญย ปั์ว นั้น เจี๊ยน หวัวะ กิ่น, เปว ฮู่ง เตี๋ย, เยียม หฒั่ง ทิน-ฮู่ง เญย เปย๊า บย่าว แหมง ปูง มี่ง เถา หฒาย แหมง ปูง, เว่ย ก๋อม เหฒี่ย-ต้อง เหธา เปย๊า.

11เยโฮยาดา ไซ เมี่ยน ต้อ ฮู่ง เตี๋ย เญย ตอน ธ้วด ต้าย, หย่า เฒาะ ฮู่ง นี้ง เถง นิ่น ด๋ง เจี๊ยน, แอ๋ง เฒาะ แล์ง แหง่ง หว่า โซว จิว ปุน นิ่น. เยโฮยาดา เหธา นิ่น เญย ตอน บัว หย่า หล่ง โย่ว ออน นิ่น. หฒวัง เมี่ยน ฯฒฯ เห่ว เจี๊ยน ก๊อง, “โท้ ปุน ฮู่ง เตี๋ย เฒี่ยง ตุ๊ หม่าน ฝุย.”

12อาทาลิยา ไฮ์ แปะ ฝีง ถิว หย่า เธง ฮู่ง เตี๋ย เญย เฉีย บุย, นิ่น ฯฒฯ เปียะ หฒั่ง เฒี้ยว เญย เปย๊า กะญั์ว เถา แปะ ฝีง วั้ว.

13ฮู่ง หม่า หมั่ง ปวัด ฮู่ง เตี๋ย โซ้ว เจี๊ยน เปียะ แก้ง เญย ต๋อง, ฮู่ง เญย เดี้ยว กะเฮลน. แปง-เปย๊ย เหธา ปย๊ม หฑัด เญย เมี่ยน โซ้ว เจี๊ยน ฮู่ง เญย กะเฮลน. กั๊วะ เญย หฒวัง แปะ ฝีง เฌียน-โย่ว หย่า ปย๊ม จอง. แอ๋ง ม่าย ป๋าว ฑูง เญย เมี่ยน หล่ง โหฒว ฑูง เญย จา-สี่ ต้อ นิ่น บัว ป๋าว ฑูง เธง ทิน-ฮู่ง. อาทาลิยา ฯฒฯ เป๊ด นิ่น เญย ลุย, เห่ว เจี๊ยน ก๊อง, “เป่ย ซี่ อ๊า โล่ะ! เป่ย ซี่ อ๊า โล่ะ!”

14เยโฮยาดา ไซ เมี่ยน ต้อ กุ๊น เหยียด แป๊ะ เต้า แปง เญย แปง-เปย๊ย ธ้วด ต้าย ก๊อง บั๋ว นิ่น บัว, “ต้อ ฮู่ง หม่า ยั่ง แปง เญย บุด๋ง ธ้วด ต้าย. หาย เต้า กัน ฮู่ง หม่า มี่ง, อ๋อย หฒุ หล่ง หฑุ ด๊าว ไต๋ วั้ว เต้า ไต่.” เหว่ย หฒุ ไซ เมี่ยน ก๊อง เจี๋ย, “ไม้ ตู๋ง เยียม หฒั่ง เฒี้ยว เญย เปย๊า ไต๋ ฮู่ง หม่า.”

15นิ่น บัว ฯฒฯ เฒาะ ฮู่ง หม่า อ๊ะ. มี่ง เถา ฮู่ง ติ่น, เปียะ ม์า-แก้ง เญย ต๋อง, นิ่น บัว ฯฒฯ ไต๋ นิ่น ไต่ หมี่ อ๊ะ.

16เยโฮยาดา กั้น เหธา แปะ ฝีง เหธา ฮู่ง เตี๋ย เหลียบ เจี์ย แหง่ง หว่า แล์ง นิ่น บัว เหยียด ฒู้ง อ๋อย โหฒว เฒี้ยว เญย แปะ ฝีง.

17กั๊วะ กะญั์ว เญย หฒวัง แปะ ฝีง มี่ง บาอัน เฒี่ยน เญย หมิ่ว-เปย๊า แธะ เหฌี่ย เหฑ่ง. นิ่น บัว เบ๊าะ เหฒี่ย-ต้อง เหธา หมิ่ว-ฝัง ฮู้ หม่วน เหฑ่ง หย่า เยียม เหฒี่ย-ต้อง หฑะเฮมียน แหมง ไต๋ บาอัน เฒี่ยน เญย ไซ เมี่ยน, มัดทาน.

18เยโฮยาดา พ้าย ฒั้ว แก้ง เมี่ยน ฒั้ว หฒั่ง เฒี้ยว เญย เปย๊า หย่า ปุน นิ่น บัว เยียม เลวี ไซ เมี่ยน เญย ปั์ว-เดี๊ย, ต้ง ดาวิด ตี่ง เหฒียง โก๋ว หฒั่ง เฒี้ยว เญย เปย๊า หย่า หฒิว เฟี้ย เจี๊ยน โมเซ เญย เล์ย-หลัด ฝ่ง ห่อ กะน้าย ปั๊ว เหฒี่ย ปุน เฒี้ยว. นิ่น บัว หย่า อ๋อย หฒุ หฒิว ดาวิด พ้าย เญย หว่า เฌียน-โย่ว เญย ป๋าว ฑูง.

19นิ่น หย่า พ้าย เมี่ยน ฒั้ว หฒั่ง เฒี้ยว เญย เปย๊า เญย หลาด แก้ง, เหว่ย ไม้ ปุน ม่าย หาย หญู่ง หวุย เญย หาย เต้า เมี่ยน ตุ๊ เปียะ.

20เยโฮยาดา ต้อ เจี๊ยน กุ๊น เหยียด แป๊ะ เต้า แปง เญย แปง-เปย๊ย เหธา โหฒว โฮล เญย เมี่ยน เหธา กุ๊น แปะ ฝีง เญย ต้ม เจียน เหธา กั๊วะ หฒั่ง เญย หฒวัง เมี่ยน. นิ่น บัว ต้อ ฮู่ง เตี๋ย เยียม หฒั่ง เฒี้ยว เญย เปย๊า เหฌี่ย ต้าย, กัน วั้ว เจี๋ย เญย แก้ง เปียะ ฮู่ง ติ่น. นิ่น บัว ฯฒฯ ปุน ฮู่ง เตี๋ย เฒว์ย เจี๊ยน ฮู่ง เหว่ย.

21กั๊วะ หฒั่ง เญย หฒวัง แปะ ฝีง ฯฒฯ เฌียน-โย่ว. ฒี่ง กะญั์ว หย่า ถาย-แป้ง เญย, เหว่ย หฒุ อาทาลิยา ฮู่ง หม่า หฒุ หฑุ ด๊าว ไต๋.

← Chapter 22 Jump to: Chapter 24 →