2 Chronicles 36

Mien Bible (Thai Script) © Thailand Bible Society, 2007

← Chapter 35 Jump to:

1ยูดา เมี่ยน เหลียบ โยอาหาด หฑิบ เจี๊ยน นิ่น เญย เตีย โหฒว ฮู่ง เยียม เยลูซาเลม.

2โยอาหาด ฝาว เหว่ย โหฒว ฮู่ง วั้ว หฒั่น, นิ่น เญย หฮญัง-เจ๊ย ตุ๊ หญี่ เหฒียบ ฟาม หฮญัง. นิ่น เยียม เยลูซาเลม กุ๊น ปัว หฮลา เหญียะ.

3อียิบ เญย ฮู่ง ถุย นิ่น เหฌี่ย นิ่น เญย เหว่ย แอ๋ง ปาด ยูดา ธ้วด อี ธิน เหยียด แป๊ะ เหธา ปยา จ้อย ญ่าน เหธา หญี่ เหฒียบ เยี้ยด จ้อย เจียม.

4อียิบ เญย ฮู่ง, เนโค, เหลียบ โยอาหาด เญย ก๋อ, เอลียาคิม, โหฒว ฮู่ง กุ๊น ยูดา เหธา เยลูซาเลม แอ๋ง ทิ้ว นิ่น เญย บั๋ว เห่ว เยโฮยาคิม. มป่า เนโค เฒาะ เยโฮยาคิม เญย โย์ว, โยอาหาด, ต้อ มี่ง เถา อียิบ เต่ย-ปูง.

5เยโฮยาคิม ฝาว เหว่ย โหฒว ฮู่ง วั้ว หฒั่น, นิ่น เญย หฮญัง-เจ๊ย ตุ๊ หญี่ เหฒียบ ฮม์ หฮญัง. นิ่น เยียม เยลูซาเลม กุ๊น เหฒียบ เยี้ยด หฮญัง. หฒิว เฒี้ยว, นิ่น เญย ทิน-ฮู่ง หมั่ง, นิ่น โหฒว หว่าย สี่.

6บาบีโลน เญย เนบูคัดเน้ดซา ฮู่ง ต้าย เหธา นิ่น เบ๊าะ จ๋า, เฒาะ ต้ง ซิ หลิ่ม โด้ เจี๊ยน เหว่ย ต้อ นิ่น มี่ง บาบีโลน.

7เนบูคัดเน้ดซา หย่า เฒาะ เต๋ย หฒั่ง เฒี้ยว เญย เปย๊า กะญั์ว เญย จา-สี่ ต้อ มี่ง เถา บาบีโลน, อัน เจี๊ยน นิ่น เญย หมิ่ว-เปย๊า.

8เยโฮยาคิม กุ๊น เญย เฒี่ยง โห่ โหฒว ลิ์ว เหฒ่ง เหฌี่ย เญย สี่, เหธา นิ่น โหฒว กั้ม เฑี้ย เญย สี่ เหธา เหยียด ฒู้ง ไม้ เป๋น เญย เจ๊า, เฟี้ย เจี๊ยน เยียม อิสะลาเอน เหธา ยูดา เญย ฮู่ง โต้ว ตาน. นิ่น เญย ตอน, เยโฮยาคีน, หฑิบ เจี๊ยน นิ่น โหฒว ฮู่ง.

9เยโฮยาคีน ฝาว เหว่ย โหฒว ฮู่ง วั้ว หฒั่น, นิ่น เญย หฮญัง-เจ๊ย ตุ๊ เหฒียบ เป๊ด หฮญัง นิ่น เยียม เยลูซาเลม กุ๊น ปัว หฮลา เหธา เหฒียบ ฮนอย. หฒิว เฒี้ยว หมั่ง, นิ่น โหฒว หว่าย สี่.

10เถา ธุน เกว๋ย ฮนอย, เนบูคัดเน้ดซา ฮู่ง พ้าย เมี่ยน มี่ง ต้อ เยโฮยาคีน เหธา เยียม หฒั่ง เฒี้ยว เญย เปย๊า หญู่งๆ จ๋าย เญย จา-ต๋อง, มี่ง บาบีโลน. นิ่น หย่า เหลียบ เยโฮยาคีน เญย โย์ว-เตี๋ย, เสเดคียา, โหฒว ฮู่ง กุ๊น ยูดา เหธา เยลูซาเลม.

11เสเดคียา ฝาว เหว่ย โหฒว ฮู่ง วั้ว หฒั่น นิ่น ตุ๊ หญี่ เหฒียบ เยี้ยด หฮญัง.

12หฒิว เฒี้ยว, นิ่น เญย ทิน-ฮู่ง, หมั่ง, นิ่น โหฒว หว่าย สี่. โต่ว หว่า เมี่ยน, เยเลมี, ต้อ เฒี้ยว เญย หว่า ขวิน นิ่น มป่า นิ่น ไม้ เยียม เยเลมี เญย หฑะเฮมียน ฒัด กั้น เหฌี่ย.

13เนบูคัดเน้ดซา อ๊าบ นิ่น เฒี้ยง เจี๊ยน ทิน-ฮู่ง โฮ้ว หว่า, มป่า นิ่น หธ่อ แหง่ง เนบูคัดเน้ดซา. นิ่น เญย เฮญี้ยว แหง่ง, ไม้ ก๊อย เฮญี้ยว หฑวน ต้าย ล์อ เฒี้ยว, นิ่น เญย ทิน-ฮู่ง.

14ไม้ ตาน บัวะ น้าย. หฒวัง ไซ เมี่ยน เญย เปย๊ย เฒ้ย เหธา แปะ ฝีง ฟี่ ฮนั้ง เญย ไม้ เหฒียบ ฒัวะ เญย โหฒว เหยียด เต๋ย. นิ่น บัว กัน เจี๊ยน กั้น ฝีง เมี่ยน โหฒว กั้ม เฑี้ย เญย สี่, ปุน ต้ง เฒี้ยว เยียม เยลูซาเลม สา ธีง-เหฑ่ง เญย เปย๊า ม่าย หวุย.

15เฒี้ยว, นิ่น บัว เญย อง-ถาย เญย ทิน-ฮู่ง, ไม้ ตี้ง เลี่ยว เญย พ้าย นิ่น เญย โต่ว เฝียน เมี่ยน มี่ง เหว่ย หฒุ นิ่น ค้อ-เลี่ยน นิ่น เญย แปะ ฝีง เหธา นิ่น เยียม เญย ต๋อง.

16นิ่น บัว จั๊ด นิ่น เญย โต่ว เฝียน เมี่ยน, หมั่ง เผีย นิ่น เญย หว่า, หย่า ฮว้วด นิ่น เญย โต่ว หว่า เมี่ยน เถา เฒี้ยว เฉีย เจี์ย! ไห่, โน์ว นิ่น เญย แปะ ฝีง. นิ่น บัว ฒู้ง ไม้ ไฮ่ เปย๋า ไม้ ดุ๊ด อ๊ะ.

17เหว่ย น้าย ทิน-ฮู่ง ปุน บาบีโลน เมี่ยน ต้าย เหธา นิ่น บัว เบ๊าะ จ๋า, เซ เยียม สีง ติ่น หล่ง หฑุ ด๊าว ไต๋ นิ่น บัว เญย โฮ่ว แซง หย่า ไม้ ค้อ-เลี่ยน นิ่น บัว เญย เมี่ยน หลุน เมี่ยน, ไม้ กุ๊น มจั่ง มเซียะ ไฟ เมี่ยน โก๋ เมี่ยน ไฟ ปุ๊ด-แป่ง เมี่ยน. ทิน-ฮู่ง เฒาะ นิ่น บัว เหยียด ฒู้ง จิว ปุน เยียม เนบูคัดเน้ดซา เญย ปั์ว-เดี๊ย.

18เนบูคัดเน้ดซา หย่า ต้อ เยียม หฒั่ง ทิน-ฮู่ง เญย เปย๊า เญย จา-ต๋อง, ไม้ กุ๊น โฮล ไฝ, เหธา เยียม หฒั่ง เฒี้ยว เญย เปย๊า เหธา ฮู่ง เตี๋ย เหธา ฮู่ง เตี๋ย เญย เจียน เหยียด ฒู้ง จ๋าย เญย กะน้าย.

19นิ่น บัว ปั๊ว หฒั่ง ทิน-ฮู่ง เญย เปย๊า, แธะ หว่าย เยลูซาเลม เญย ฒี่ง หลาด, หล่ง โต์ว ปั๊ว ฒี่ง กะญั์ว เญย นอมๆ ฮู่ง ติ่น, แอ๋ง ป่าย หว่าย เยียม วั้ว เญย เหยียด ฒู้ง จ๋าย เญย กะน้าย.

20ต้ง เปย๋า ดุ๊ด ไม้ หฒุ หฑุ ด๊าว ไต๋ วั้ว เต๋ย, นิ่น กว๊าด มี่ง เถา บาบีโลน. นิ่น บัว ฯฒฯ เป๋น นิ่น เหธา นิ่น เญย เฒ้ย-ฟุน เญย โน่ว เถา เหลียบ เจี์ย เปเซีย กั๊วะ.

21เต่ย-ปูง ฯฒฯ เป๋น เดา-ฮวาง เธี้ยด เหฒียบ หฮญัง, ฒั้ว เดา ฮิด ขวน เญย หฮญัง ปวั๊ง. ฮนั้ง หน่าย เซ เหว่ย โหฒว เหฒียง หฒิว เฒี้ยว หล่ง เยเลมี ก๊อง เญย หว่า.

22เปเซีย ฮู่ง, ไซลัด, โหฒว ฮู่ง ต้าว หฮญัง วั้ว หฮญัง, เหว่ย ปุน เฒี้ยว หล่ง เยเลมี ก๊อง เญย หว่า ธ้วด ต้าย ต๋อย-ติ่ว, เฒี้ยว ต์ง หฒุ เปเซีย เญย ไซลัด ฮู่ง. นิ่น ฯฒฯ ฒุ่น หว่า ก๋อม นิ่น เญย กั๊วะ หย่า เฟี้ย เหฌี่ย ก๊อง,

23“เปเซีย เญย ฮู่ง, ไซลัด, ฮนั้ง น้าย นอ ก๊อง. “‘เฒี้ยว, ลู่ง หฒั่ง เญย ทิน-ฮู่ง, เฒาะ ลู่ง เดี๊ย หม่าน กั๊วะ จิว ปุน เยีย หย่า พ้าย เยีย เยียม ยูดา เญย เยลูซาเลม ฒี่ง เหธย นอม เปย๊า ปุน นิ่น. เยียม เม่ย บัว บุด๋ง ม่าย หาย เต้า โหฒว นิ่น เญย แปะ ฝีง, โท้ เฒี้ยว, นิ่น เญย ทิน-ฮู่ง, เหธา นิ่น เยียม. กุ๊น ปุน นิ่น ฝาว มี่ง อ๊ะ.’”

← Chapter 35 Jump to: