2 Chronicles 16

Mien Bible (Thai Script) © Thailand Bible Society, 2007

← Chapter 15 Jump to: Chapter 17 →

1อาสา โหฒว ฮู่ง ฟ่า เหฒียบ หลัวะ หฮญัง วั้ว หฮญัง, อิสะลาเอน เญย ฮู่ง, บาอาชา, ต้าย เบ๊าะ ยูดา. นิ่น เว่ย เจี๊ยน ลามา ฒี่ง ว้วน เญย, ไม้ ปุน หาย เต้า ไฮ่ เปียะ ธ้วด ล์อ ยูดา ฮู่ง, อาสา.

2อาสา ฯฒฯ เยียม หฒั่ง เฒี้ยว เญย เปย๊า เหธา ฮู่ง ติ่น, เซียว จ๋าย เญย กะน้าย เญย ต๋อง, เฒาะ เจียม ญ่าน ฝูง มี่ง ปุน ซีเลีย เญย ฮู่ง, เบนฮาดัด. นิ่น ก๊อง,

3“โท้ เม่ย เหธา เยีย เหลียบ แหง่ง หว่า ฮนั้ง เม่ย เญย เตีย เหธา เยีย เญย เตีย เหลียบ แหง่ง หว่า วั้ว นอ. เยีย เฒาะ เจียม ญ่าน ฝูง ปุน เม่ย. โท้ ถุย เม่ย เหธา อิสะลาเอน เญย บาอาชา ฮู่ง เหลียบ เญย แหง่ง หว่า, เหว่ย ปุน นิ่น ถุย เล่ย ฆอย เยีย.”

4เบนฮาดัด หมวัง อาสา ฮู่ง เญย หว่า, พ้าย นิ่น เญย จุน-แปง-เปย๊ย มี่ง เบ๊าะ อิสะลาเอน เญย ฒี่ง. นิ่น เบ๊าะ อิโยน, ดาน, อาเบนมาอิม เหธา นับทาลี เญย เหยียด ฒู้ง เซียว กะน้าย เญย ฒี่ง.

5บาอาชา ไฮ์ น้าย เต๋ย สี่ ธ้วด, นิ่น ตี้ง, กวั่ง เหฌี่ย น้าย เต๋ย กง, ไม้ เหธย ลามา อ๊ะ.

6ฮนั้ง หน่าย อาสา ฮู่ง ต้อ ยูดา เญย หฒวัง เมี่ยน มี่ง เฒาะ หล่ง เหธย ลามา ฒี่ง เญย หละเปย๊ย เหธา เดี๋ยง เปี้ยน มี่ง หล่ง เหธย เกบา เหธา มิดปา.

7ต๋อย วั้ว เต๋ย เฒี่ยง โห่ โต่ว หว่า เมี่ยน, ฮานานี, ต้าย ล์อ ยูดา เญย ฮู่ง, อาสา, ก๊อง บั๋ว นิ่น, “เหว่ย หฒุ เม่ย เขา ซีเลีย เญย ฮู่ง, ไม้ เขา เฒี้ยว, เม่ย เญย ทิน-ฮู่ง, ซีเลีย ฮู่ง เญย จุน-แปง เปย๋า ดุ๊ด เม่ย.

8เอทีโอเปีย เมี่ยน เหธา ลิเบีย เมี่ยน เญย จุน-แปง กวั้น เหธา เบ๊าะ จ๋า เญย ม์า-เธีย เหธา เก้ ม์า แปง ธั้ม! ไห่ ไม้ เฒ์ย? มป่า เหว่ย หฒุ เม่ย เขา เฒี้ยว, นิ่น จิว ปุน นิ่น บัว เยียม เม่ย เญย ปั์ว-เดี๊ย.

9เฒี้ยว เญย มฒีง หมั่ง มี่ง หมั่ง ต้าย ก๋อม ลู่ง เดี๊ย เหว่ย เหธย ชะ ปุน ม่าย เฮญี้ยว กัน เหฑ่ง นิ่น วั้ว เต๋ย. เม่ย โหฒว น้าย เต๋ย สี่ เซ หฮงง ไห่. เยียม น้าย มี่ง เม่ย ฯฒฯ ม่าย เบ๊าะ จ๋า เญย สี่.”

10อาสา ฯฒฯ เฉีย เจี์ย! โต่ว หว่า เมี่ยน ฯฒฯ เฒาะ นิ่น หววน เจี๊ยน โล่. ต้ง วั้ว หฒั่น อาสา หย่า เจี์ย กอน โหฒว โตะ ปุน เต๋ย แปะ ฝีง.

11อาสา โหฒว เญย สี่ เยียม กอน เถา เซ้ด เมว์ย เฟี้ย เจี๊ยน เยียม ยูดา เหธา อิสะลาเอน เญย ฮู่ง โต้ว ตาน.

12นิ่น กุ๊น ฟ่า เหฒียบ จั๊ว หฮญัง วั้ว หฮญัง, อาสา เญย เหฒา ม่าย แป่ง. ไม้ กุ๊น แป่ง เฮนี้ย นิ่น ไม้ ล์อ เฒี้ยว เถง, นิ่น ล์อ เดีย-ไซ เถง ฮนั้ง.

13นิ่น โหฒว ฮู่ง เฝย เหฒียบ เยี้ยด หฮญัง วั้ว หฮญัง, นิ่น เกวย เสย หมี่ อ๊ะ.

14นิ่น หฒัง เจี๊ยน เยียม ดาวิด เญย ฒี่ง, ต้ง นิ่น เหว่ย กั้น หฒุ ต้าย เญย โฒ้ว. เมี่ยน เฒาะ นิ่น หลอง อัน เซย เญย ต๋อง, ต้ง ม่าย ดาง เญย กะน้าย เหธา หฒิว หฒั่ง เมี่ยน เญย หฒะเอ๋ย เผว ต้าย เหฒีย หญู่ง เญย หลาบ หลิ่ว ดุย เจี๊ยน. นิ่น บัว หย่า ปั๊ว กว๋า ต้ม โต์ว เหว่ย ท่าย นิ่น.

← Chapter 15 Jump to: Chapter 17 →